Numbers 14

Ewe 2014 (EƲEGBE BIBLIA)

← Chapter 13 Jump to: Chapter 15 →

1Le zã ma me katã la, dukɔ la nɔ ɣli kple avi ko dzi hoo.

2Israelviwo katã lĩ liʋiliʋĩ le Mose kple Aron ŋu be: “Oo, ɖe míeku ɖe Egipte-nyigba dzi boŋ alo ɖe gbedadaƒo afii la, ne enyo na mí wu!

3Nu ka ta gɔ̃ Aƒetɔ kplɔ mí va anyigba sia dzi ne míatsi aʋa? Woakplɔ mía srɔ̃wo kple mía viwo ayi aboyome. Ne míagbugbɔ ayi Egipte la, ɖe manyo na mí wu oa?”

4Ale wogblɔ na wo nɔewo be: “Mina míaɖo kplɔla na mía ɖokui, ne míagbugbɔ ayi Egipte!”

5Tete Mose kple Aron tsyɔ mo anyi ɖe Israelviwo katã ŋkume.

6Ke Yosua, Nun vi kple Kaleb, Yefune vi, ame siwo hã nɔ ŋkutsalaawo dome la dze woƒe awuwo,

7eye wogblɔ na ha blibo la be: “Anyigba si dzi míede ɖatsa ŋku la nyo ŋutɔŋutɔ.

8Ne míaƒe nu dze Aƒetɔ ŋu ko la, akplɔ mí ayi afi mae, eye wòatsɔ anyigba si dzi notsi kple anyitsi bɔ ɖo na mí.

9Migadze aglã ɖe Aƒetɔ ŋu o, eye migavɔ̃ ame siwo le afi ma la o. Míele wo dzi ɖu ge bɔbɔe. Aƒetɔ le mía dzi, eye wòɖu mawu siwo kpɔa wo ta la dzi xoxo, eya ta migavɔ̃ o.”

10Ke ha blibo la di be yewoaƒu kpe wo. Tete wokpɔ Aƒetɔ ƒe ŋutikɔkɔe wòdo ɖe godoƒegbadɔ la tame.

11Aƒetɔ gblɔ na Mose be: “Ɣe ka ɣi gɔ̃ dukɔ sia ado vlom ase ɖo? Ɣe ka ɣi woagbe dzinye xɔxɔ ase ɖo? Evɔ wònye mewɔ dzesi geɖewo le wo dome wokpɔ hafi?

12Eya ta mana dɔ vɔ̃ atsrɔ̃ wo, eye womanyi nye dome o, ke wò la, mana dukɔ gã aɖe si asẽ ŋu wu woawo la adzɔ tso mewò.”

13Ke Mose gblɔ na Aƒetɔ be: “Èkplɔ dukɔ sia do go tso Egipte kple wò ŋusẽ. Ne Egiptetɔwo se nu si nèwɔ na wò dukɔ la,

14woagblɔe na anyigba sia dzi tɔwo. Aƒetɔ, ame siawo see xoxo be èle mía dome elabe Aƒetɔ, wokpɔa wò ƒãa ne wò alilikpo tɔ ɖe mía tame. Wonya be wò Aƒetɔ, èzɔa mía ŋgɔ le alilikpo dodo me le ŋkeke me, eye le zã me la, èzɔa mía ŋgɔ le dzobibi me.

15Azɔ ne ètsrɔ̃ dukɔ sia zi ɖeka vim abe ale si wowua ame ɖeka ene la, ekema dukɔ siwo se ŋkɔwò la agblɔ be

16Aƒetɔ de dukɔ sia kplɔ ge ayi anyigba si ŋu eya ŋutɔ ka atam le na wo la dzi do kpoe, eya ta wòwu wo le gbedadaƒo ɖo.

17Eya ta Aƒetɔ, ɖe wò ŋusẽ fia abe ale si nègblɔ ene be:

18‘Nye Aƒetɔ, nyemedoa dziku kabakaba o, eye nye lɔlɔ̃ metrɔna gbeɖe o. Metsɔa ame ƒe vodada kple dzidada kena, evɔ la nyemegbea tohehe na ame o, elabe ne tɔ́wo wɔ nuvɔ̃ la, mehea to na wo viwo tso dzidzime etɔ̃lia dzi va se ɖe enelia dzi.’

19Eya ta, Aƒetɔ, meɖe kuku na wò, xa ɖe wò lɔlɔ̃ si metrɔna gbeɖe o la ta, nàtsɔ dukɔ sia ƒe vodada ake, abe ale si nèle ewɔm tso Egipte ke ene.”

20Tete Aƒetɔ ɖo eŋu be: “Matsɔe ake, abe ale si nèbia ene.

21Gake le nyateƒe me, zi ale si mele agbe, eye nye ŋutikɔkɔe ayɔ xexeme bliboa la,

22ŋutsu siawo dometɔ aɖeke made anyigba la dzi o. Wokpɔ nye ŋutikɔkɔe kple dzesi siwo mewɔ le Egipte kple gbedadaƒoa, gake wotem kpɔ zi nane, eye wogbe toɖoɖom.

23Womade anyigba si ŋu meka atam le be mana wo tɔ́wo la dzi gbeɖe o. Wo dome ame siwo katã do vlom la made o.

24Ke nye dɔla Kaleb ya ƒe nɔnɔme to vovo, eye wòdze yonyeme blibo eya ta makplɔ eya ayi anyigba si dzi wòde ɖatsa ŋku hegbɔ la dzi, eye wòazu eƒe dzidzimeviwo tɔ.

25Azɔ esi Amalekitɔwo kple Kanaantɔwo le balia me ta la, etsɔ la, miho gbugbɔ ɖo ta gbedadaƒo le Aƒlaƒua gbɔ.”

26Aƒetɔ gblɔ na Mose kple Aron be:

27“Ɣe ka ɣi gɔ̃ ha vɔ̃ɖi sia alĩ ŋunye ase ɖo? Mese Israelviwo ƒe liʋiliʋĩlilĩ le ŋunye.

28Azɔ gblɔ na wo be, ‘Nye Aƒetɔ meta ɖokuinye be zi ale si mele agbe la, mawɔ nu si miegblɔ mese la na mi.

29Miaku, eye miaƒe ŋutilã akaka atsi gbedadaƒo afii. Esi mielĩ ŋunye ta la, mia dometɔ siwo katã xɔ ƒe bla eve kple vɔ, eye woxlẽ wo la, made anyigba la dzi o.

30Meka atam tsã be mana mianɔ anyigba ma dzi; ke mele egblɔm na mi azɔ be mia dometɔ aɖeke maɖo edzi o, negbe Kaleb kple Yosua ko.

31Miegblɔ be wole yewo viwo lé ge ayi aboyo mee, ke woawoe makplɔ ayi anyigba si miedo vlo la dzi.

32Ke miawo ya la, miaku, eye miaƒe ŋutilã aƒaƒã atsi gbedadaƒo le afii kokoko.

33Mia viwo atsa le gbedadaƒo le afii abe alẽkplɔlawo ene ƒe bla ene, eye esi wònye womexɔ dzinye se o ta la, mana woakpe fu ɖe mia nu va se ɖe esime miaku avɔ le gbedadaƒo la.

34Ŋkeke bla enee mietsɔ yi ɖatsa ŋku le anyigba la dzi. Mana miakpe fu ƒe bla ene ɖe nuvɔ̃ siwo miewɔ la nu, ƒe ɖeka nuvɔ̃ ɖeka, ne miadze sii be miaƒe nu megadze ŋunye o.

35Aleae mawɔ ha vɔ̃ɖi sia si dze aglã ɖe ŋunye lae. Mebe mia dometɔ ɖe sia ɖe aku ɖe gbedadaƒo le afii kokoko. Nye Aƒetɔ lae gblɔe.”

36Ŋutsu siwo Mose dɔ wode ɖatsa ŋku le anyigba la dzi gbɔ la na ameha la lĩ liʋiliʋĩ le eŋu, elabe wova gblɔ nya vɔ̃ tso anyigba la ŋu.

37Ŋutsu siwo va gblɔ nya vɔ̃ la tso anyigba la ŋu la, ku tso dɔ vɔ̃ si me le Aƒetɔ ŋkume.

38Yosua kple Kaleb koe tsi agbe le ame wui eve siwo de la dome.

39Esi Mose gblɔ nya siawo na Israelviawo katã la, woxa nu ŋutɔ.

40Ŋdi kanya la, wodze mɔ. Wolia to la hegblɔ be: “Míele ŋudzɔ azɔ be míayi teƒe si ŋugbe Aƒetɔ do na mí la, elabe míewɔ nuvɔ̃.”

41Ke Mose gblɔ na wo be: “Nu ka ta miele Aƒetɔ ƒe se dzi dam azɔ? Madze edzi na mi o!

42Migayi o. Miaƒe futɔwo aɖu mia dzi elabe Aƒetɔ mele mia dome o.

43Amalekitɔwo kple Kanaantɔwo le mia ŋgɔ, eye ne miekpe aʋa kpli wo la, woaɖu mia dzi. Esi mietrɔ le Aƒetɔ yome ta la, eya hã manɔ kpli mi o.”

44Ke wodo dzi lia to la, togbɔ be Aƒetɔ ƒe nubablaɖaka la kple Mose meho kpli wo o hã.

45Tete Amalekitɔwo kple Kanaantɔwo siwo nye afi ma nɔlawo la va kpe aʋa kpli wo heɖu wo dzi, eye wonyà wo ɖe nu va se ɖe Xorma ke.

← Chapter 13 Jump to: Chapter 15 →