Job 30

Ewe 2014 (EƲEGBE BIBLIA)

← Chapter 29 Jump to: Chapter 31 →

1“Ke egbe la, yonyemeviwo hã le fewu ɖum le ŋunye. Ame siawo la, ne wobe maxɔ wo tɔ́wo, ne woanɔ avuwo ŋu woakplɔ nye alẽhawo gɔ̃ hã la, magbe.

2Viɖe ka makpɔ le woƒe alɔka me? Ŋusẽ vɔ le wo ŋu keŋ.

3Hiã kple dɔwuame na agbe vɔ le wo ŋu. Ame siawo kukoa anyigba ƒuƒu si nye gbegbe kple amemanɔƒe la.

4Wokéa aŋɔto le gbeto, eye dɔli ƒe ɖoɖoa nye woƒe nuɖuɖu.

5Ame siawo la, wonya wo ɖa le ame dome kple ɣli abe fiafitɔ ene.

6Ele be woanɔ tɔsisi ŋu, agadowo, ʋewo kple agakpewo me.

7Woxlɔ̃na le avekɔewo me, eye womimina ɖe wo nɔewo ŋu le aŋɔkawo te.

8Bometsilawo, ame ɖigbɔwo ƒe viwo wonye. Ame siwo wonyà ɖa kple atam le anyigba dzi la.”

9“Azɔ ame siawo viwoe kpa ha dem le dzidzim! Mezu hamelo na wo.

10Mele ŋu nyɔm na wo; wote ɖe megbe tso ŋunye, eye ne wokpɔm la, womegbea taɖeɖe o.

11Esi Mawu gbɔdzɔ nye dati ƒe ka me, hebɔbɔm ɖe anyi ta, woawo hã le nunye ɖiam.

12Yakamewo to nye ɖusime tutum ƒu anyi, eye wodi mɔnu be yewoagblẽ donye me.

13Woxe mɔ nam, wona nye dzɔgbevɔ̃e dzi ɖe edzi; ame aɖeke megbe nya na wo o.

14Woto gbagbãƒe lũ ɖe dzinye, eye woƒo ɖe dzinye le ʋunyaʋunya me.

15Ŋɔdzi lém. Woti nye bubu yome abe yaƒoƒo ene, eye nye dzidzedze bu abe alilikpo ene.”

16“Evɔ nam azɔ; medɔ̃! Fukpekpe ɖi kpem!

17Zã le nu tɔm nye ƒuwo tome eye vevesese le kukoyem madzudzɔmadzudzɔe.

18Elé awu ɖe ŋunye sesĩe eye wòmia dziwui ɖe ve nam.

19Mawu tsɔm xlã ɖe ba me; mezu ke kple dzowɔ.

20Medo ɣli yɔ wò; metɔna nam o. Metso tsi tsitre ɖi, gake mede nu eme nam o.

21Ètrɔ zu ŋutasẽla ɖe ŋunye, eye nètsɔ wò ŋusẽ katã le yonyeme timee.

22Èlém ɖe ya nu, eye ahom nyamam heƒom dzoe.

23Menya nyuie be àkplɔm ayi kuwode kple aƒe si wotia na agbagbeawo katã la me.”

24“Ne ame le to yim la, ɖe medoa asi ɖe dzi oa? Ne ame ɖo dzɔgbevɔ̃e me la, ɖe medoa boboe oa?

25Ðe nyemefa avi ɖe ame si ɖo ɣeyiɣi sesẽ me la ŋu kpɔ oa? Ðe nyemexa nu ɖe ame si hiã tu ŋu kpɔ oa?

26Ke esi mekpɔ mɔ na dzɔgbe nyui la, dzɔgbevɔ̃e ɖi kpem. Mekpɔ mɔ na kekeli; ke vivitie dó.

27Nye dzi le tsotsom madzudzɔmadzudzɔe. Fukpeŋkekewo ƒo ɖe dzinye.

28Mele zɔzɔm le viviti me, ke menye ɣe ye wɔe o. Metso le boboe dom le dutakpekpe me be woaxɔ nam.

29Mezu akpataku nɔvi kple tsatsaboli hati le konyifaɣli dom.

30Nye ŋutigbalẽ nyɔ vìi hele fofom; nye lã me dze dzo ʋuu, nye ƒuwo fiã gɔ̃.

31Nye gakasaŋku le konyifagbe dom, eye nye kpẽkuku ɖina avigbee.”

← Chapter 29 Jump to: Chapter 31 →

Recommended Reading

Commentary Job Commentaries → Devotional Job Devotional Guide → Get This Bible Ewe (EƲEGBE BIBLIA) Study Bible →