Deuteronomy 7

Kirundi (Bibliya Yera 1951, 1967 (Burundi))

← Chapter 6 Jump to: Chapter 8 →

1Uhoraho Imana yanyu ni yamara kubashikana mu gihugu mugiye kwegukira, agasohora amahanga menshi ngw ababise, Abaheti n’Abagirugashi n’Abamori n’Abanyakanani n’Abaferizi n’Abahiwi n’Abayebusi, amahanga ndwi abarusha ubginshi n’inkomezi;

2kand’ Uhoraho Imana yanyu ni yamara kubagabura mu maboko yanyu, mukabatsinda, muze mubarandure. Ntimuze mugire isezerano musezerana na bo, canke ngo mubagirire akagongwe.

3Ntimuze musabiranire na bo, ngw abakobga banyu mubahe abahungu babo, cank’ abahungu banyu mubasabire abakobga babo.

4Kuko bohindura abahungu banyu, ntibagendanire Uhoraho, ariko bagasaba izindi mana; ivyo bigatuma uburake bg’Uhoraho bubaziriringira, agaca abarandura ako kanya.

5Arik’ uku az’ abe ari ko mubagirira: muze musangangure ibicaniro vyabo, mumenagure amabuye bashinze, mutemagure inkingi bashingiye Ashera, muturire ibishushanyo vyabo bibājwe.

6Kuko mur’ ihanga ryera ryarobanuriwe Uhoraho Imana yanyu; kand’ Uhoraho Imana yanyu yabatoranije mu mahanga yose yo mw isi ngo mube ihanga yiharije.

7Icatumye Uhoraho abakunda, akabatoranya, s’uko mwarusha ayandi mahanga yose ubginshi; mbere mwar’ ubusa hanyuma y’ayandi yose.

8Ariko n’uk’ Uhoraho abakunda, akagomba gushitsa indahiro yarahiye ba sogokuruza banyu; ni co catumye Uhoraho abakūzay’ ububasha bgiwe bginshi, akabagobōtora, akabakūra mu nzu y’ubuja, no mu maboko ya Farawo umwami wa Egiputa.

9Nuko rero mumenye yuk’ Uhoraho Imana yanyu ari yo Mana; n’Imana yo kwizigirwa, yama ishitsa isezerano, ikagirira imbabazi abayikunda, bakitondera ivyagezwe vyayo, ikageza ku runganwe rwabo uko ruzogenda rukurikirana gushitsa igihumbi;

10arikw abayanka ikabasubiriza mu nkōko bidatevye, ikabahonnya; ku vyo igirira ūyanka ntibitak’ urwangara, arikw imusubiriza mu nkōko bidatevye.

11Nuko rero muze mwitondere ivyo vyagezwe n’amabgirizwa n’ amatēka ashinzwe mbageze uyu musi, mubishitse.

12Maze ni mwumvira ayo matēka ashinzwe, mukayitondera, mukayashitsa, Uhoraho Imana yanyu azobashikiriza isezerano, abagirire imbabazi, nk’uko yarahiye ba sogokuruza;

13azobakunda, abahe umugisha, abagwize; azohezagira uruvyaro rwo mu nda zanyu, n’imirima yo mu ndimiro zanyu, n’amasaka na vino n’amavuta ya elayo, n’ukugwira kw’ inka zanyu n’ukw’ imikuku yanyu, abihezagirire mu gihugu yarahiye ba sogokuruza banyu kw azokibaha.

14Muzogira umuhezagiro gusumba ayandi mahanga yose; ntihazoba ingumba y’umugabo canke y’umugore muri mwebge, canke mu masho yanyu.

15Uhoraho azobakūrakw indwara zose; ntazobatēza n’imwe muri za ndwara mbi zo muri Egiputa, nk’uko muzizi, arikw azozitēza ababanka bose.

16Nuko muze murandure amahanga yose Uhoraho Imana yanyu azogabura mu maboko yanyu ata kagongwe; ntimuze musabe imana zabo, kukw ivyo vyobabera umutego.

17Kumbure mwokwibaza mu mitima yanyu, mut’ Aya mahanga kw aturuta ubginshi, twoshobora dute kuyanesha?

18Ntimuze mubatinye: muze mwibuke ivyo Uhoraho Imana yanyu yagiriye Farawo n’igihugu cose ca Egiputa;

19ibigerageza bikomeye amaso yanyu yiboneye, n’ ibimenyetso n’ibitangaza, n’ingen’ Uhoraho Imana yanyu yabakūjey’ ukuboko kw’inkomezi kandi kubanguye; uko ni kw azogirira amahanga yose muzoba mufitiye ubgoba.

20Kand’ Uhoraho Imana yanyu azobatērēra amavubi, gushitsa ah’ amasigarira yabo yabīnyegeje azohonera.

21Ntimuze mubatinye, kuk’ Uhoraho Imana yanyu ari hagati muri mwebge, ar’ Imana ihambaye iteye ubgoba.

22Kand’ Uhoraho Imana yanyu azokwirukana ayo mahanga imbere yanyu si ruto si ruto; ntimwobamarira icarimwe, ibikōko vyo mw ishamba vyoye kuzohava bigwira bikabatera.

23Arik’ Uhoraho Imana yanyu izobagabura mu maboko yanyu, ibace igikuba gihambaye, gushitsa batikiye.

24Kand’ azogabura abami babo mu maboko yanyu, namwe muzozimiriza amazina yabo musi y’ ijuru; nta muntu n’umwe azoshobora kubahagarara imbere, gushitsa mubaherengeteje.

25Ibishushanyo bibājwe vy’ibigirwamana vyabo muze mubiturire; ntimuze mwifuze ifeza cank’ izahabu vyometse kuri vyo, ntimuze mubitware, vyoye kuzohava bibahindukira umutego, kukw ivyo ar’ ubuyobe k’Uhoraho Imana yanyu;

26ntimuze mujane ico kintu c’ubuyobe mu ngo zanyu, mwoye kuzohava muhinduka umuvumo nka co; muze mucanke urunuka, mukizinukwe rwose, kukw ar’ ikintu cāvumwe.

← Chapter 6 Jump to: Chapter 8 →