2 Chronicles 11

Lao Bible 2012 (ພຣະຄຳພີສັກສິ)

← Chapter 10 Jump to: Chapter 12 →

1ເມື່ອກະສັດເຣໂຫໂບອາມໄດ້ມາຮອດນະຄອນເຢຣູຊາເລັມ ເພິ່ນຈຶ່ງສັ່ງໃຫ້ພວກທະຫານທີ່ເກັ່ງກ້າຈາກເຜົ່າເບັນຢາມິນ ແລະຈາກເຜົ່າຢູດາ ຈຳນວນໜຶ່ງແສນແປດສິບພັນຄົນ ມາເຕົ້າໂຮມກັນ. ເພິ່ນຕັ້ງໃຈຈະໄປເຮັດເສິກ ແລະຢຶດອຳນາດຄືນຈາກເຜົ່າຕ່າງໆ ທາງພາກເໜືອຂອງອິດສະຣາເອນ.

2ແຕ່ພຣະເຈົ້າຢາເວໄດ້ບອກເຊມາອີຢາຄົນຂອງພຣະເຈົ້າ

3ນຳເອົາຖ້ອຍຄຳໄປບອກກະສັດເຣໂຫໂບອາມ ພ້ອມປະຊາຊົນທັງໝົດໃນເຜົ່າຢູດາແລະເບັນຢາມິນວ່າ,

4“ພຣະເຈົ້າຢາເວກ່າວວ່າ, ຢ່າໂຈມຕີພີ່ນ້ອງອິດສະຣາເອນຂອງພວກເຈົ້າເລີຍ. ພວກເຈົ້າທຸກຄົນກັບເມືອບ້ານເຮືອນໃຜລາວສາ. ນີ້ແມ່ນຄວາມປະສົງຂອງເຮົາເອງທີ່ເຮັດໃຫ້ສິ່ງເຫຼົ່ານັ້ນເກີດຂຶ້ນ.” ພວກເຂົາໄດ້ເຊື່ອຟັງຖ້ອຍຄຳຂອງພຣະເຈົ້າຢາເວ ແລະບໍ່ໄດ້ໄປສູ້ຮົບເຢໂຣໂບອາມ.

5ເຣໂຫໂບອາມໄດ້ອາໄສຢູ່ໃນນະຄອນເຢຣູຊາເລັມ ແລະໄດ້ສ້າງປ້ອມປ້ອງກັນເມືອງຕ່າງໆຂອງຢູດາແລະເບັນຢາມິນຂຶ້ນ ດັ່ງນີ້:

6ເບັດເລເຮັມ, ເອຕາມ, ເຕກົວ,

7ເບັດຊູເຣ, ໂສໂກ, ອາດຸນລຳ,

8ກາດ, ມາເຣຊາ, ຊີເຟ,

9ອາໂດຣາອີມ, ລາກິດ, ອາເຊກາ,

10ໂຊຣາ, ໄອຢາໂລນ ແລະເຮັບໂຣນ.

11ເພິ່ນໄດ້ສ້າງປ້ອມປ້ອງກັນເມືອງໄວ້ຢ່າງເຂັ້ມແຂງ ແລະໄດ້ແຕ່ງຕັ້ງຜູ້ບັນຊາການໄວ້ຕາມແຕ່ລະເມືອງ ແລະຢູ່ໃນແຕ່ລະເມືອງເພິ່ນກໍໄດ້ສະສົມອາຫານ, ນໍ້າມັນໝາກກອກເທດ ແລະເຫຼົ້າອະງຸ່ນ,

12ຕະຫລອດທັງຫອກແລະໂລ້ໄວ້ເປັນຈຳນວນຫລວງຫລາຍ. ໂດຍວິທີນີ້ ເພິ່ນຈຶ່ງຮັກສາເຜົ່າຢູດາແລະເຜົ່າເບັນຢາມິນໃຫ້ຢູ່ໃຕ້ການຄຸ້ມຄອງຂອງຕົນໄວ້ໄດ້.

13ພວກປະໂຣຫິດກັບຊາວເລວີຈາກທົ່ວທຸກເຂດແດນຂອງອິດສະຣາເອນ ໄດ້ມາທີ່ພາກໃຕ້ຂອງຢູດາຍ.

14ຊາວເລວີໄດ້ປະຖິ້ມທົ່ງລ້ຽງສັດກັບທີ່ດິນອື່ນໆຂອງພວກຕົນ ແລະໄດ້ຍົກຍ້າຍເຂົ້າມາອາໄສຢູ່ທີ່ຢູດາຍແລະນະຄອນເຢຣູຊາເລັມ ເພາະກະສັດເຢໂຣໂບອາມແຫ່ງອິດສະຣາເອນ ແລະຜູ້ຂຶ້ນປົກຄອງແທນເພິ່ນ ບໍ່ອະນຸຍາດໃຫ້ພວກເຂົາຮັບໃຊ້ໃນຖານະເປັນປະໂຣຫິດຂອງພຣະເຈົ້າຢາເວ.

15ເຢໂຣໂບອາມໄດ້ແຕ່ງຕັ້ງປະໂຣຫິດຂຶ້ນໂດຍຕົນເອງ ເພື່ອໃຫ້ຮັບໃຊ້ໃນສະຖານທີ່ຂາບໄຫວ້ພະຂອງຊາວຕ່າງດ້າວ, ຂາບໄຫວ້ຜີສາດແລະຮູບງົວທີ່ພວກເຂົາໄດ້ສ້າງຂຶ້ນເປັນຮູບເຄົາຣົບ.

16ຈາກເຜົ່າທັງໝົດຂອງປະຊາຊົນອິດສະຣາເອນ ຜູ້ໃດທີ່ຢາກນະມັດສະການຢ່າງຈິງໃຈ ພຣະເຈົ້າຢາເວ ພຣະເຈົ້າຂອງຊາດອິດສະຣາເອນນັ້ນ ກໍໄດ້ຕິດຕາມຊາວເລວີໄປທີ່ນະຄອນເຢຣູຊາເລັມ, ເພື່ອພວກເຂົາຈະຖວາຍບູຊາແກ່ອົງພຣະຜູ້ເປັນເຈົ້າ ພຣະເຈົ້າຂອງບັນພະບຸລຸດຂອງພວກເຂົາ.

17ເລື່ອງນີ້ໄດ້ເຮັດໃຫ້ອານາຈັກຢູດາຍເຂັ້ມແຂງຂຶ້ນ ແລະເປັນເວລາເຖິງສາມປີ ທີ່ພວກເຂົາອູ້ມຊູກະສັດເຣໂຫໂບອາມລູກຊາຍຂອງໂຊໂລໂມນ ແລະໃຊ້ຊີວິດດັ່ງຢູ່ໃຕ້ການປົກຄອງຂອງກະສັດດາວິດ ແລະຂອງກະສັດໂຊໂລໂມນ.

18ເຣໂຫໂບອາມໄດ້ແຕ່ງງານກັບນາງມາຮາລັດລູກສາວຂອງເຢຣິໂມດ; ແລະເຢຣິໂມດເປັນລູກຊາຍຄົນໜຶ່ງຂອງກະສັດດາວິດທີ່ເກີດຈາກນາງອາບີໄຮ. ນາງອາບີໄຮເປັນລູກສາວຂອງເອລີອາບ ແລະເປັນຫລານສາວຂອງເຢຊີ.

19ນາງມີລູກຊາຍສາມຄົນ ດັ່ງນີ້: ເຢອຸດ, ເຊມາຣີຢາ ແລະຊາຮາມ.

20ຕໍ່ມາ ເພິ່ນໄດ້ນາງມາອາກາ ລູກສາວຂອງອັບຊາໂລມມາເປັນເມຍ; ແລະເຂົາມີລູກຊາຍສີ່ຄົນນຳກັນ ດັ່ງນີ້: ອາບີຢາ, ອັດໄຕ, ຊີຊາ ແລະເຊໂລມິດ.

21ເຣໂຫໂບອາມມີເມຍທັງໝົດ ສິບແປດຄົນແລະມີເມຍນ້ອຍຫົກສິບຄົນ; ເພິ່ນມີລູກຊາຍຊາວແປດຄົນ ແລະລູກສາວຫົກສິບຄົນ. ໃນບັນດາເມຍໃຫຍ່ແລະເມຍນ້ອຍທັງໝົດນັ້ນ ເພິ່ນຮັກນາງມາອາກາຫລາຍກວ່າໝູ່

22ແລະເພິ່ນພໍໃຈນຳອາບີຢາລູກຊາຍທີ່ເກີດຈາກນາງຫລາຍກວ່າພວກລູກຊາຍທັງໝົດ ໂດຍໄດ້ເລືອກໃຫ້ລາວຂຶ້ນເປັນກະສັດປົກຄອງແທນຕົນ.

23ເຣໂຫໂບອາມໄດ້ມອບຄວາມຮັບຜິດຊອບຕ່າງໆ ໃຫ້ພວກລູກຊາຍຂອງຕົນຢ່າງສະຫລຽວສະຫລາດທີ່ສຸດຄື: ເພິ່ນໃຫ້ພວກເຂົາຢູ່ຕາມເມືອງຕ່າງໆທີ່ມີປ້ອມປ້ອງກັນເມືອງ ທົ່ວອານາຈັກຢູດາຍແລະເບັນຢາມິນ. ເພິ່ນໄດ້ຈັດຫາສິ່ງຕ່າງໆໃຫ້ພວກເຂົາຢ່າງໃຈກວ້າງຂວາງ ແລະຫາເມຍໃຫ້ພວກເຂົາຕັ້ງຫລາຍຄົນ.

← Chapter 10 Jump to: Chapter 12 →