Genesis 28

Kirundi (Bibliya Yera 1951, 1967 (Burundi))

← Chapter 27 Jump to: Chapter 29 →

1Nuko Isaka ahamagara Yakobo, aramuhezagira, aramwihanikiriza, ati Ntuz’ usabe Umunyakananikazi.

2Va hasi, uje i Padan‐aramu kwa Betuweli sogokuru; uz’ usabey’ umugeni mu bakobga ba Labani nyokorome.

3Kand’ Imana Ishobora vyose iguhe umugisha, iguhe kurondoka, ikugwize, kugira ng’uhindukemw’ isinzi ry’amahanga.

4Kand’ iguhe umugisha yahaye Aburahamu, wewe n’uruvyaro rwawe na rwo, kugira ngo wegukire iki gihugu wabayemwo kitār’ icanyu, ico Imana yemereye guha Aburahamu.

5Nuko Isaka arungika Yakobo: aragenda, aja i Padan‐aramu kwa Labani mwene Betuweli Umwaramu, musaza wa Rebeka, nyina wa Yakobo na Esau.

6Maze Esau abona yuko Isaka ahezagiye Yakobo, akamurungika i Padan‐aramu gusabay’ umugeni; kandi ko yamwihanikirije akimuhezagira, ati Ntuz’ usabe Umunyakananikazi;

7kandi ko Yakobo yumviye se na nyina, akaja i Padan‐aramu.

8Nuko Esau abonye yukw Abanyakananikazi batanezereye se wiwe Isaka,

9aca aja kwa Ishimayeli, asabayo Mahalati mushiki wa Nebayoti, umukobga wa Ishimayeli, Ishimayeli mwene Aburahamu, amuharika ba bagore yar’asanganywe.

10Yakobo ava i Beri‐sheba, agenda atumbereye i Harani.

11Ashika ahantu araharāra, kukw izuba ryari ricokeye: yābīra ibuye mu mabuye yaho, araryisegura, aryama aho hantu arasinzira.

12Ararota, abona icuririzo gishinzwe hasi, umutwe waco ugashika mw ijuru: abona abamarayika b’ Imana bakidūgako, bakimanukako.

13Kand’ Uhoraho yar’ ahagaze hejuru yaco, aramubarira, ati Nd’ Uhoraho, Imana ya Aburahamu sogokuru, Imana ya Isaka: iki gihugu uryamyemwo, nzokiguha, mwe n’uruvyaro rwawe;

14kand’ uruvyaro rwawe ruzongana n’umukungugu wo hasi, ruzogasāra i burengerazuba n’i burasirazuba n’i burārūko n’i bumanuko: kandi muri wewe no mu ruvyaro rwawe ni ho imiryango yose yo mw isi izohērwa umugisha.

15Kand’ ehe rāba ndi kumwe nawe, nzokuzigamira ah’uzoja hose, kandi nzokugarukana mur’ iki gihugu; kuko ntazokureka ntarakora ivyo nkubariye.

16Yakobo arikangura, aravuga, ati N’ukuri Uhoraho ar’ aha hantu; nanje sinari ndabizi.

17Aratinya, aravuga, at’ Ereg’ aha hantu hateye ubgoba! At’ Aha n’inzu y’Imana s’ikindi, aha ni ho rembo ry’ijuru.

18Yakobo azinduka kare mu gatondo, yābīra rya buye yiseguye, ararishinga ngo ribe inkingi, arisukakw amavuta ya elayo.

19Aho hantu aca ahita Beteli, arik’ ubga mbere ico gisagara citwa Luzi.

20Yakobo asezerana isezerano, at’ Imana ni yabana nanje, ikanzigamira mur’ uru rugendo ndimwo, ikampa ivyo kurya n’ivyo kwambara,

21nkazogaruka kwa data nkir’ amahoro, Uhoraho azoba Imana yanje,

22n’iri buye nshinze kw inkingi rizoba inzu y’ Imana: ati Kandi ku vy’uzohora umpa vyose, sinzobura kuguhamw’ ikigiracumi.

← Chapter 27 Jump to: Chapter 29 →