2 Chronicles 29

Lao Bible 2012 (ພຣະຄຳພີສັກສິ)

← Chapter 28 Jump to: Chapter 30 →

1ເຈົ້າເຮເຊກີຢາໄດ້ຂຶ້ນເປັນກະສັດແຫ່ງຢູດາຍເມື່ອເພິ່ນອາຍຸຊາວຫ້າປີ ແລະໄດ້ປົກຄອງຢູ່ນະຄອນເຢຣູຊາເລັມເປັນເວລາຊາວເກົ້າປີ. ແມ່ຂອງເພິ່ນຊື່ວ່າອາບີຢາລູກສາວຂອງເຊກາຣີຢາ.

2ໂດຍເຮັດຕາມແບບຢ່າງຂອງກະສັດດາວິດຜູ້ເປັນບັນພະບຸລຸດ ເພິ່ນໄດ້ກະທຳໃນສິ່ງທີ່ພຣະເຈົ້າຢາເວພໍພຣະໄທ.

3ໃນເດືອນທີໜຶ່ງຂອງປີແຫ່ງເຈົ້າເຮເຊກີຢາໄດ້ຂຶ້ນເປັນກະສັດນັ້ນ ເພິ່ນໄດ້ເປີດປະຕູວິຫານຂອງພຣະເຈົ້າຢາເວອີກໃໝ່ແລະລົງມືສ້ອມແປງປະຕູເຫຼົ່ານັ້ນ.

4ເພິ່ນໄດ້ເຕົ້າໂຮມເອົາປະໂຣຫິດໝວດໜຶ່ງ ແລະພວກເລວີທາງດ້ານທິດຕາເວັນອອກ,

5ແລະໂອ້ລົມກັບພວກເຂົາຢູ່ໃນນັ້ນວ່າ, “ພວກທ່ານຊາວເລວີ ຈົ່ງອຸທິດພວກທ່ານເອງ ແລະຈົ່ງຊຳລະວິຫານຂອງພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກທ່ານ. ຈົ່ງຍົກຍ້າຍທຸກໆສິ່ງທີ່ເປັນມົນທິນອອກໄປຈາກສະຖານທີ່ສັກສິດ.

6ບັນພະບຸລຸດຂອງພວກເຮົາບໍ່ສັດຊື່ຕໍ່ພຣະເຈົ້າຢາເວ ພຣະເຈົ້າຂອງພວກເຮົາ ແລະໄດ້ເຮັດສິ່ງທີ່ພຣະອົງບໍ່ພໍພຣະໄທ. ພວກເພິ່ນໄດ້ປະຖິ້ມພຣະອົງ ແລະປິ່ນຫລັງໃຫ້ແກ່ທີ່ສະຖິດຂອງພຣະເຈົ້າຢາເວ.

7ພວກເພິ່ນໄດ້ອັດປະຕູພຣະວິຫານ, ໄດ້ປ່ອຍໃຫ້ຕະກຽງມອດ ແລະບໍ່ໄດ້ເຜົາເຄື່ອງຫອມຖວາຍຫລືເຜົາບູຊາໃນສະຖານທີ່ສັກສິດຂອງພຣະເຈົ້າແຫ່ງຊາດອິດສະຣາເອນ.

8ເພາະເລື່ອງນີ້ ພຣະເຈົ້າຢາເວຈຶ່ງໂກດຮ້າຍຢູດາຍແລະນະຄອນເຢຣູຊາເລັມ ແລະສິ່ງທີ່ພຣະອົງໄດ້ເຮັດຕໍ່ອານາຈັກທັງສອງນັ້ນ ພາໃຫ້ທຸກຄົນຕົກໃຈຢ້ານກົວຫລາຍ. ພວກທ່ານກໍຮູ້ຈັກສິ່ງນີ້ດີ.

9ພໍ່ຂອງພວກເຮົາໄດ້ຖືກຂ້າໃນສະໜາມຮົບ ແລະເມຍກັບລູກຂອງພວກເຮົາກໍຖືກຈັບໄປເປັນຊະເລີຍ.

10ບັດນີ້ ຂ້າພະເຈົ້າໄດ້ຕັດສິນໃຈທີ່ຈະເຮັດພັນທະສັນຍາກັບພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ເພື່ອວ່າພຣະອົງຈະບໍ່ໂກດຮ້າຍພວກເຮົາຕໍ່ໄປ.

11ລູກທັງຫລາຍຂອງເຮົາເອີຍ ຢ່າສູ່ມົວຊັກຊ້າຢູ່ເລີຍ. ພວກທ່ານແມ່ນຜູ້ໜຶ່ງທີ່ພຣະເຈົ້າຢາເວໄດ້ເລືອກເອົາ ເພື່ອເຜົາເຄື່ອງຫອມຖວາຍແກ່ພຣະອົງ ແລະນຳພາປະຊາຊົນເຂົ້າມານະມັດສະການພຣະອົງ.”

12ພວກເລວີທີ່ມີໜ້າໃນທີ່ນັ້ນ ມີດັ່ງນີ້: ຈາກຕະກຸນໂກຮາດ, ມາຮາດ ລູກຊາຍຂອງອາມາໄສ ແລະໂຢເອນລູກຊາຍຂອງອາຊາຣີຢາ; ຈາກຕະກຸນເມຣາຣີ, ກີເຊ ລູກຊາຍຂອງອັບດີ ແລະອາຊາຣີຢາລູກຊາຍຂອງເຢຮານເລເລນ; ຈາກຕະກຸນເກໂຊນ, ໂຢອາ ລູກຊາຍຂອງຊິມມາ ແລະເອເດນລູກຊາຍຂອງໂຢອາ

13ຈາກຕະກຸນເອລີຊາຟັນ, ຊິມຣີ ແລະເຢອູເອນ; ຈາກຕະກຸນອາສັບ, ເຊກາຣີຢາ ແລະມັດຕານິຢາ

14ຈາກຕະກຸນເຮມານ, ເຢອູເອນ ແລະຊີເມອີ; ຈາກຕະກຸນເຢດູທູນ, ເຊມາອີຢາ ແລະອຸດຊີເອນ.

15ຄົນເຫຼົ່ານີ້ໄດ້ເອີ້ນພີ່ນ້ອງຊາວເລວີຂອງພວກເຂົາມາປະຊຸມກັນ ແລະພວກເຂົາທຸກຄົນໄດ້ເຮັດພິທີຊຳລະຕົນໃຫ້ໝົດມົນທິນ. ແລ້ວໂດຍປະຕິບັດຕາມຄຳສັ່ງຂອງກະສັດ ໂດຍຖ້ອຍຄຳຂອງພຣະເຈົ້າຢາເວ ເພື່ອຊຳລະວິຫານຂອງພຣະເຈົ້າຢາເວໃຫ້ໝົດມົນທິນ.

16ພວກປະໂຣຫິດໄດ້ເຂົ້າໄປທາງໃນຂອງວິຫານຂອງພຣະເຈົ້າຢາເວເພື່ອຊຳລະໃຫ້ສະອາດ ແລະພວກເຂົາໄດ້ຂົນທຸກສິ່ງ ທີ່ເປັນມົນທິນທັງຫຼາຍທີ່ພວກເຂົາໄດ້ພົບໃນພຣະວິຫານຂອງພຣະເຈົ້າຢາເວອອກມາກອງໄວ້ທີ່ເດີ່ນຂອງວິຫານຂອງພຣະເຈົ້າຢາເວ. ພວກເລວີໄດ້ຂົນສິ່ງທີ່ເປັນມົນທິນເຫຼົ່ານັ້ນໄປຖິ້ມລົງໃນຮ່ອມພູກິດໂຣນຢູ່ນອກເມືອງ.

17ການລົງມືຊຳລະພຣະວິຫານນີ້ໄດ້ເລີ່ມຂຶ້ນໃນວັນທີໜຶ່ງຂອງເດືອນທີໜຶ່ງ ແລະພໍເຖິງວັນທີແປດກໍສຳເລັດໝົດ ລວມທັງຫ້ອງທີ່ທາງເຂົ້າດ້ານໜ້າວິຫານຂອງພຣະເຈົ້າຢາເວ. ແລ້ວພວກເຂົາກໍຕຽມວິຫານຂອງພຣະເຈົ້າຢາເວໄວ້ສຳລັບການນະມັດສະການອີກແປດວັນ ຈົນເຖິງວັນທີສິບຫົກຂອງເດືອນຈຶ່ງສຳເລັດທັງໝົດ.

18ພວກເລວີໄດ້ລາຍງານໃຫ້ກະສັດເຮເຊກີຢາຮູ້ ດັ່ງນີ້: “ພວກຂ້ານ້ອຍໄດ້ເຮັດສຳເລັດພິທີຊຳລະວິຫານຂອງພຣະເຈົ້າຢາເວທັງໝົດແລ້ວ, ມີແທ່ນເຜົາບູຊາແລະເຄື່ອງໃຊ້ເທິງແທ່ນທັງໝົດ, ໂຕະວາງເຂົ້າຈີ່ໃສ່ເປັນແຖວແລະເຄື່ອງໃຊ້ເທິງໂຕະທັງໝົດ.

19ພວກຂ້ານ້ອຍຍັງໄດ້ນຳເຄື່ອງໃຊ້ທັງໝົດ ຊຶ່ງກະສັດອາຮາດໄດ້ເອົາໄປໃນສະໄໝທີ່ເພິ່ນບໍ່ສັດຊື່ຕໍ່ພຣະເຈົ້ານັ້ນຄືນມາ ແລະພວກຂ້ານ້ອຍໄດ້ອຸທິດຖວາຍແກ່ພຣະເຈົ້າຄືນໃໝ່ອີກ. ສິ່ງທັງໝົດນັ້ນໄດ້ວາງໄວ້ຢູ່ດ້ານໜ້າຂອງແທ່ນບູຊາຂອງພຣະເຈົ້າຢາເວແລ້ວ.”

20ໂດຍບໍ່ຊັກຊ້າກະສັດເຮເຊກີຢາໄດ້ເອີ້ນຊາວເມືອງຊັ້ນຫົວໜ້າມາປະຊຸມ ແລະພວກເຂົາຈຶ່ງພ້ອມພາກັນຂື້ນໄປທີ່ວິຫານຂອງພຣະເຈົ້າຢາເວ.

21ເພື່ອເປັນການລຶບລ້າງການບາບຂອງຣາຊວົງ ລວມທັງຂອງປະຊາຊົນຢູດາ ແລະຊຳລະພຣະວິຫານ ພວກເຂົາໄດ້ຖວາຍງົວເຖິກເຈັດໂຕ, ແກະເຖິກເຈັດໂຕ, ລູກແກະເຈັດໂຕ ແລະແບ້ເຈັດໂຕ. ເພິ່ນບອກບັນດາປະໂຣຫິດທີ່ເປັນເຊື້ອສາຍຂອງອາໂຣນ ໃຫ້ຖວາຍສັດເຫຼົ່ານັ້ນທີ່ແທ່ນບູຊາຂອງພຣະເຈົ້າຢາເວ.

22ພວກປະໂຣຫິດໄດ້ຂ້າງົວເຖິກກ່ອນ ແລ້ວກໍຂ້າແກະເຖິກກັບລູກແກະ ແລະຊິດເລືອດຂອງສັດແຕ່ລະໂຕໃສ່ແທ່ນບູຊາ.

23ແລະພວກເຂົາໄດ້ນຳແບ້ເຖິກສຳລັບເປັນເຄື່ອງບູຊາໄຖ່ບາບມາຕໍ່ໜ້າກະສັດ ແລະທີ່ຊຸມນຸມຊົນ; ແລ້ວພວກເຂົາໄດ້ວາງມືໃສ່ມັນ.

24ແລ້ວບັນດາປະໂຣຫິດຈຶ່ງໄດ້ຂ້າແບ້ ແລະຖອກເລືອດໃສ່ແທ່ນບູຊາ ເພື່ອລຶບລ້າງການບາບຂອງປະຊາຊົນທຸກຄົນ ເພາະກະສັດໄດ້ສັ່ງໃຫ້ຖວາຍເຄື່ອງເຜົາບູຊາ ແລະຖວາຍເຄື່ອງບູຊາ ເພື່ອລຶບລ້າງການບາບຂອງປະຊາຊົນອິດສະຣາເອນທັງໝົດ.

25ກະສັດໄດ້ເຮັດຕາມຄຳສັ່ງທີ່ພຣະເຈົ້າຢາເວໄດ້ໃຫ້ແກ່ກະສັດດາວິດໂດຍຜ່ານທາງກາດ ຜູ້ທຳນວາຍຂອງກະສັດ ແລະຜ່ານທາງຜູ້ທຳນວາຍນາທານ; ເພິ່ນໄດ້ໃຫ້ຊາວເລວີປະຈຳຢູ່ໃນວິຫານຂອງພຣະເຈົ້າຢາເວໂດຍໃຫ້ມີພິນແລະມີແສ່ງ

26ເຄື່ອງດົນຕຼີດັ່ງສະໄໝຂອງກະສັດດາວິດໄດ້ເຮັດ. ພວກປະໂຣຫິດໄດ້ຢືນຖືແກຕຽມພ້ອມຢູ່ທີ່ນັ້ນຄືກັນ.

27ເຮເຊກີຢາໄດ້ສັ່ງໃຫ້ຖວາຍເຄື່ອງເຜົາບູຊາ ແລະພໍພິທີເລີ່ມຂຶ້ນ ປະຊາຊົນຕ່າງກໍຮ້ອງເພງສັນລະເສີນພຣະເຈົ້າຢາເວ; ສ່ວນບັນດານັກດົນຕຼີກໍຕັ້ງຕົ້ນເປົ່າແກ ແລະຫລີ້ນເຄື່ອງດົນຕຼີອື່ນໆອີກ.

28ທຸກໆຄົນທີ່ຢູ່ໃນທີ່ນັ້ນໄດ້ເຂົ້າຮ່ວມໃນການນະມັດສະການ ແລະສຽງຮ້ອງພ້ອມສຽງເສບກໍສືບຕໍ່ກັນໄປ ຈົນກວ່າການຖວາຍບູຊາໄດ້ສຳເລັດລົງ.

29ແລ້ວກະສັດເຮເຊກີຢາພ້ອມດ້ວຍປະຊາຊົນທັງໝົດ ກໍໄດ້ຄຸເຂົ່າລົງນ້ອມນະມັດສະການພຣະເຈົ້າ.

30ກະສັດພ້ອມດ້ວຍພວກຜູ້ນຳຂອງປະຊາຊົນໃນຊາດ ໄດ້ບອກໃຫ້ຊາວເລວີຮ້ອງເພງສັນລະເສີນແດ່ພຣະເຈົ້າຢາເວ ຄືຖ້ອຍຄຳທີ່ກະສັດດາວິດ ແລະຜູ້ທຳນວາຍອາສັບໄດ້ແຕ່ງໄວ້. ສະນັ້ນ ທຸກຄົນຈຶ່ງຮ້ອງເພງດ້ວຍຄວາມຊົມຊື່ນຍິນດີ ເມື່ອພວກເຂົາຄຸເຂົ່າລົງນ້ອມນະມັດສະການພຣະເຈົ້າ.

31ເຮເຊກີຢາກ່າວແກ່ປະຊາຊົນວ່າ, “ບັດນີ້ ເມື່ອພວກເຈົ້າໄດ້ຊຳລະຕົນໃຫ້ໝົດມົນທິນສຳລັບພຣະເຈົ້າຢາເວແລ້ວ ຈົ່ງຫຍັບມາໃກ້ ແລະນຳເຄື່ອງບູຊາກັບເຄື່ອງຖວາຍໂມທະນາຂອບພຣະຄຸນມາທີ່ວິຫານຂອງພຣະເຈົ້າຢາເວ.” ພວກເຂົາກໍໄດ້ປະຕິບັດຕາມ ແລະຍັງມີບາງຄົນໄດ້ນຳສັດມາຂ້າ ເພື່ອເຜົາບູຊາດ້ວຍຄວາມສະໝັກໃຈ.

32ພວກເຂົາໄດ້ນຳງົວເຖິກເຈັດສິບໂຕ, ແກະເຖິກໜຶ່ງຮ້ອຍໂຕ ແລະລູກແກະສອງຮ້ອຍໂຕ ມາເຜົາບູຊາຖວາຍແກ່ພຣະເຈົ້າຢາເວ;

33ພວກເຂົາໄດ້ນຳງົວເຖິກຫົກຮ້ອຍໂຕ ແລະແກະເຖິກສາມພັນໂຕ ມາເປັນເຄື່ອງບູຊາ ເພື່ອໃຫ້ປະຊາຊົນກິນ.

34ເມື່ອບໍ່ມີປະໂຣຫິດພຽງພໍທີ່ຈະຂ້າສັດເຫຼົ່ານີ້ ຊາວເລວີຈຶ່ງໄດ້ຂ້າຊ່ວຍ ຈົນວຽກງານສຳເລັດຮຽບຮ້ອຍ. ໃນເວລານັ້ນ ມີປະໂຣຫິດຫລາຍຄົນໄດ້ເຮັດພິທີຊຳລະຕົນໃຫ້ໝົດມົນທິນຕື່ມອີກ. (ຊາວເລວີຍິ່ງມີໃຈສັດຊື່ຫລາຍຂຶ້ນ ໃນການປະພຶດຕົນບໍ່ໃຫ້ເປັນມົນທິນຕາມກົດບັນຍັດ.)

35ນອກເໜືອຈາກການຖວາຍບູຊາດ້ວຍການເຜົາທັງໝົດແລ້ວ ພວກປະໂຣຫິດຍັງຮັບຜິດຊອບເຜົາໄຂມັນ ຊຶ່ງໄດ້ມາຈາກເຄື່ອງຖວາຍເພື່ອຄວາມສາມັກຄີທຳ ແລະສຳລັບຖອກເຫຼົ້າອະງຸ່ນຖວາຍພ້ອມກັບເຄື່ອງເຜົາບູຊາອີກ. ສະນັ້ນ ການນະມັດສະການໃນວິຫານຂອງພຣະເຈົ້າຢາເວຈຶ່ງໄດ້ຮັບການຟື້ນຟູຂຶ້ນໃໝ່.

36ກະສັດເຮເຊກີຢາແລະປະຊາຊົນພາກັນຊົມຊື່ນຍິນດີ ເພາະພຣະເຈົ້າໄດ້ຊ່ວຍໃຫ້ເຮັດສິ່ງທັງໝົດນີ້ສຳເລັດຜົນຢ່າງວ່ອງໄວ.

← Chapter 28 Jump to: Chapter 30 →