Genesis 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Uhoraho agendera Sara nk’ uko yavuze, kand’ amugirira nk’uko yamubariye.

2Sara asama inda, avyarana na Aburahamu umuhungu mu butāma bgiwe, mu gihe cāshinzwe, kimwe Imana yari yaramubariye nyene.

3Umwana Aburahamu yavyaye amwita Isaka, uwo yavyaranye na Sara.

4Aburahamu akeba Isaka umwana wiwe amaze imisi munani avutse, nk’ ukw Imana yamubariye.

5Aburahamu yar’ amaze imyaka ijana igihe yavyara umwana wiwe Isaka.

6Sara aravuga, at’ Imana irantwengeje; kand’ abazovyumva bose bizobatwenza nkanje.

7Ati Har’ uwogize ico abarira Aburahamu, ngo Sara azokwonsa abana? yamar’ amvyayek’ umwana w’umuhungu mu butāma bgiwe.

8Umwana arakura, aracuka; ku musi Isaka yacutseko Aburahamu atumirira abantu benshi amazimano.

9Maze Sara abona wa mwana wa Hagari Umunyegiputakazi, uwo yavyaranye na Aburahamu, arikw aratwenga.

10Bituma abarira Aburahamu, at’ Irukana iyi ncoreke n’umwana wayo, kuk’ umwana w’iyi ncoreke atazoraganwa n’umwana wanje Isaka.

11Aburahamu ababazwa cane n’ ivy’ uwo mwana wiwe.

12Imana ibarira Aburahamu, iti Reka kubabazwa n’ivy’ uwo mwana n’incoreke yawe: ivyo Sara akubariye vyose n’uvyemere: kuko kuri Isaka ari ho uruvyaro rwawe ruzokwītīrirwa.

13Kandi n’uwo mwana nyene w’iyo ncoreke nzomuhindura ihanga, kuko na we ar’ ubura bgawe.

14Aburahamu akoroka kare, yābīra impamba n’ umukuza w’urusato wuzuye amazi, abitekerera Hagari, abishira ku rutugu rwiwe, amuha n’uwo mwana, aramwirukana; aragenda, azimagirika mu bugaragwa bg’i Beri‐sheba.

15Amazi yari muri wa mukuza arashira; arambika umwana musi y’igisaka caho.

16Aragenda, yicara amutumbereye amwitanguye, nk’ahoraswa umwampi; kuko yari yibgiye, ati Noye kurāba ipfa ry’ umwana wanje. Nuko yicara amutumbereye, araturika ararira.

17Imana yumva ijwi ry’uwo muhungu; maz’ umumarayika w’ Imana ari mw ijuru, ahamagara Hagari, aramubaza, at’ Ubaye iki ga Hagari? Nta co utinya! kukw Imana yumvise ijwi ry’uwo muhungu ah’aryamye.

18Va hasi, uvyure uwo muhungu, umuramire mu maboko, kuko nzomuhindura ihanga rikomeye.

19Imana ihumūra amaso yiwe, abona iriba ry’amazi; aragenda, yuzuza wa mukuza amazi, aramiza uwo muhungu.

20Nukw Imana ibana n’uwo muhungu, arakura; agerēra mu bugaragwa, aba umurashi.

21Aba mu bugaragwa bg’i Parani; nyina amusabira umugeni mu gihugu ca Egiputa.

22Mur’ iyo misi, Abimeleki azanana na Fikoli umugabisha w’ ingabo ziwe, abarira Aburahamu, at’ Imana iri kumwe nawe mu vyo ukora vyose;

23none rer’ enda n’undahirire Imana aha nyene yuk’ utazongunga, cank’ umwana wanje, cank’ umwuzukuru wanje: ariko k’uzonyishura ivyiza, twe n’iki gihugu wabayemw’ ur’ inyambukīra, nk’uko nabikugiriye nanje.

24Aburahamu aramwishura, ati Ndarahira.

25Maze Aburahamu ahishuka Abimeleki ku vy’iriba ry’amazi abantu ba Abimeleki bamunyaze ku manyama.

26Abimeleki aramwishura, at’ Ivyo sinzi uwabikoze, kandi nawe ntiwigeze kubimbgira, kandi sinigeze no kuvyumva, atar’ uyu musi.

27Nuko Aburahamu yābīra intama n’inka, abiha Abimeleki; bompi bacana amatigu.

28Aburahamu arobanura imyagazi y’intama ndwi ivyara yo mu mukuku wiwe.

29Abimeleki abaza Aburahamu, ati Mbeg’ iyo myagazi ndwi urobanuye, bisobanurwa ngw iki?

30Aramwishura, at’ Enda nyakīrira iyi myagazi ndwi ntanze, kugira ngo bimbere icabona yukw ari jewe nimbishije iri riba.

31Ni co catumye yita aho hantu Beri‐sheba, kukw ari ho barahiriye bompi.

32Uko ni ko bācaniye amatigu i Beri‐sheba: maze Abimeleki arahaguruka, bo na Fikoli umugabisha w’ingabo ziwe, basubira mu gihugu c’i Bufilisitiya.

33Aburahamu atera igiti citwa umwesheri i Beri‐sheba, yambarizay’ izina ry’Uhoraho, Imana ihoraho.

34Aburahamu amara imisi myinshi ar’ inyambukīra mu gihugu c’i Bufilisitiya.

← Chapter 20 Jump to: Chapter 22 →