Genesis 46

Kirundi (Bibliya Yera 1951, 1967 (Burundi))

← Chapter 45 Jump to: Chapter 47 →

1Nuko Isirayeli afata urugendo, arajonjora n’utwiwe twose, ashika i Beri‐sheba, aha Imana ibimazi arabikerera, Imana ya se Isaka.

2Maze mw ijoro Imana ihamagara Isirayeli ari nko mu nzozi, iti Yakobo we! ewe Yakobo! Aritaba, ati Sabge!

3Iramubarira, iti Nd’Imana, Imana ya so; ntutinye kumanuka muri Egiputa, kukw ari ho nzoguhindurira ihanga rikomeye.

4Jewe ubganje nzomanukana nawe muri Egiputa, kandi ni jewe nzogukūrayo; kandi Yosefu ni we azohwamikira ingohe ku maso yawe igihe uzopfa.

5Yakobo arahaguruka, ava i Beri‐sheba: bene Isirayeli bajana se Yakobo n’abana babo bato n’ abagore babo muri ya mikogote ikwegwa n’amafarasi Farawo yarungitse kumwimura.

6Yakobo bo n’uruvyaro rwiwe rwose baja muri Egiputa, bajanye ibiyevera vyabo n’ibintu vyabo baronkeye mu gihugu c’i Kanani;

7ashikana muri Egiputa n’abahungu biwe n’abuzukuru biwe b’abahungu, n’ abakobga biwe n’abuzukuru biwe b’abakobga, n’uruvyaro rwiwe rwose.

8Aya ni yo mazina y’Abisirayeli bagiye muri Egiputa, ni we Yakobo n’abana biwe. Imfura yiwe ni Reyubeni;

9bene Reyubeni ni Henoki, na Palu, na Hesironi, na Karumi.

10Bene Simeyoni ni Yemuweli, na Yamini, na Ohadi, na Yakini, na Sohari, bo na Sauli umwana yavyaye ku Munyakananikazi.

11Bene Lewi ni Gerushoni na Kohati na Merari.

12Bene Yuda ni Eri, na Onani, na Shela, na Peresi na Zera: ariko Eri na Onani bapfiriye mu gihugu c’i Kanani. Bene Peresi ni Hesironi na Hamuli.

13Bene Isakari ni Tola, na Puva, na Yobu, na Shimuroni.

14Bene Zebuloni ni Seredi na Eloni na Yakileli.

15Abo ni bo bamutse ku bo Leya yavyaranye na Yakobo bakir’ i Padan‐aramu, bavyara n’umukobga yitwa Dina: nukw abana biwe bose b’abahungu n’abakobga ni mirongwitatu na batatu.

16Bene Gadi ni Sifiyoni, na Hagi, na Shuni, na Esiboni, na Eri, na Arodi, na Areli.

17Bene Asheri ni Imuna, na Ishiva, na Ishivi, na Beriya, na mushiki wabo Sera; bene Beriya ni Heberi na Malukiyeli.

18Abo ni bo bamutse ku bo Zilupa yavyaranye na Yakobo, Zilupa ari we Labani yahaye Leya umukobga wiwe kumucorekera: n’ icumi na batandatu.

19Bene Rakeli muka Yakobo, ni Yosefu na Benyamini.

20Yosefu yavyaye Manase na Efurayimu, ari mu gihugu ca Egiputa, abavyara kuri Asenati umukobga wa Potifera, umuherezi wo mu gisagara Oni.

21Bene Benyamini ni Bela, na Bekeri, na Ashibeli, na Gera, na Namani, na Ehi, na Roshi, na Mupimu, na Hupimu, na Arudi.

22Abo ni bo bamutse ku bo Rakeli yavyaranye na Yakobo: bose n’ icumi na bane.

23Mwene Dani ni Hushimu.

24Bene Nafutali ni Yakiseli, na Guni, na Yeseri, na Shilemu.

25Abo ni bo bamutse ku bo Biluha yavyaranye na Yakobo, Biluha ari we Labani yahaye Rakeli umukobga wiwe kumucorekera: bose n’ indwi.

26Abantu bose bajanye na Yakobo muri Egiputa, bakomōtse kuri we, udashizemw’ abakazana biwe, bose na bose bari mirongwitandatu na batandatu.

27Abahungu Yosefu yavyaye ari muri Egiputa ni babiri; nukw abantu bose b’inzu ya Yakobo bagiye muri Egiputa bari mirongwirindwi.

28Yakobo atuma Yuda ngw amwītangire imbere aje kwa Yosefu, ngw amurangire inzira ija i Gosheni: nuko bashika mu gihugu c’i Gosheni.

29Yosefu azirikisha umukogote wiwe ku mafarasi, adūga i Gosheni ngw asanganire se Isirayeli; aramwibarira, amugwa mw izosi, aririra kw izosi ryiwe umwanya munini.

30Isirayeli abarira Yosefu, ati Ni vyo bizi, naho nopfa, ko nkubonye ukiriho!

31Maze Yosefu abarira bakuru be n’ab’i wabo, ati Ngiye kubgira Farawo yuko bakuru banje n’ab’i wacu bahora mu gihugu c’i Kanani bashitse ino,

32kandi kw ar’ abama baragira, kukw ar’ abanyenka; kandi ko bazanye imikuku yabo n’amasho yabo, n’ivyo bafise vyose.

33Nuko Farawo ni yabahamagaza, akababaza,

34at’ Umwuga wanyu n’umuki? muze mumwishure, mut’ Abasavyi bawe tur’ abanyenka, guhera mu buto bgacu kugeza n’ubu, twebge ubgacu uhereye no kuri ba sogokuruza. Muvuge murtyo kugira ngo mugerērwe mu gihugu c’i Gosheni, kuk’ ūragira wese ar’ umunenwa ku Banyegiputa.

← Chapter 45 Jump to: Chapter 47 →