Genesis 50

Kirundi (Bibliya Yera 1951, 1967 (Burundi))

← Chapter 49 Jump to:

1Yosefu yubama kuri se mu maso, amuririrako, aramugūmbīra.

2Yosefu agera abantu biwe b’abaganga ngo bose se: nukw abo baganga bosa Isirayeli.

3Bamara imisi mirongwine bamwosa, uko ni kw imisi yo kwosa ingana: Abanyegiputa bamara imisi mirongwirindwi bamugandariye.

4Imisi y’ikigandaro ishize, Yosefu abarira abo mu rugo rwa Farawo, ati Ni mwaba mumbabaye, ndabasavye mumbaririre Farawo,

5muti Se yaramurahije, at’ Ehe ngiye gupfa: uz’ umpambe mu cobo niyimbiye mu gihugu c’i Kanani. None mut’ Aragusavye, umurekure adūge, ahambe se, aheze agaruke.

6Nuko Farawo aramwishura, ati Dūga, ugende uhambe so, nk’uko yakurahije.

7Nuko Yosefu aradūga, aja guhamba se; abagendanyi ba Farawo bose, n’abakuru bo mu rugo rwiwe, n’abakuru bose bo mu gihugu ca Egiputa, baramuherekeza,

8bo n’abo kwa Yosefu bose, na bene se, n’abo kwa se: ivyo basize gusa mu gihugu c’i Gosheni n’abana babo bato, n’ imikuku yabo, n’amasho yabo.

9Ajana n’imikogote y’intambara n’ abagendera ku mafarasi: bagenda ar’ igugu rinini cane.

10Bashika ku mbuga y’igosorero yo muri Atadi, hāri hakurya ya Yorodani: baborogeray’ amaborogo menshi cane y’akabonge: Yosefu ashinga ko bahamara imisi ndwi bagandariye se.

11Ben’ igihugu b’Abanyakanani babonye ingene baririra ku mbuga yo muri Atadi, baravuga, bat’ Ehe kugandara kw’Abanyegiputa kw’ igitangaza! Ni co catumye bahita Abeli‐misirayimu; hāri hakurya ya Yorodani.

12Bene Yakobo bamugirira uko yabageze:

13bamujana mu gihugu c’i Kanani, bamuhamba mw isenga yo mw itongo ry’i Makipela, aharābana n’i Mamure, iyo Aburahamu yaguze hamwe n’iryo tongo, kuba aho yīzīziye ho guhamba, ahaguze na Efuroni Umuheti.

14Yosefu amaze guhamba se, asubirana muri Egiputa na bene se n’abandi bose bajanye na we kuja guhamba se.

15Bene se ba Yosefu babonye ko se apfuye, baravugana, bati Kumbure Yosefu azotwanka, adusubirize mu nkōko ibihwanye n’ibibi vyose twamukoreye.

16Batuma kuri Yosefu, bati Data atarapfa yaratubariye,

17ati Muze mubgire Yosefu, mut’ Arakwinginze, harira bakuru bawe igicumuro cabo n’icaha cabo, kuko bakugiriye nabi. Nuko none turakwinginze, uduharire twebge abashumba b’Imana ya data igicumuro cacu. Yosefu yumvise amajambo yabo, aca ararira.

18Maze bene se batako bariyizira, bamwitembagaza imbere, baramubgira, bati Rāba, tur’ abasavyi bawe!

19Yosefu arababarira, ati Nta co mutinya! Mbega jewe ndi mu gishingo c’Imana?

20Kubganyu mwagabiye kungirira nabi, arikw Imana yo yagabiye kubizanisha ivyiza, kugira ngw ishitse ibiriho mur’ iyi misi, ikize abantu benshi, boye gupfa.

21None rero mureke gutinya: nzobaha ivyo kubatunga, mwe n’abana banyu. Nukw arabaremēsha, ababarira neza.

22Yosefu aba muri Egiputa, bo n’inzu ya se. Yosefu amara imyaka ijana n’icumi;

23yibonera abuzukuru ba Efurayimu; n’abana ba Makiri mwene Manase abahindura abana biwe.

24Yosefu abarira ab’i wabo, ati Ndi hafi gupfa; arikw Imana ntizobura kubagendera, ikabakūra mur’ iki gihugu, ikabajana mu gihugu yarahiye Aburahamu na Isaka na Yakobo kw izobaha.

25Yosefu arahiza Abisirayeli, at’ Imana ntizobura kubagendera, namwe muze mukūre amagufa yanje ino, muyadūgane.

26Nuko Yosefu ahwera amaze imyaka ijana n’icumi: baramwosa, bamubīka mw isandugu yo kumuhambamwo, aho nyene muri Egiputa.

← Chapter 49 Jump to: