Genesis 14

Kirundi (Bibliya Yera 1951, 1967 (Burundi))

← Chapter 13 Jump to: Chapter 15 →

1Mu gihe ca Amurafeli umwami w’i Shinari, na Ariyoki umwami w’i Elasari, na Kedolawoma umwami w’i Elamu, na Tidali umwami w’i Goyimu,

2abo bami bāteye Bera umwami w’i Sodomu na Birusha umwami w’i Gomora, na Shinabu umwami w’i Adima, na Shemeberi umwami w’i Seboyimu, n’umwami w’i Bela (ari ho Sowari).

3Abo bose bakoranira hamwe mu kiyaya c’i Sidimu (ni ho habaye Ikiyaga c’ Umunyu).

4Bari bamaze imyaka cumi n’ibiri baganzwa na Kedolawoma, maze mu mwaka ugira icumi na gatatu baragarariza.

5Nuko mu mwaka ugira icumi na kane Kedolawoma n’abami bīfatanije na we ni kwo kuza, bazingazingira Abarefa muri Ashiteroti‐karunayimu, n’Abasuzi i Hamu, n’Abemi i Shave‐kiriyatayimu,

6n’Abahori babazingazingira i wabo mu mugamba i Seyiri, barabakinagiza babashitsa Eliparani hahereranye n’ubugaragwa.

7Barakevya, bashika Eni‐mishipati (ari h’i Kadeshi), bazingazinga igihugu cose c’Abamaleki, bo n’ Abamori baba i Hasasoni‐tamari.

8Maz’ umwami w’i Sodomu arashikuka, bo n’uw’i Gomora n’uw’i Adima n’uw’i Seboyimu n’uw’i Bela (ari ho Sowari); batondera urugamba mu kiyaya c’i Sidimu;

9barwanya Kedolawoma umwami w’i Elamu, na Tidali umwami w’i Goyimu, na Amurafeli umwami w’i Shinari, na Ariyoki umwami w’i Elasari; abo bami ukw ari bane barwanya batanu.

10Kand’ ico kiyaya c’i Sidimu cari cuzuye ivyobo vyimbgemwo kaburimbi, maz’ ingabo z’abami b’i Sodomu n’i Gomora zirahunga, zimwe zibikorokeramwo, izisigaye zihungira ku musozi muremure.

11Basahura ibintu vyose vy’i Sodomu n’i Gomora, n’ivyo bāzigak’ uburamuko vyose, barīgīra.

12Bahitana na Loti umuhungwabo wa Aburamu, yaba i Sodomu, hamwe n’ibintu vyiwe, baraheza barīgīra.

13Haza umwe mu bahunze, abibarira Aburamu Umuheburayo: yaba i ruhande y’ibiti vy’imyeloni vy’Umwamori yitwa Mamure, mwene wabo wa Eshikoli na Aneri; kand’ abo bari bifatanije na Aburamu.

14Aburamu yumvise yuk’ uw’ i wabo yafashwe mpiri, ajana abanyarugo biwe bize kurwana, bāvukiye i we, amajana atatu n’icumi n’umunani, barabakurikira, babahambiriza i Dani.

15Aburamu ahenga mw ijoro, abantu biwe abacamw’ ibico, barabatera barabanesha, barabakinagiza gushitsa i Hoba, ahahera i bumoso bg’i Damasiko.

16Agarura ibintu vyose, agarura n’uw’i wabo Loti, n’ibintu vyiwe, n’abagore n’abakobga na bo, n’abandi bantu.

17Atabarutse, avuye kunesha Kedolawoma n’abandi bami bāri kumwe, umwami w’i Sodomu amusanganirira mu kiyaya c’i Shave, (ni co kiyaya c’umwami).

18Kandi Melekisedeki umwami w’i Salemu, umuherezi w’Imana Isumba vyose, azana imitsima na vino.

19Ahezagira Aburamu, at’ Uragahabga umugisha n’Imana Isumba vyose, Nyen’ ijuru n’isi:

20kand’ Imana Isumba vyose iragahezagirwa, yagushize abansi mu maboko! Nuko Aburamu amuha ikigiracumi muri vyose.

21Umwami w’i Sodomu abarira Aburamu, ati Ndekerana abantu, ibintu ubitware.

22Aburamu yishura umwami w’i Sodomu, ati Narahiye Uhoraho mmanitse ukuboko, ni we Mana Isumba vyose, Nyen’ ijuru n’isi,

23yuko ntazogira ikintu na kimwe co mu vyawe ntwara, naho koba akanyuzi cank’ akagozi k’inkweto, kugira ngo ntuz’ uvuge, uti Ni jewe natungishije Aburamu.

24Jeho nta co ngomba, atar’ impamba abantu banje bariye, n’abo twatabaranye ubagabanganye imigabane yabo, ni bo Aneri na Eshikoli na Mamure, bo ni bajane imigabane yabo.

← Chapter 13 Jump to: Chapter 15 →