Jeremiah 1

Lao Bible 2012 (ພຣະຄຳພີສັກສິ)

Jump to: Chapter 2 →

1ພຣະທຳນີ້ເປັນບົດບັນທຶກຖ້ອຍຄຳທີ່ເຢເຣມີຢາໄດ້ກ່າວ. ເຢເຣມີຢາແມ່ນລູກຊາຍຂອງຮິນກີຢາ ປະໂຣຫິດຜູ້ໜຶ່ງໃນຄະນະປະໂຣຫິດແຫ່ງເມືອງອານາທົດ ໃນເຂດແດນຂອງເບັນຢາມິນ.

2ຖ້ອຍຄຳຂອງພຣະເຈົ້າຢາເວໄດ້ກ່າວແກ່ເຢເຣມີຢາໃນປີທີສິບສາມ ທີ່ເຈົ້າໂຢສີຢາ ລູກຊາຍຂອງເຈົ້າອາໂມນໄດ້ຂຶ້ນເປັນກະສັດແຫ່ງຢູດາຍ.

3ຕໍ່ມາ ໄດ້ກ່າວແກ່ເຢເຣມີຢາອີກ ເມື່ອເຢໂຮຍອາກິມ ລູກຊາຍຂອງເຈົ້າໂຢສີຢາໄດ້ຂຶ້ນເປັນກະສັດ. ຫລັງຈາກນັ້ນ ພຣະອົງກໍໄດ້ກ່າວແກ່ເຢເຣມີຢາອີກຕັ້ງຫລາຍເທື່ອ ຈົນເຖິງຣາຊການປີທີສິບເອັດຂອງກະສັດເຊເດກີຢາ ລູກຊາຍຂອງເຈົ້າໂຢສີຢາ. ໃນເດືອນທີຫ້າຂອງປີນັ້ນເອງ ປະຊາຊົນນະຄອນເຢຣູຊາເລັມໄດ້ຖືກຈັບໄປເປັນຊະເລີຍໃນຕ່າງຖິ່ນ.

4ຖ້ອຍຄຳຂອງພຣະເຈົ້າຢາເວໄດ້ກ່າວແກ່ຂ້າພະເຈົ້າວ່າ,

5“ເຮົາເລືອກເຈົ້າໄວ້ ກ່ອນເຮົາໄດ້ໃຫ້ຊີວິດແກ່ເຈົ້າ ແລະກ່ອນເຈົ້າໄດ້ເກີດມາ ເຮົາໄດ້ເລືອກເອົາເຈົ້າໄວ້ແລ້ວ ເພື່ອໃຫ້ເປັນຜູ້ທຳນວາຍແກ່ປະຊາຊາດທັງຫລາຍ.”

6ຂ້າພະເຈົ້າຈຶ່ງຕອບວ່າ, “ຂ້າແດ່ພຣະເຈົ້າຢາເວ ອົງພຣະຜູ້ເປັນເຈົ້າເອີຍ ຂ້ານ້ອຍບໍ່ຮູ້ຈັກວ່າຈະກ່າວຢ່າງໃດ; ຂ້ານ້ອຍຍັງໜຸ່ມເກີນໄປທີ່ຈະກ່າວຕໍ່ໜ້າມະຫາຊົນ.”

7ແຕ່ພຣະເຈົ້າຢາເວກໍຍັງກ່າວແກ່ຂ້າພະເຈົ້າວ່າ, “ຢ່າເວົ້າວ່າ, ເຈົ້າຍັງໜຸ່ມເກີນໄປ ແຕ່ຈົ່ງໄປຫາປະຊາຊົນທີ່ເຮົາສັ່ງເຈົ້າໃຫ້ໄປພົບ ແລະບອກພວກເຂົາທຸກໆສິ່ງທີ່ເຮົາສັ່ງເຈົ້າໃຫ້ກ່າວ.

8ຢ່າສູ່ຢ້ານກົວພວກເຂົາເລີຍ, ເພາະເຮົາຢູ່ກັບເຈົ້າເພື່ອປົກປ້ອງຄຸ້ມຄອງເຈົ້າ.” ພຣະເຈົ້າຢາເວໄດ້ກ່າວດັ່ງນີ້ແຫລະ.

9ແລ້ວພຣະເຈົ້າຢາເວກໍເດ່ມືອອກແຕະທີ່ປາກຂອງຂ້າພະເຈົ້າ ແລະພຣະເຈົ້າຢາເວກໍກ່າວແກ່ຂ້າພະເຈົ້າວ່າ, “ເບິ່ງດູ ເຮົາກຳລັງເອົາຖ້ອຍຄຳຂອງເຮົາໃສ່ເຂົ້າໄປໃນປາກຂອງເຈົ້າເພື່ອໃຫ້ເຈົ້າກ່າວ.

10ວັນນີ້ ເຮົາໃຫ້ເຈົ້າມີອຳນາດເໜືອປະຊາຊາດແລະອານາຈັກທັງຫລາຍ ເພື່ອໃຫ້ຖອນຮາກແລະຮື້ຖິ້ມ ເພື່ອໃຫ້ທຳລາຍແລະໂຄ່ນລົ້ມ ເພື່ອໃຫ້ກໍ່ສ້າງແລະປູກຝັງ.”

11ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ, “ເຢເຣມີຢາເອີຍ ເຈົ້າເຫັນຫຍັງແດ່?” ຂ້າພະເຈົ້າຕອບວ່າ, “ຂ້ານ້ອຍເຫັນງ່າຂອງຕົ້ນໝາກບົກ.”

12ພຣະເຈົ້າຢາເວກ່າວຕໍ່ຂ້າພະເຈົ້າວ່າ, “ເຈົ້າເວົ້າຖືກແລ້ວ ແລະເຮົາກຳລັງເຝົ້າຄອຍເບິ່ງ ໃຫ້ຖ້ອຍຄຳຂອງເຮົາກາຍເປັນຈິງ.”

13ແລ້ວຖ້ອຍຄຳຂອງພຣະເຈົ້າຢາເວກໍມາເຖິງຂ້າພະເຈົ້າຄັ້ງທີສອງວ່າ, “ເຈົ້າເຫັນຫຍັງອີກແດ່?” ຂ້າພະເຈົ້າຕອບວ່າ, “ຂ້ານ້ອຍເຫັນໝໍ້ໜ່ວຍໜຶ່ງທີ່ກຳລັງຟົດຢູ່ທາງທິດເໜືອ ແລະປາກໝໍ້ນັ້ນກໍປິ່ນມາທາງພີ້.”

14ພຣະເຈົ້າຢາເວໄດ້ກ່າວແກ່ຂ້າພະເຈົ້າວ່າ, “ການທຳລາຍຈະຟົດເດືອດຂຶ້ນຈາກທິດເໜືອມາສູ່ທຸກຄົນທີ່ອາໄສຢູ່ໃນດິນແດນນີ້

15ເພາະເຮົາກຳລັງເອີ້ນເອົາທຸກຊົນຊາດທາງທິດເໜືອໃຫ້ມາ. ພຣະເຈົ້າຢາເວກ່າວວ່າ ບັນດາກະສັດຂອງພວກເຂົາຈະຕັ້ງບັນລັງຂຶ້ນທີ່ປະຕູຂອງນະຄອນເຢຣູຊາເລັມ ແລະ ອ້ອມກຳແພງເມືອງ ຕະຫລອດທັງອ້ອມເມືອງອື່ນໆຂອງຢູດາຍດ້ວຍ.

16ເຮົາຈະລົງໂທດປະຊາຊົນຂອງເຮົາ ເພາະພວກເຂົາໄດ້ເຮັດບາບ; ພວກເຂົາໄດ້ປະຖິ້ມເຮົາໂດຍເຜົາເຄື່ອງບູຊາຖວາຍແກ່ບັນດາພະອື່ນໆ ແລະສ້າງຮູບເຄົາຣົບເພື່ອຂາບໄຫວ້.

17ເຢເຣມີຢາເອີຍ ຈົ່ງຕຽມຕົວໄປບອກພວກເຂົາທຸກສິ່ງທີ່ເຮົາສັ່ງເຈົ້າໃຫ້ກ່າວ. ບັດນີ້ຢ່າສູ່ຢ້ານກົວພວກເຂົາ ບໍ່ດັ່ງນັ້ນ ເຮົາຈະເຮັດໃຫ້ເຈົ້າຢ້ານຫລາຍຂຶ້ນຕື່ມ ເມື່ອເຈົ້າຢູ່ນຳພວກເຂົາ.

18ຈົ່ງຟັງເຖີດ ເຢເຣມີຢາເອີຍ ທຸກຄົນໃນດິນແດນນີ້ ຄືບັນດາກະສັດແຫ່ງຢູດາຍ, ພວກຂ້າຣາຊການ, ພວກປະໂຣຫິດ ແລະປະຊາຊົນທົ່ວໄປ, ຈະຕໍ່ສູ້ເຈົ້າ. ແຕ່ວັນນີ້ເຮົາໃຫ້ກຳລັງແກ່ເຈົ້າ ເພື່ອເຈົ້າຈະຕ້ານທານພວກເຂົາໄດ້; ເຈົ້າຈະເປັນດັ່ງເມືອງທີ່ມີປ້ອມປ້ອງກັນ, ມີເສົາເປັນເຫຼັກ ແລະມີກຳແພງເປັນທອງສຳຣິດ. ພວກເຂົາຈະເອົາຊະນະເຈົ້າບໍ່ໄດ້ ເພາະເຮົາຢູ່ກັບເຈົ້າເພື່ອປົກປ້ອງຄຸ້ມຄອງເຈົ້າ.” ພຣະເຈົ້າຢາເວກ່າວດັ່ງນີ້ແຫລະ.

Jump to: Chapter 2 →