Deuteronomy 22

Kirundi (Bibliya Yera 1951, 1967 (Burundi))

← Chapter 21 Jump to: Chapter 23 →

1Ni hagira uwo muri mwebge abona inka izimiye, cank’ intama, y’uw’ i wanyu w’Umwisirayeli, wewe uyibonye ntuz’ upfe kwirengagiza, arik’ uz’ uyigarurire inayo.

2Kandi inayo ni yakuba kure, cank’ ukaba utamuzi, uz’ uyijane i wawe, uyigumye, gushitsa aho inayo azoyironderera, uyimuhe.

3Kandi n’indogoba uz’ uyigenze urtyo, bo n’impuzu itakaye, n’ikindi kintu cose c’uw’ i wanyu w’Umwisirayeli cari kizimiye, ukakirengukako: ntuz’ upfe kwirengagiza.

4Kandi ni wabona indogoba y’ uw’ i wanyu cank’ inka yiwe itemvye ku nzira, ntuz’ upfe kwirengagiza: ntuz’ ubure kumufasha kuyivyura.

5Ntihaze hagire izinamukobga yambarana impuzu n’izinamuhungu, canke ngo hagire izinamuhungu yambarana n’izinamukobga: kuk’ ūkoze ivyo wese aba abaye ikizira k’Uhoraho Imana yanyu.

6Ni hagira uwo muri mwebge abona icāri c’inyoni ku nzira imbere yiwe, kiri ku giti canke hasi, kirimw’ ivyana cank’ amagi, nyina ikaba ibundikiriye ivyo vyana cank’ amagi; wewe ubibonye, ntuz’ ufate nyina ng’ uyijanane n’ivyana vyayo:

7ntuz’ ubure kureka nyina ngw igende, arikw ivyana ushobora kubitwara; uz’ ureke nyina kugira ng’ ube mu vyiza, urambe.

8Ni hagira uwubaka inzu nsha muri mwebge, wewe uyubaka uz’ uyikīkūzekw igikugiro hejuru co gutangīra umuntu, ntakoroke, bigahava bizanira inzu yawe guharūrwakw amaraso y’uno akorotse.

9Ntihaze hagire ūsukiranya imbuto z’imiryango ibiri mu ruzabibu rwiwe, imyimbu yose ikazohava ihinduka inyegu y’Ahēra, ar’ iy’ izo mbuto yarimye, ar’ iy’ imizabibu.

10Ntihaze hagire ūrimisha inka n’indogoba azisangije ingōgo imwe.

11Ntihaze hagire uwambara impuzu ijishwe mu nyuzi z’ubgoko bubiri, nk’iz’ ubgoya bg’intama n’iziva ku giti citwa pishita.

12Impuzu zanyu mwambara, muze muzitere ubuyonga mu mitwe yazo ukw ar’ ine.

13Umuntu ni yarongora umugeni, akaryamana na we, agaheza akamwanka,

14akamurega ibiteye isoni, akamwambika ibara, akavuga, ati Narongoye uyu mugeni, maze ndoye iy’ ari, nsanga atagira ibimenyetso vy’ubgigeme.

15Maze se na nyina b’uwo mukobga baze bābīre ibimenyetso vy’ ubgigeme bgiwe, babishīre abakuru b’igisagara cabo mw irembo ryaco.

16Se w’uwo mukobga aheze abarire abo bakuru, at’ Uyu mugabo namushingiye umukobga wanje, non’ aramwanse;

17kand’ amureze ibiteye isoni, ngo ntiyasanganye umukobga wanje ibimenyetso vy’ubgigeme; ariko rero, ibimenyetso vy’ubgigeme bgiwe ngibi. Baheze bagaranzure uwo mwambaro imbere y’abakuru b’igisagara.

18Abo bakuru bafate uwo muntu bamukubitishe;

19bateko bamucire iciru ca shekeli z’ifeza ijana, bazihe se w’uwo mukobga, kuko yambitse ibara umwigeme wanyu Abisirayeli; na we uwo mugore akomeze kuba uwiwe; az’ arinde apfa atamwirukanye.

20Na ho ivyo ni vyaba ivy’ ukuri, ata bimenyetso vy’ubgigeme vyabonetse kur’ uwo mukobga,

21baze bamusohokane, bamujane ku muryango w’inzu ya se, abagabo bo mur’ ico gisagara cabo bamwicishe amabuye, kuko yakoze ikizira mu Bisirayeli, agasambanira kwa se: ukw az’ abe ari ko mukūra ikibi hagati muri mwebge.

22Umuntu ni yafatwa aryamanye n’umugore w’uwundi, baze babice bompi: abo ukw ari babiri, uwo mugabo yaryamanye n’ uwo mugore, na nya mugore nyene, bapfe; ukw az’ abe ari ko mukūra ikibi muri mwebge Abisirayeli.

23Umuntu ni yasanga umukobga mu gisagara, kand’ ar’ umwigeme yasabge n’uwundi, akaryamana na we;

24bompi muze mubajane kw irembo ry’ico gisagara, mubicishe amabuye; umukobga azire kw atavugije induru kandi yari mu gisagara, uwo mugabo azire ko yononye umugeni wa mugenzi we; ukw az’ abe ari ko mukūra ikibi hagati muri mwebge.

25Arik’ umuntu ni yasanga umukobga mu gahinga, kand’ ar’ uwasabge, akamugōbēra, agasambana na we; uwo mugabo yasambanye na we az’ abe ari we apfa wenyene:

26arik’ uyo mukobga ntimuze mugire ico mumugira, kukw ata caha azoba yakoze co kumwicisha: kukw ivyiwe bizoba bibaye nk’uk’ umuntu avira hasi uwundi, akamwica.

27Kuk’ uyo mugabo azoba yamusanze mu gahinga, uyo mwigeme akazoba yaravugije induru, hakabura ikimutabara.

28Umuntu ni yasanga umukobga akizigamye ubgigeme bgiwe, kand’ ataribgasabge, akamufata, agasambana na we, bakabaserukako;

29uyo mugabo azoba yasambanye na we az’ ahe se w’uyo mukobga inkwano ya shekeli z’ ifeza mirongwitanu, uyo aheze abe umugore wiwe, kuko yamwononye; az’ arinde apfa atamwirukanye.

30Ntihaze hagire ūcūra muka se, canke ngo yorosore impuzu ya se, ngw amwambike ubusa.

← Chapter 21 Jump to: Chapter 23 →