Deuteronomy 20

Kirundi (Bibliya Yera 1951, 1967 (Burundi))

← Chapter 19 Jump to: Chapter 21 →

1Ni mwaja mu ntambara kurwanya abansi banyu, mukabona amafarasi n’imikogote n’ abantu babaruta ubginshi, ntimuze mubatinye; kuk’ Uhoraho Imana yanyu yabakūye mu gihugu ca Egiputa azoba ari kumwe namwe.

2Maze ni mwashika hafi y’urugamba, umuherezi aze yēgēre abantu, ababarire,

3ati Ni mwumve, yemwe Bisirayeli: uyu musi mwēgereye urugamba ngo murwane n’abansi banyu; ntimuranduke imitima, ntimutinye, ntimugire ubgoba, canke ngo mubacikire ivutu;

4kuk’ Uhoraho Imana yanyu ari we ajanye namwe, ngw abarwanire n’abansi banyu, abahe kunesha.

5Maz’ abakuru baze babaze abantu, bati Ni nde ari hano yubatse inzu nsha, akaba atarayinjira? N’agende asubire i muhira, ntahave agwa mu ntambara, uwundi akaba ari we ayinjira.

6Kandi ni nde ari hano yateye uruzabibu, akaba ataratamira ku nzabibu zarwo? N’agende asubire i muhira, ntahave agwa mu ntambara, uwundi akaba ari we azorya inzabibu zarwo.

7Kandi ni nde ari hano yasavye umugeni, akaba ataramurongora? N’agende asubire i muhira, ntahave agwa mu ntambara, uwundi akaba ari we azomurongora.

8Abo bakuru bongere babaze abantu, bati Ni nde ari hano atinye, arandutse umutima? N’agende asubire i muhira, imitima ya bagenzi be ntihave isha cōba nk’uwiwe.

9Abo bakuru ni bamara kubarira abantu ivyo, baze bashireh’ abagabisha b’ingabo bo kurōngōra abantu.

10Ni mwashika hafi y’igisagara, mugiye kugitera, muze mubarire abo muri co ngo babakomere amashi.

11Maze ni bemera kubakomera amashi, bakabūgururira, abari muri co bose muze mubashinge ibikebere, babakorere.

12Ariko ni banka kubakomera amashi, bakagomba kurwana namwe, muze muziguze ico gisagara;

13maz’ Uhoraho Imana yanyu ni yakigabura mu maboko yanyu, muze mwicishe inkota uw’ izinamuhungu wese wo muri co;

14arikw abagore n’abana, n’amasho, n’ibiri mur’ ico gisagara vyose, iminyago yaho yose n’isahu, muvyitwarire, murye ivyo mwanyaze abansi banyu, ivyo Uhoraho Imana yanyu yabahaye.

15Ukw az’ abe ari ko muzogenza ibisagara biri kure yanyu bibītāngūye, bitar’ ivy’ aya mahanga y’ino.

16Ariko mu bisagara vy’aya mahanga y’ino, aho Uhoraho Imana yanyu ibahaye kw ishamvu, ntimuze mukize ikintu na kimwe gihūmēka.

17Ariko muze murandure rwose ayo mahanga, ni bo Baheti, n’ Abamori, n’Abanyakanani, n’Abaferizi, n’Abahiwi, n’Abayebusi, nk’ uk’ Uhoraho Imana yanyu yababariye;

18kugira ngo ntibaze babigishe gukora ivy’ ibizira bakora vyose, ivyo bakorera imana zabo, mukaba mucumuye k’Uhoraho Imana yanyu.

19Ni mwamara igihe kirekire mujiguje igisagara, muriko murarwana na co ngo mukineshe, ntimuze muhitane incabiti ngo muririke ibiti vyaho, kuko muzorya ivyamye kuri vyo. Ntimuze muvyicire: non’ igiti co ku musozi mbega na co kibaye umuntu, vyotuma mugitera nk’ico gisagara?

20Mugabo, ibiti muzi ko bitama ibiribga, muze mubiririke, mubice, muvyubakishe ivyo kwuririrako kur’ ico gisagara kiriko kirabarwanya, gushitsa aho muzogitsindira.

← Chapter 19 Jump to: Chapter 21 →