Jeremiah 39

Lao Bible 2012 (ພຣະຄຳພີສັກສິ)

← Chapter 38 Jump to: Chapter 40 →

1ກະສັດເນບູກາດເນັດຊາແຫ່ງບາບີໂລນໄດ້ຍົກກອງທັບທັງໝົດຂອງຕົນ ມາໂຈມຕີນະຄອນເຢຣູຊາເລັມໃນເດືອນທີສິບຂອງປີທີເກົ້າ ໃນຣາຊການຂອງກະສັດເຊເດກີຢາແຫ່ງຢູດາຍ.

2ຢູ່ຕໍ່ມາ ໃນວັນທີເກົ້າຂອງເດືອນທີສີ່ໃນຣາຊການປີທີສິບເອັດຂອງກະສັດເຊເດກີຢາ ນະຄອນເຢຣູຊາເລັມກໍແຕກ. (

3ເມື່ອນະຄອນເຢຣູຊາເລັມຖືກຢຶດໄດ້ແລ້ວ ບັນດາເຈົ້ານາຍຊັ້ນຜູ້ໃຫຍ່ຂອງກະສັດແຫ່ງບາບີໂລນ ຄືເນການ-ຊາເຣເຊ, ຊາມກາເນໂບ, ຊາຣະເຊກິມ ແລະເນການ-ຊາເຣເຊ ຄົນອື່ນກໍໄດ້ເຂົ້າມາຕັ້ງກອງບັນຊາການທີ່ປະຕູໃຫຍ່ທາງເຂົ້າເມືອງ.)

4ເມື່ອກະສັດເຊເດກີຢາ ແລະທະຫານທັງໝົດຂອງເພິ່ນ ໄດ້ເຫັນເຫດການເຊັ່ນນັ້ນ ຈຶ່ງພະຍາຍາມປົບໜີອອກຈາກເມືອງໃນເວລາກາງຄືນ. ພວກເຂົາໜີໄປທາງສວນຂອງກະສັດ ໂດຍທາງປະຕູລະຫວ່າງກຳແພງເມືອງທັງສອງ ແລະປົບໜີໄປທາງຮ່ອມພູຈໍແດນ.

5ແຕ່ກອງທັບພວກບາບີໂລນໄດ້ໄລ່ຕາມພວກເຂົາໄປ ແລະຈັບກະສັດເຊເດກີຢາໄດ້ໃນທົ່ງພຽງໃກ້ກັບເມືອງເຢຣິໂກ. ແລ້ວພວກເຂົາກໍນຳເພິ່ນໄປມອບໃຫ້ກະສັດເນບູກາດເນັດຊາແຫ່ງບາບີໂລນ ທີ່ເມືອງຣິບລາໃນເຂດແດນຮາມັດ; ຢູ່ທີ່ນັ້ນ ກະສັດເນບູກາດເນັດຊາໄດ້ພິພາກສາລົງໂທດເພິ່ນ.

6ກະສັດເນບູກາດເນັດຊາໄດ້ປະຫານຊີວິດພວກລູກຊາຍຂອງເຈົ້າເຊເດກີຢາ ຢູ່ທີ່ເມືອງຣິບລາຕໍ່ໜ້າຂອງເຈົ້າເຊເດກີຢາເອງ ແລະເພິ່ນກໍໄດ້ປະຫານບັນດາຂ້າຣາຊການແຫ່ງຢູດາຍເຊັ່ນກັນ.

7ຫລັງຈາກນັ້ນແລ້ວ ເພິ່ນກໍໄດ້ຄວັດໜ່ວຍຕາເຈົ້າເຊເດກີຢາອອກ ແລະເອົາໂສ້ລ່າມເພິ່ນໄວ້ເພື່ອຈະນຳໄປບາບີໂລນ.

8ໃນຂະນະດຽວກັນນັ້ນ ພວກບາບີໂລນກໍໄດ້ຈູດຣາຊວັງແລະເຮືອນຂອງປະຊາຊົນ ພ້ອມທັງກຳແພງນະຄອນເຢຣູຊາເລັມລົງໃຫ້ພິນາດ.

9ໃນທີ່ສຸດ ເນບູຊາຣາດານ ຜູ້ບັນຊາການທະຫານ ກໍຈັບປະຊາຊົນທີ່ເຫຼືອຢູ່ໃນເມືອງລວມທັງຄົນທີ່ໜີເຂົ້າມາມອບຕົວຕໍ່ເພິ່ນ ໄປເປັນຊະເລີຍທີ່ບາບີໂລນ.

10ລາວປະໄວ້ແຕ່ຄົນຍາກຈົນຈຳນວນບໍ່ເທົ່າໃດຄົນ ຄືຜູ້ທີ່ບໍ່ມີຊັບສົມບັດຫຍັງໃນອານາຈັກ ແລະລາວໄດ້ມອບສວນອະງຸ່ນ ແລະໄຮ່ນາໃຫ້ພວກເຂົາເຮັດ.

11ແຕ່ກະສັດເນບູກາດເນັດຊາແຫ່ງບາບີໂລນໄດ້ສົ່ງເນບູຊາຣາດານ ຜູ້ບັນຊາການທະຫານໃຫ້ຈັດການດັ່ງນີ້:

12“ຈົ່ງແຕ່ງຄົນໄປຊອກຫາເຢເຣມີຢາ ແລະເບິ່ງແຍງລາວໃຫ້ດີ. ຢ່າທຳຮ້າຍລາວ ແຕ່ຈົ່ງຊ່ວຍເຫລືອລາວຕາມທີ່ລາວຕ້ອງການ.”

13ດັ່ງນັ້ນ ເນບູຊາຣາດານພ້ອມດ້ວຍເຈົ້ານາຍຊັ້ນຜູ້ໃຫຍ່ສອງຄົນ ຄືເນບູຊັດບານ ແລະເນການ-ຊາເຣເຊ ພ້ອມກັບເຈົ້ານາຍຄົນອື່ນໆອີກຂອງກະສັດແຫ່ງບາບີໂລນ

14ຈຶ່ງໄດ້ນຳຂ້າພະເຈົ້າມາຈາກເດີ່ນຂອງຣາຊວັງ. ພວກເຂົາໄດ້ມອບຂ້າພະເຈົ້າໄວ້ຢູ່ໃຕ້ຄວາມເບິ່ງແຍງຂອງເກດາລີຢາລູກຊາຍຂອງອາຮີກຳ ແລະຫລານຊາຍຂອງຊາຟານ ແລະໃຫ້ນຳຂ້າພະເຈົ້າເມືອເຖິງເຮືອນຂອງຂ້າພະເຈົ້າຢ່າງປອດໄພ. ດັ່ງນັ້ນ ຂ້າພະເຈົ້າຈຶ່ງໄດ້ຢູ່ນຳປະຊາຊົນໃນທີ່ນັ້ນ.

15ໃນຂະນະທີ່ຂ້າພະເຈົ້າໄດ້ຖືກຄວບຄຸມຕົວຢູ່ທີ່ເດີ່ນຂອງຣາຊວັງນີ້ ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ,

16“ໃຫ້ບອກເອເບັດເມເຫລັກ ຊາວເອທີໂອເປຍວ່າ, ‘ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ພຣະເຈົ້າຂອງຊາດອິດສະຣາເອນໄດ້ກ່າວວ່າ ເຮົາຈະນຳຄວາມຈິບຫາຍມາສູ່ເມືອງນີ້ຕາມທີ່ເຮົາໄດ້ກ່າວໄວ້ ແຕ່ບໍ່ແມ່ນຄວາມຈະເລີນຮຸ່ງເຮືອງ. ເມື່ອເຫດການນີ້ເກີດຂຶ້ນ ເຈົ້າຈະຢູ່ທີ່ນັ້ນເພື່ອເບິ່ງເຫດການນັ້ນ.

17ພຣະເຈົ້າຢາເວກ່າວວ່າ, ແຕ່ເຮົາຈະປົກປ້ອງຄຸ້ມຄອງເຈົ້າ ແລະເຈົ້າຈະບໍ່ຖືກມອບໃຫ້ແກ່ຄົນທີ່ເຈົ້າຢ້ານກົວ.

18ເຮົາຈະຮັກສາເຈົ້າໃຫ້ປອດໄພ ແລະເຈົ້າກໍຈະບໍ່ຖືກຂ້າ. ເຈົ້າຈະປົບໜີເອົາຊີວິດລອດ ເພາະເຈົ້າໄວ້ວາງໃຈໃນເຮົາ. ພຣະເຈົ້າຢາເວກ່າວດັ່ງນັ້ນແຫຼະ.”’

← Chapter 38 Jump to: Chapter 40 →