2 Chronicles 10

Lao Bible 2012 (ພຣະຄຳພີສັກສິ)

← Chapter 9 Jump to: Chapter 11 →

1ເຣໂຫໂບອາມໄດ້ໄປເມືອງຊີເຄມ ບ່ອນທີ່ປະຊາຊົນທັງໝົດທາງພາກເໜືອຂອງອິດສະຣາເອນ ໄດ້ມາເຕົ້າໂຮມກັນເພື່ອແຕ່ງຕັ້ງລາວໃຫ້ເປັນກະສັດ.

2ເມື່ອເຢໂຣໂບອາມລູກຊາຍຂອງເນບັດ ຜູ້ໄດ້ປົບໜີຈາກກະສັດໂຊໂລໂມນໄປຢູ່ປະເທດເອຢິບໄດ້ຍິນຂ່າວດັ່ງນີ້ ລາວກໍກັບຄືນມາປະເທດ.

3ປະຊາຊົນເຜົ່າທາງພາກເໜືອໄດ້ສົ່ງຄົນມາຫາລາວ ແລະພວກເຂົາທັງໝົດໄດ້ໄປຫາເຣໂຫໂບອາມ ແລະເວົ້າຕໍ່ເພິ່ນວ່າ,

4“ພໍ່ຂອງທ່ານໄດ້ໃຫ້ພວກເຮົາແບກຫາບພາລະໜັກໂພດ. ຖ້າທ່ານຊ່ວຍບັນເທົາພາລະນີ້ໃຫ້ເບົາລົງ ແລະເຮັດໃຫ້ພວກເຮົາສະດວກສະບາຍຂຶ້ນ ພວກເຮົາກໍຈະເປັນປະຊາຊົນທີ່ສັດຊື່ຂອງທ່ານ.”

5ກະສັດເຣໂຫໂບອາມຕອບວ່າ, “ໃຫ້ເຮົາພິຈາລະນາເບິ່ງເລື່ອງນີ້ສາມວັນກ່ອນ. ແລ້ວໃຫ້ພວກເຈົ້າກັບມາຫາເຮົາໃໝ່.” ດັ່ງນັ້ນ ພວກເຂົາຈຶ່ງພາກັນຈາກໄປ.

6ກະສັດເຣໂຫໂບອາມໄດ້ປຶກສາກັບຜູ້ອາວຸໂສ ທີ່ໄດ້ຮັບໃຊ້ເປັນທີ່ປຶກສາຂອງໂຊໂລໂມນພໍ່ຂອງຕົນ. ເພິ່ນຖາມວ່າ, “ພວກທ່ານຈະແນະນຳເຮົາໃຫ້ບອກຄົນເຫຼົ່ານີ້ຢ່າງໃດ?”

7ພວກເຂົາຕອບວ່າ, “ຖ້າທ່ານເມດຕາຄົນເຫຼົ່ານີ້ ແລະພະຍາຍາມເອົາໃຈພວກເຂົາໂດຍໃຫ້ຄຳຕອບທີ່ພວກເຂົາພໍໃຈ ພວກເຂົາກໍຈະຮັບໃຊ້ທ່ານຢ່າງສັດຊື່ເລື້ອຍໄປ.”

8ແຕ່ເພິ່ນຊໍ້າບໍ່ເອົາໃຈໃສ່ກັບຄຳແນະນຳຂອງຜູ້ອາວຸໂສ ຈຶ່ງໄປຮັບຄຳປຶກສາຈາກຄົນໜຸ່ມທີ່ໄດ້ເຕີບໃຫຍ່ຂຶ້ນມາພ້ອມກັບຕົນ.

9ເພິ່ນຖາມພວກເຂົາວ່າ, “ພວກເຈົ້າຈະແນະນຳເຮົາໃຫ້ເຮັດຢ່າງໃດ? ເຮົາຈະເວົ້າກັບປະຊາຊົນເຫຼົ່ານີ້ທີ່ໄດ້ມາຂໍຮ້ອງເຮົາ ຜ່ອນພາລະໜັກຂອງພວກເຂົາໃຫ້ເບົາລົງໄດ້ຢ່າງໃດ?”

10ພວກເຂົາຈຶ່ງຕອບວ່າ, “ທ່ານຄວນຈະບອກພວກເຂົາຢ່າງນີ້: ‘ນິ້ວກ້ອຍຂອງເຮົາກໍໃຫຍ່ກວ່າບັ້ນແອວຂອງພໍ່ເຮົາ.’

11ຈົ່ງບອກພວກເຂົາວ່າ, ‘ພໍ່ຂອງເຮົາໄດ້ວາງພາລະໜັກເທິງພວກທ່ານ; ສ່ວນເຮົາຈະວາງພາລະໜັກກວ່ານັ້ນອີກ. ເພິ່ນຂ້ຽນພວກທ່ານດ້ວຍໄມ້ແສ້ທຳມະດາ; ແຕ່ເຮົາຈະຂ້ຽນພວກທ່ານດ້ວຍໄມ້ແສ້ຕີງົວ.”’

12ສາມວັນຕໍ່ມາ ເຢໂຣໂບອາມແລະປະຊາຊົນທັງໝົດ ກໍໄດ້ກັບຄືນມາຫາກະສັດເຣໂຫໂບອາມຕາມທີ່ເພິ່ນໄດ້ບອກພວກເຂົາ.

13ກະສັດບໍ່ໄດ້ເອົາໃຈໃສ່ຕໍ່ຄຳແນະນຳຂອງບັນດາຜູ້ອາວຸໂສ ແລະໄດ້ກ່າວຕໍ່ປະຊາຊົນຢ່າງແຂງແຮງ

14ຕາມທີ່ພວກຄົນໜຸ່ມໄດ້ແນະນຳແກ່ເພິ່ນນັ້ນ. ເພິ່ນໄດ້ເວົ້າວ່າ, “ພໍ່ຂອງເຮົາໄດ້ວາງພາລະໜັກເທິງພວກທ່ານ; ເຮົາເອງກໍຈະວາງພາລະໃຫ້ໜັກກວ່ານັ້ນອີກ. ເພິ່ນຂ້ຽນພວກທ່ານດ້ວຍໄມ້ແສ້ທຳມະດາ; ແຕ່ເຮົາຈະຂ້ຽນພວກທ່ານດ້ວຍໄມ້ແສ້ຕີງົວ.”

15ສະນັ້ນ ກະສັດຈຶ່ງບໍ່ໄດ້ເອົາໃຈໃສ່ຕໍ່ຄຳຮ້ອງຂໍຂອງປະຊາຊົນ. ເຫດການນີ້ເປັນມາແຕ່ພຣະເຈົ້າ ເພື່ອພຣະເຈົ້າຢາເວຈະໃຫ້ຖ້ອຍຄຳຂອງພຣະອົງສຳເລັດ ຕາມທີ່ພຣະອົງໄດ້ກ່າວແກ່ເຢໂຣໂບອາມລູກຊາຍຂອງເນບັດໂດຍຜ່ານທາງຜູ້ທຳນວາຍອາຮີຢາແຫ່ງຊີໂລກາຍເປັນຈິງ.

16ເມື່ອປະຊາຊົນໄດ້ເຫັນວ່າກະສັດບໍ່ຍອມຟັງພວກຕົນ ພວກເຂົາກໍພາກັນຮ້ອງຂຶ້ນວ່າ, “ພວກເຮົາບໍ່ມີສ່ວນໃນດາວິດ ບໍ່ມີສ່ວນໃນມໍຣະດົກຂອງລູກຊາຍຂອງເຢຊີ ຊາວອິດສະຣາເອນເອີຍ ຈົ່ງພາກັນກັບເມືອບ້ານເຖີດ. ປະໃຫ້ເຣໂຫໂບອາມຮັບຜິດຊອບລາວເອງສາ.” ດັ່ງນັ້ນ ປະຊາຊົນອິດສະຣາເອນຈຶ່ງໄດ້ກະບົດ

17ໂດຍປ່ອຍໃຫ້ເຣໂຫໂບອາມເປັນກະສັດປົກຄອງແຕ່ປະຊາຊົນທີ່ໄດ້ອາໄສຢູ່ໃນຢູດາຍເທົ່ານັ້ນ.

18ຕໍ່ມາ ກະສັດເຣໂຫໂບອາມໄດ້ໃຊ້ອາໂດນີຣາມ ຜູ້ຮັບຜິດຊອບດ້ານແຮງງານໄປຫາປະຊາຊົນອິດສະຣາເອນ; ແຕ່ພວກເຂົາໄດ້ໃຊ້ກ້ອນຫີນແກວ່ງໃສ່ເພິ່ນຈົນຕາຍ. ເມື່ອເປັນເຊັ່ນນີ້ ເຣໂຫໂບອາມຈຶ່ງຟ້າວຂຶ້ນລົດມ້າ ແລະປົບໜີໄປນະຄອນເຢຣູຊາເລັມ.

19ຕັ້ງແຕ່ນັ້ນມາ ປະຊາຊົນໃນທາງພາກເໜືອຂອງອິດສະຣາເອນ ຈຶ່ງໄດ້ກະບົດຕໍ່ເຊື້ອວົງຂອງດາວິດ.

← Chapter 9 Jump to: Chapter 11 →