2 Chronicles 30 — Lao Bible 2012 (ພຣະຄຳພີສັກສິ)

1ເນື່ອງຈາກປະຊາຊົນບໍ່ອາດຈະສະຫລອງປັດສະຄາ ຕາມກຳນົດໃນເດືອນທີໜຶ່ງໄດ້ ເພາະປະໂຣຫິດທີ່ຊຳລະຕົນໃຫ້ໝົດມົນທິນແລ້ວນັ້ນຍັງບໍ່ມີພຽງພໍ ແລະປະຊາຊົນສ່ວນຫລາຍກໍຍັງບໍ່ທັນໄດ້ມາເຕົ້າໂຮມກັນທີ່ນະຄອນເຢຣູຊາເລັມ. ດັ່ງນັ້ນ ກະສັດເຮເຊກີຢາ, ບັນດາຂ້າຣາຊການ ແລະປະຊາຊົນໃນນະຄອນເຢຣູຊາເລັມ ຈຶ່ງໄດ້ຕົກລົງກັນສະຫລອງງານນີ້ໃນເດືອນທີສອງ. ສ່ວນກະສັດກໍໄດ້ປະກາດໄປເຖິງປະຊາຊົນອິດສະຣາເອນ ແລະຢູດາຍໃຫ້ຮູ້ທົ່ວເຖິງກັນ. ເພິ່ນໄດ້ເອົາໃຈໃສ່ເປັນພິເສດແກ່ເຜົ່າເອຟຣາອິມແລະມານາເຊ ໂດຍສົ່ງຈົດໝາຍໄປເຊີນພວກເຂົາໃຫ້ມາທີ່ວິຫານຂອງພຣະເຈົ້າຢາເວໃນນະຄອນເຢຣູຊາເລັມ ເພື່ອສະຫລອງປັດສະຄາຂອງພຣະເຈົ້າຢາເວ ພຣະເຈົ້າຂອງຊາດອິດສະຣາເອນ.

4ກະສັດແລະປະຊາຊົນຕ່າງກໍພໍໃຈນຳແຜນການນີ້

5ສະນັ້ນ ພວກເຂົາຈຶ່ງເຊີນປະຊາຊົນອິດສະຣາເອນທັງໝົດມາຮ່ວມ ເປັນຈຳນວນຫລວງຫລາຍກວ່າສະໄໝກ່ອນ ຄືເລີ່ມແຕ່ເມືອງດານທາງທິດຕາເວັນອອກ ຈົນຮອດເມືອງເບເອນເຊບາທາງທິດໃຕ້ ເພື່ອໃຫ້ພ້ອມກັນມາທີ່ນະຄອນເຢຣູຊາເລັມ ສະຫລອງປັດສະຄາຂອງພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ຕາມທີ່ກົດບັນຍັດໄດ້ກຳນົດໄວ້.

6ພວກຜູ້ສົ່ງຂ່າວກໍໄດ້ອອກໄປທົ່ວທັງອານາຈັກຢູດາຍແລະອິດສະຣາເອນ ຕາມຄຳສັ່ງຂອງກະສັດແລະບັນດາຂ້າຣາຊການຂອງເພິ່ນ, ໃນບັດເຊີນນັ້ນມີຖ້ອຍຄຳດັ່ງນີ້: “ປະຊາຊົນອິດສະຣາເອນເອີຍ ພວກທ່ານຜູ້ທີ່ໄດ້ລອດຈາກການຮຸກຮານຂອງກອງທັບອັດຊີເຣຍ; ບັດນີ້ ຈົ່ງກັບຄືນມາຫາພຣະເຈົ້າຢາເວ ພຣະເຈົ້າຂອງອັບຣາຮາມ, ອີຊາກ ແລະຢາໂຄບ ແລະພຣະອົງກໍຈະກັບຄືນມາຫາພວກທ່ານ.

7ຢ່າເປັນດັ່ງປູ່ຍ່າຕາຍາຍຂອງພວກທ່ານ ແລະພວກພີ່ນ້ອງອິດສະຣາເອນ ພວກທີ່ບໍ່ສັດຊື່ຕໍ່ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາ. ພວກທ່ານກໍເຫັນແລ້ວວ່າພຣະອົງລົງໂທດພວກເຂົາໜັກສໍ່າໃດ.

8ຢ່າດື້ດຶງດັ່ງພວກເຂົາ ແຕ່ຈົ່ງເຊື່ອຟັງພຣະເຈົ້າຢາເວ. ຈົ່ງມາສູ່ພຣະວິຫານທີ່ນະຄອນເຢຣູຊາເລັມ ບ່ອນທີ່ພຣະເຈົ້າຢາເວ ພຣະເຈົ້າຂອງພວກທ່ານໄດ້ເຮັດໃຫ້ເປັນບ່ອນສັກສິດຕະຫລອດໄປ ແລະນະມັດສະການພຣະອົງ ເພື່ອພຣະອົງຈະບໍ່ໂກດຮ້າຍພວກທ່ານຕໍ່ໄປ.

9ຖ້າພວກທ່ານກັບຄືນມາຫາພຣະເຈົ້າຢາເວ ແລ້ວພວກທີ່ຈັບພີ່ນ້ອງຂອງພວກທ່ານໄປເປັນຊະເລີຍນັ້ນ ກໍຈະມີຈິດໃຈເມດຕາຕໍ່ພວກເຂົາ ແລະສົ່ງພວກເຂົາກັບຄືນມາ. ພຣະເຈົ້າຢາເວ ພຣະເຈົ້າຂອງພວກທ່ານຊົງພຣະຄຸນແລະມີໃຈເມດຕາກະລຸນາ ແລະຖ້າພວກທ່ານກັບຄືນມາຫາພຣະອົງ ພຣະອົງກໍຈະຮັບເອົາພວກທ່ານໄວ້.”

10ພວກສົ່ງຂ່າວໄດ້ໄປທຸກໆເມືອງ ໃນເຂດແດນຂອງເຜົ່າເອຟຣາອິມແລະມານາເຊ ແລະໄກອອກໄປຈົນຮອດທາງເໜືອຂອງເຜົ່າເຊບູໂລນ ແຕ່ປະຊາຊົນຫົວເລາະແລະເຍາະເຍີ້ຍພວກເຂົາ.

11ຢ່າງໃດກໍຕາມ ຍັງມີບາງຄົນຈາກເຜົ່າອາເຊ, ມານາເຊ ແລະເຊບູໂລນຍິນດີຈະມາທີ່ນະຄອນເຢຣູຊາເລັມ.

12ພຣະເຈົ້າໄດ້ກະທຳໃນທ່າມກາງພວກຢູດາເຊັ່ນກັນ ແລະໃຫ້ພວກເຂົາເປັນນໍ້າໜຶ່ງໃຈດຽວກັນ ຕັ້ງໃຈເຮັດຕາມພຣະປະສົງໂດຍປະຕິບັດຕາມຄຳສັ່ງຂອງກະສັດແລະພວກຂ້າຣາຊການຂອງເພິ່ນ ຕາມຖ້ອຍຄຳຂອງພຣະເຈົ້າຢາເວ.

13ໃນເດືອນທີສອງໄດ້ມີປະຊາຊົນຢ່າງຫລວງຫລາຍມາເຕົ້າໂຮມກັນຢູ່ທີ່ນະຄອນເຢຣູຊາເລັມ ເພື່ອສະຫລອງເທດສະການກິນເຂົ້າຈີ່ບໍ່ມີເຊື້ອແປ້ງ.

14ພວກເຂົາເລີ່ມຕົ້ນໂດຍເອົາແທ່ນທັງໝົດທີ່ໃຊ້ຖວາຍເຄື່ອງບູຊາ ແລະເຄື່ອງຫອມໃນນະຄອນເຢຣູຊາເລັມ ໂຍນລົງໃນຮ່ອມພູກິດໂຣນ.

15ແລະໃນມື້ທີສິບສີ່ຂອງເດືອນນັ້ນ ພວກເຂົາໄດ້ຂ້າລູກແກະສຳລັບຖວາຍບູຊາໃນປັດສະຄາ. ປະໂຣຫິດແລະຊາວເລວີທີ່ບໍ່ໄດ້ຊຳລະຕົນໃຫ້ໝົດມົນທິນກໍຮູ້ສຶກລະອາຍໃຈ; ສະນັ້ນ ພວກເຂົາຈຶ່ງຊຳລະຕົນໃຫ້ບໍຣິສຸດ ແລະບັດນີ້ ພວກເຂົາຖວາຍເຄື່ອງເຜົາບູຊາໃນວິຫານຂອງພຣະເຈົ້າຢາເວໄດ້.

16ພວກເຂົາໄດ້ເຂົ້າປະຈຳໜ້າທີ່ຂອງຕົນໃນພຣະວິຫານ ຕາມຄຳແນະນຳທີ່ມີຢູ່ໃນກົດບັນຍັດຂອງໂມເຊຄົນຂອງພຣະເຈົ້າ. ຊາວເລວີໄດ້ນຳເລືອດສັດສຳລັບບູຊານັ້ນມາໃຫ້ປະໂຣຫິດຊິດໃສ່ແທ່ນບູຊາ.

17ເພາະວ່າມີຫລາຍຄົນໃນປະຊາຊົນນັ້ນ ທີ່ຍັງບໍ່ໄດ້ຊຳລະຕົນໃຫ້ບໍຣິສຸດ ພວກເຂົາຈຶ່ງຂ້າແກະຖວາຍສຳລັບປັດສະຄາບໍ່ໄດ້; ສະນັ້ນ ຊາວເລວີຈຶ່ງໄດ້ຂ້າແກະປັດສະຄາສຳລັບທຸກຄົນທີ່ຍັງເປັນມົນທິນ ເພື່ອເຮັດໃຫ້ເຂົາບໍຣິສຸດແດ່ພຣະເຈົ້າຢາເວ.

18ນອກຈາກນີ້ຍັງມີຫລາຍຄົນທີ່ມາຈາກເຜົ່າເອຟຣາອິມ, ມານາເຊ, ອິດຊາຄາ ແລະເຊບູໂລນ ຍັງບໍ່ໄດ້ເຮັດພິທີຊຳລະຕົນໃຫ້ໝົດມົນທິນ; ສະນັ້ນ ພວກເຂົາຈຶ່ງໄດ້ເຮັດພິທີນີ້ຢ່າງບໍ່ຖືກຕ້ອງ. ກະສັດເຮເຊກີຢາຈຶ່ງພາວັນນາອະທິຖານເພື່ອພວກເຂົາວ່າ,

19“ຂ້າແດ່ພຣະເຈົ້າຢາເວຜູ້ປະເສີດເອີຍ ຂໍຊົງໂຜດຍົກໂທດໃຫ້ຜູ້ທີ່ເຕັມໃຈສະແຫວງຫາພຣະເຈົ້າ, ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາ ເຖິງແມ່ນວ່າພວກເຂົາຍັງເປັນມົນທິນຢູ່ກໍຕາມ.”

20ພຣະເຈົ້າຢາເວໄດ້ຕອບຄຳພາວັນນາອະທິຖານຂອງເຮເຊກີຢາ; ພຣະອົງໄດ້ຍົກໂທດໃຫ້ປະຊາຊົນ ແລະບໍ່ເຮັດໃຫ້ພວກເຂົາເປັນອັນຕະລາຍແຕ່ຢ່າງໃດ.

21ປະຊາຊົນທີ່ມາເຕົ້າໂຮມກັນຢູ່ໃນນະຄອນເຢຣູຊາເລັມ ໄດ້ສະຫລອງເທດສະການກິນເຂົ້າຈີ່ບໍ່ມີເຊື້ອແປ້ງດ້ວຍຄວາມຊົມຊື່ນຍິນດີເປັນເວລາເຈັດວັນ ແລະແຕ່ລະວັນ ພວກເລວີແລະບັນດາປະໂຣຫິດຕ່າງກໍສັນລະເສີນພຣະເຈົ້າຢາເວ ດ້ວຍສຸດກຳລັງຂອງພວກເຂົາ. ດ້ວຍເຄື່ອງດົນຕຼີຕ່າງໆສຳລັບພຣະເຈົ້າຢາເວ.

22ເຮເຊກີຢາໄດ້ຊົມເຊີຍຊາວເລວີ ທີ່ມີຄວາມສາມາດສູງໃນການນຳພາການນະມັດສະການພຣະເຈົ້າຢາເວໃນຄັ້ງນີ້. ຫລັງຈາກເຈັດວັນໃນລະຫວ່າງທີ່ພວກເຂົາຖວາຍເຄື່ອງບູຊາ ເພື່ອສັນລະເສີນພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາຢູ່ນັ້ນ

23ພວກເຂົາທຸກຄົນໄດ້ຕົກລົງກັນສະຫລອງຕໍ່ອີກເຈັດວັນ. ສະນັ້ນ ພວກເຂົາຈຶ່ງສະຫລອງດ້ວຍຄວາມຊົມຊື່ນຍິນດີ.

24ກະສັດເຮເຊກີຢາໄດ້ປະກອບສ່ວນງົວເຖິກໜຶ່ງພັນໂຕ ແລະແກະເຖິກເຈັດພັນໂຕ ເພື່ອໃຫ້ປະຊາຊົນຂ້າກິນ ແລະບັນດາຂ້າຣາຊການຂອງເພິ່ນກໍໄດ້ຊ່ວຍງົວເຖິກໜຶ່ງພັນໂຕ ແລະແກະເຖິກໜຶ່ງພັນໂຕ. ມີປະໂຣຫິດເປັນຈຳນວນຫລວງຫລາຍໄດ້ຊຳລະຕົນໃຫ້ໝົດມົນທິນ.

25ສະນັ້ນ ທຸກຄົນຈຶ່ງຊົມຊື່ນຍິນດີເປັນຕົ້ນ: ປະຊາຊົນຊາວຢູດາ, ບັນດາປະໂຣຫິດຊາວເລວີ, ປະຊາຊົນທີ່ມາແຕ່ທາງທິດເໜືອ, ຕະຫລອດທັງຊາວຕ່າງດ້າວທີ່ໄດ້ຕັ້ງຖິ່ນຖານຢູ່ຢ່າງຖາວອນໃນອານາຈັກຢູດາຍແລະອິດສະຣາເອນ.

26ນະຄອນເຢຣູຊາເລັມຈຶ່ງຟົດຟື້ນໄປດ້ວຍຄວາມຊົມຊື່ນຍິນດີອັນໃຫຍ່ ເພາະບໍ່ເຄີຍມີເຫດການເຊັ່ນນີ້ເກີດຂຶ້ນ ນັບຕັ້ງແຕ່ສະໄໝຂອງກະສັດໂຊໂລໂມນລູກຊາຍຂອງດາວິດເປັນຕົ້ນມາ.

27ພວກປະໂຣຫິດແລະຊາວເລວີໄດ້ຢືນຂື້ນອວຍພອນປະຊາຊົນ. ພຣະເຈົ້າຜູ້ສະຖິດຢູ່ໃນສະຫວັນໄດ້ຍິນສຽງພາວັນນາອະທິຖານຂອງພວກເຂົາ ແລະພຣະອົງຈຶ່ງຮັບເອົາຄຳພາວັນນາອະທິຖານເຫຼົ່ານັ້ນ.