Deuteronomy 8

Kirundi (Bibliya Yera 1951, 1967 (Burundi))

← Chapter 7 Jump to: Chapter 9 →

1Ivyagezwe vyose mbagera uyu musi muze muvyitondere, mubishitse, kugira ngo mubone kubaho, mugwire, kugira ngo mwinjire igihugu Uhoraho yarahiye ba sogokuruza banyu kw azokibaha.

2Kandi muze mwibuke urugendo rwose rwo mu bugaragwa Uhoraho Imana yanyu yabarōngōyemw’ iyi myaka ukw ari mirongwine; kugira ngw abacishe bugufi, abagerageze, amenye ibiri mu mitima yanyu, yuko muzokwitondera ivyagezwe vyiwe canke ko mutazovyitondera.

3Nuko yabacishije bugufi, yemera ko musonza, araheza abagaburira manu mutāri muzi, na ba sogokuruza banyu batigeze kumenya; kugira ngw abamenyeshe yuk’ umuntu adatungwa n’ivyo kurya gusa, arikw atungwa n’amajambo yose ava mu kanwa k’Uhoraho.

4Impuzu zanyu ntizabashiriyeko, cank’ ibirenge vyanyu ngo bivyimbe, iyi myaka ukw ari mirongwine.

5Mukwiye kumenya mu mitima yanyu yuk’ Uhoraho Imana yanyu abahana nk’uk’ umuntu ahana umwana wiwe.

6Muze mwitondere ivyagezwe vy’Uhoraho Imana yanyu, mugendere mu nzira ziwe, mumwubahe.

7Kuk’ Uhoraho Imana yanyu abajanye mu gihugu ciza, n’igihugu kirimw’ imigezi n’amariba n’amasōko, vyatobotse mu myonga no ku misozi.

8N’igihugu kibamw’ ingano na sayiri n’imizabibu n’imisukoni n’amakomamanga; n’igihugu kibamw’ imyelayo n’ubūki;

9n’igihugu muzokenukiramw’ ivyo kurya, ntimugire ico mugikeneramwo; n’ igihugu kirimw’ amabuye y’ubutare, n’imisozi mwoshobora kwimbamw’ imiringa.

10Muzokwama mu gahimbo, mushimire Uhoraho Imana yanyu igihugu ciza yabahaye.

11Muze mwirinde, mwoye kwibagira Uhoraho Imana yanyu, mukareka kwitondera ivyagezwe vyiwe, n’amatēka yiwe ashinzwe, n’amabgirizwa yiwe, ivyo mbageze uyu musi.

12Ni mwamara kurya mugahimba, mukūbaka amazu meza mukayabamwo;

13amasho yanyu n’imikuku yanyu bikagwira, mukagwiza amafeza n’amazahabu, mber’ ivyo mufise vyose bikagwira;

14maze muze mwirinde, imitima yanyu yoye kwishira hejuru, ngo mwibagire Uhoraho Imana yanyu yabakūye mu gihugu ca Egiputa, mu nzu y’ubuja,

15akabacisha muri bga bugaragwa bunini buteye ubgoba, burimw’ inzoka z’ubumara buturira na sikorupiyo, igihugu kigataye kitagira amazi; ikabakūrira amazi mu gitandara c’isare,

16ikabagaburira manu mur’ ubgo bugaragwa, iyo ba sogokuruza banyu batigeze kumenya; kugira ngw abacishe bugufi, abagerageze, maz’ amaherezo az’ abagirire neza.

17Kandi muze mwirinde, mwoye kwiyumvira mu mitima yanyu, mut’ Ubutōre bgacu n’inkomezi zacu ni vyo vyaturonkesheje ubu butunzi.

18Ariko muze mwibuke Uhoraho Imana yanyu, kukw ari we azobaha ubutōre bgo kuronka ubutunzi, kugira ngw ashitse isezerano yasezeranye arahira ba sogokuruza banyu, nk’uko biri n’uyu musi.

19Ariko ni mwibagira Uhoraho Imana yanyu, mugakurikira izindi mana, mukazisaba, mukazisenga, uyu musi ndababūriye yuko mutazobura guhona.

20Nk’uk’ Uhoraho agenda arandura amahanga imbere yanyu, ni ko namwe muzoranduka, kuko muzoba mwanse kwumvira ijwi ry’Uhoraho Imana yanyu.

← Chapter 7 Jump to: Chapter 9 →