Jeremiah 41

Lao Bible 2012 (ພຣະຄຳພີສັກສິ)

← Chapter 40 Jump to: Chapter 42 →

1ໃນເດືອນທີເຈັດຂອງປີນັ້ນ ອິດຊະມາເອນລູກຊາຍຂອງເນທານີຢາ ແລະຫລານຊາຍຂອງເອລີຊາມາ ເຊື້ອວົງຄົນໜຶ່ງ ແລະນາຍທະຫານຄົນໜຶ່ງຂອງກະສັດ ໄດ້ໄປທີ່ເມືອງມີຊະປາພ້ອມກັບທະຫານສິບຄົນ ເພື່ອພົບຜູ້ສຳເລັດຣາຊການເກດາລີຢາລູກຊາຍຂອງອາຮີກຳ. ໃນຂະນະທີ່ພວກເຂົາທຸກຄົນກຳລັງຮ່ວມພາເຂົ້າຢູ່ນັ້ນ

2ອິດຊະມາເອນແລະທະຫານສິບຄົນທີ່ມານຳຕົນ ກໍຊັກດາບອອກ ແລະຂ້າເກດາລີຢາລູກຊາຍຂອງອາຮີກຳຫຼານຊາຍຂອງຊາຟານ.

3ອິດຊະມາເອນຍັງໄດ້ຂ້າຊາວອິດສະຣາເອນທຸກຄົນທີ່ຢູ່ກັບເກດາລີຢາໃນເມືອງມີຊະປາ ແລະພວກທະຫານຊາວບາບີໂລນທີ່ຢູ່ໃນທີ່ນັ້ນ.

4ວັນຕໍ່ມາ ກ່ອນທີ່ຈະມີຜູ້ໃດຜູ້ໜຶ່ງຮູ້ວ່າເກດາລີຢາໄດ້ຖືກລອບສັງຫານ

5ກໍມີແປດສິບຄົນມາຈາກເມືອງຊີເຄມ, ຊີໂລ ແລະຊາມາເຣຍ. ພວກເຂົາທຸກຄົນແຖໜວດ, ຈີກເຄື່ອງນຸ່ງຫົ່ມຂອງຕົນ ແລະປາດເນື້ອຕົວຕົນເອງ. ພວກເຂົານຳພືດຜົນເປັນເມັດ ແລະເຄື່ອງຫອມມາເພື່ອຈະຖວາຍໃນວິຫານຂອງພຣະເຈົ້າຢາເວ.

6ສະນັ້ນ ອິດຊະມາເອນລູກຊາຍຂອງເນທານີຢາຈຶ່ງອອກຈາກເມືອງມີຊະປາໄປພົບພວກເຂົາ ທັງຮ້ອງໄຫ້ດ້ວຍ. ເມື່ອມາເຖິງພວກເຂົາແລ້ວ ລາວຈຶ່ງເວົ້າວ່າ, “ເຊີນເຂົ້າມາເບິ່ງເກດາລີຢາລູກຊາຍຂອງອາຮີກຳ.”

7ພໍເມື່ອພວກເຂົາໄດ້ເຂົ້າໄປໃນເມືອງແລ້ວ ອິດຊະມາເອນລູກຊາຍຂອງເນທານີຢາແລະຄົນຂອງຕົນກໍຂ້າພວກເຂົາຖິ້ມ ແລະໂຍນຊາກສົບຂອງພວກເຂົາລົງໃນນໍ້າສ້າງ.

8ແຕ່ມີຊາຍສິບຄົນໃນໝວດນັ້ນໄດ້ເວົ້າຕໍ່ອິດຊະມາເອນວ່າ, “ຢ່າສູ່ຂ້າພວກຂ້ານ້ອຍທ້ອນ ພວກຂ້ານ້ອຍມີເຂົ້າບາເລ, ເຂົ້າເດືອຍ, ນໍ້າມັນໝາກກອກເທດ ແລະນໍ້າເຜິ້ງຊຶ່ງພວກຂ້ານ້ອຍໄດ້ເຊື່ອງໄວ້ຢູ່ໃນນາ.” ສະນັ້ນ ລາວຈຶ່ງໄວ້ຊີວິດຄົນເຫຼົ່ານີ້.

9ນໍ້າສ້າງທີ່ອິດຊະມາເອນໂຍນຊາກສົບຂອງຄົນທີ່ລາວໄດ້ຂ້າລົງໄປໃນນັ້ນ ເປັນນໍ້າສ້າງໃຫຍ່ ທີ່ກະສັດອາສາໄດ້ຂຸດຄາວທີ່ເພິ່ນໄດ້ຖືກກະສັດບາອາຊາແຫ່ງອິດສະຣາເອນໂຈມຕີ. ອິດຊະມາເອນລູກຊາຍຂອງເນທານີຢາຈຶ່ງໃຊ້ດິນຖົມນໍ້າສ້າງນີ້ພ້ອມກັບຊາກສົບເຫຼົ່ານີ້.

10ຕໍ່ມາ ລາວໄດ້ເອົາພວກລູກສາວຂອງກະສັດກັບປະຊາຊົນທັງໝົດ ທີ່ເຫຼືອຢູ່ໃນເມືອງມີຊະປາ ຊຶ່ງເນບູຊາຣາດານຜູ້ບັນຊາການທະຫານ ໄດ້ມອບໃຫ້ເກດາລີຢາລູກຊາຍຂອງອາຮີກຳເປັນຜູ້ເບິ່ງແຍງ ໄປເປັນຊະເລີຍເສິກ. ອິດຊະມາເອນໄດ້ຈັບພວກເຂົາໄປເປັນຊະເລີຍ ແລະອອກເດີນທາງມຸ່ງໜ້າໄປສູ່ເຂດແດນອຳໂມນ.

11ໂຢຮານານລູກຊາຍຂອງກາເຣຢາ ແລະຜູ້ນຳຝ່າຍທະຫານທັງໝົດໄດ້ຍິນເຖິງອາດຊະຍາກຳ ທີ່ອິດຊະມາເອນລູກຊາຍຂອງເນທານີຢາໄດ້ກໍ່ຂຶ້ນ.

12ສະນັ້ນ ພວກເຂົາຈຶ່ງຕາມລາວໄປພ້ອມກັບຄົນຂອງພວກຕົນ ແລະໄປທັນລາວໃກ້ສະນໍ້າໃຫຍ່ທີ່ເມືອງກີເບໂອນ.

13ເມື່ອພວກຊະເລີຍຂອງອິດຊະມາເອນເຫັນໂຢຮານານລູກຊາຍຂອງກາເຣຢາ ແລະບັນດາຜູ້ນຳຝ່າຍທະຫານມາກັບລາວ ພວກເຂົາຕ່າງກໍດີໃຈ

14ແລະປະຊາຊົນທັງໝົດທີ່ອິດຊະມາເອນໄດ້ຈັບໄປຈາກເມືອງມີຊະປາກໍໄດ້ຕ່າວຄືນແລະຫັນກັບໄປນຳໂຢຮານານລູກຊາຍຂອງກາເຣຢາ.

15ສ່ວນອິດຊະມາເອນລູກຊາຍຂອງເນທານີຢາແລະຄົນຂອງຕົນແປດຄົນນັ້ນ ຕ່າງກໍປົບໜີຈາກໂຢຮານານໄປສູ່ດິນແດນອຳໂມນ.

16ແລ້ວໂຢຮານານລູກຊາຍຂອງກາເຣຢາແລະບັນດາຜູ້ນຳຝ່າຍທະຫານທີ່ມາກັບຕົນ ກໍກຳກັບເອົາປະຊາຊົນ ທີ່ອິດຊະມາເອນລູກຊາຍຂອງເນທານີຢາໄດ້ຈັບເອົາມາແຕ່ເມືອງມີຊະປາໄປເປັນຊະເລີຍ ຫລັງຈາກທີ່ໄດ້ລອບສັງຫານເກດາລີຢາລູກຊາຍຂອງອາຮີກຳແລ້ວ ຄືພວກທະຫານ, ພວກຜູ້ຍິງ, ພວກເດັກນ້ອຍ ແລະພວກຊາຍກະເທີຍ.

17ພວກເຂົາຢ້ານກົວຊາວບາບີໂລນ ຍ້ອນອິດຊະມາເອນລູກຊາຍຂອງເນທານີຢາໄດ້ລອບສັງຫານເກດາລີຢາລູກຊາຍຂອງອາຮີກຳ ຜູ້ທີ່ກະສັດແຫ່ງບາບີໂລນໄດ້ແຕ່ງຕັ້ງໃຫ້ເປັນຜູ້ສຳເລັດຣາຊການດິນແດນແທນເພິ່ນ. ສະນັ້ນ ພວກເຂົາຈຶ່ງມຸ່ງໜ້າໄປສູ່ປະເທດເອຢິບ ເພື່ອປົບໜີຈາກພວກບາບີໂລນ. ເມື່ອກຳລັງເດີນທາງໄປນັ້ນ ພວກເຂົາໄດ້ຢຸດຢູ່ທີ່ເມືອງກິມຮາມໃກ້ກັບເມືອງເບັດເລເຮັມ.

← Chapter 40 Jump to: Chapter 42 →