Jeremiah 19

Lao Bible 2012 (ພຣະຄຳພີສັກສິ)

← Chapter 18 Jump to: Chapter 20 →

1ພຣະເຈົ້າຢາເວໄດ້ບອກຂ້າພະເຈົ້າໃຫ້ໄປຊື້ເອົາໝໍ້ດິນໜ່ວຍໜຶ່ງ. ພຣະອົງຍັງບອກຂ້າພະເຈົ້າໃຫ້ເອົາພວກເຖົ້າແກ່ຂອງປະຊາຊົນ ພ້ອມທັງພວກປະໂຣຫິດຜູ້ອາວຸໂສບາງຄົນ

2ອອກໄປທາງປະຕູເມືອງທີ່ຊື່ວ່າ ກອງເສດເຫລືອໝໍ້ທີ່ຮ່ອມພູຮິນໂນມ. ໃນທີ່ນັ້ນ ຂ້າພະເຈົ້າຕ້ອງປະກາດພຣະທຳທີ່ພຣະອົງຈະໄດ້ມອບໃຫ້ຂ້າພະເຈົ້າ.

3ແລະຈົ່ງກ່າວວ່າ, “ບັນດາກະສັດແຫ່ງຢູດາຍ ແລະຊາວນະຄອນເຢຣູຊາເລັມເອີຍ ຈົ່ງຟັງຖ້ອຍຄຳຂອງພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ພຣະເຈົ້າຂອງຊາດອິດສະຣາເອນກ່າວດັ່ງນີ້ວ່າ, ເຮົາກຳລັງຈະນຳໄພພິບັດດັ່ງກ່າວນັ້ນມາສູ່ບ່ອນນີ້ ຊຶ່ງທຸກຄົນທີ່ໄດ້ຍິນແລ້ວກໍຈະງົງ.

4ເຮົາຈະເຮັດຢ່າງນີ້ກໍເພາະວ່າປະຊາຊົນໄດ້ປະຖິ້ມເຮົາ ແລະເຮັດໃຫ້ສະຖານທີ່ນີ້ເປັນມົນທິນ ໂດຍການເຜົາເຄື່ອງບູຊາຖວາຍແກ່ພະອື່ນ ຄືບັນດາພະທີ່ພວກເຂົາເອງແລະບັນພະບຸລຸດຂອງພວກເຂົາ ຕະຫລອດທັງກະສັດແຫ່ງຢູດາຍບໍ່ເຄີຍຮູ້ຈັກມາກ່ອນ. ພວກເຂົາໄດ້ເຮັດໃຫ້ບ່ອນນີ້ເປິເປື້ອນ ເຕັມໄປດ້ວຍເລືອດຂອງຄົນບໍ່ມີຄວາມຜິດ

5ແລະພວກເຂົາໄດ້ສ້າງແທ່ນບູຊາໃຫ້ພະບາອານ ເພື່ອເຜົາລູກໆຂອງພວກເຂົາໃຫ້ເປັນເຄື່ອງບູຊາ. ເຮົາບໍ່ເຄີຍສັ່ງພວກເຂົາໃຫ້ເຮັດເຊັ່ນນີ້; ເລື່ອງດັ່ງນີ້ບໍ່ເຄີຍມີຢູ່ໃນຄວາມຄິດຂອງເຮົາເລີຍ.

6ພຣະເຈົ້າຢາເວກ່າວວ່າ ສະນັ້ນ ເມື່ອເວລາມາເຖິງບ່ອນນີ້ຈະບໍ່ມີຜູ້ໃດເອີ້ນວ່າໂຕເຟັດ ຫລືຮ່ອມພູຮິນໂນມອີກຕໍ່ໄປ, ແຕ່ຄົນຈະເອີ້ນບ່ອນນັ້ນວ່າ ຮ່ອມພູແຫ່ງການຂ້າຟັນກັນ.

7ເພາະໃນບ່ອນນີ້ເຮົາຈະທຳລາຍແຜນການທັງປວງຂອງຊາວຢູດາແລະຊາວນະຄອນເຢຣູຊາເລັມ. ເຮົາຈະໃຫ້ເຫຼົ່າສັດຕູຊະນະພວກເຂົາ ແລະສັງຫານພວກເຂົາໃນສະໜາມຮົບ. ເຮົາຈະໃຫ້ຝູງນົກແລະຝູງສັດປ່າໄດ້ກິນຊາກສົບຂອງພວກເຂົາເປັນອາຫານ.

8ເຮົາຈະນຳໄພພິບັດອັນໜ້າຢ້ານເຊັ່ນນີ້ມາສູ່ນະຄອນນີ້ ຊຶ່ງທຸກຄົນທີ່ຜ່ານກາຍໄປມາຈະສະທ້ານຢ້ານກົວແລະປະຫລາດໃຈ.

9ສັດຕູຈະປິດລ້ອມເມືອງ ແລະພະຍາຍາມຂ້າຊາວເມືອງຖິ້ມ. ການປິດລ້ອມເມືອງຈະເປັນການໜ້າຢ້ານກົວທີ່ສຸດ ຈົນຊາວເມືອງຈະກິນກັນເອງ ແລະກິນແມ່ນແຕ່ລູກຂອງຕົນເອງ.”

10ແລ້ວພຣະອົງກໍບອກຂ້າພະເຈົ້າ ໃຫ້ທຸບໝໍ້ຕໍ່ໜ້າພວກທີ່ມາກັບຂ້າພະເຈົ້າ

11ໂດຍໃຫ້ບອກວ່າ, “ພຣະເຈົ້າຢາເວໄດ້ກ່າວດັ່ງນີ້: ເຮົາຈະທຸບຕີປະຊາຊົນພ້ອມນະຄອນນີ້ໃຫ້ແຕກ ດັ່ງໄດ້ທຸບໝໍ້ດິນໜ່ວຍນີ້ທີ່ຈອດເຂົ້າກັນບໍ່ໄດ້ອີກ. ປະຊາຊົນຈະຝັງຊາກສົບຂອງຄົນຕາຍໄວ້ ແມ່ນແຕ່ໃນໂຕເຟັດຍ້ອນໃນທີ່ອື່ນບໍ່ມີບ່ອນຝັງ.

12ພຣະເຈົ້າຢາເວກ່າວວ່າ: ເຮົາສັນຍາວ່າ ເຮົາຈະເຮັດໃຫ້ນະຄອນ ແລະປະຊາຊົນໃນເມືອງນີ້ເປັນດັ່ງໂຕເຟັດ.

13ເຮືອນຢູ່ໃນນະຄອນເຢຣູຊາເລັມ, ຫໍໂຮງຕ່າງໆຂອງກະສັດແຫ່ງຢູດາຍ ແລະບ້ານເຮືອນຂອງທຸກຄົນທີ່ເຜົາເຄື່ອງຫອມບູຊາຕາເວັນ, ເດືອນ, ດວງດາວ ແລະຖອກເຫຼົ້າອະງຸ່ນຖວາຍໃຫ້ບັນດາພະອື່ນ ຈະເປັນມົນທິນດັ່ງໂຕເຟັດ.”

14ແລ້ວຂ້າພະເຈົ້າກໍອອກໄປຈາກໂຕເຟັດ ບ່ອນທີ່ພຣະເຈົ້າຢາເວໄດ້ໃຊ້ຂ້າພະເຈົ້າໄປປະກາດຖ້ອຍຄຳຂອງພຣະອົງ. ຂ້າພະເຈົ້າໄດ້ໄປຢືນຢູ່ທີ່ເດີ່ນຂອງວິຫານຂອງພຣະເຈົ້າຢາເວ

15ແລະບອກໃຫ້ປະຊາຊົນທັງໝົດຮູ້ວ່າ ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ພຣະເຈົ້າຂອງຊາດອິດສະຣາເອນໄດ້ກ່າວດັ່ງນີ້ວ່າ, “ເຮົາກຳລັງຈະນຳໂທດກຳທີ່ເຮົາໄດ້ກ່າວນັ້ນ ມາສູ່ນະຄອນນີ້ແລະເມືອງໃກ້ຄຽງທັງໝົດດ້ວຍ ເພາະພວກເຈົ້າດື້ດ້ານແລະບໍ່ຍອມຟັງຖ້ອຍຄຳຂອງເຮົາ.”

← Chapter 18 Jump to: Chapter 20 →