2 Chronicles 19

Lao Bible 2012 (ພຣະຄຳພີສັກສິ)

← Chapter 18 Jump to: Chapter 20 →

1ກະສັດເຢໂຮຊາຟັດແຫ່ງຢູດາຍໄດ້ກັບຄືນມາສູ່ວັງຂອງຕົນ ທີ່ນະຄອນເຢຣູຊາເລັມໄດ້ຢ່າງປອດໄພ.

2ມີຜູ້ທຳນວາຍຄົນໜຶ່ງຊື່ວ່າເຢຮູລູກຊາຍຂອງຮານານີໄດ້ເຂົ້າໄປພົບເພິ່ນ ແລະເວົ້າວ່າ, “ທ່ານຄິດວ່າເປັນການຖືກຕ້ອງຊັ້ນບໍ ທີ່ຊ່ວຍຄົນຊົ່ວຊ້າ ແລະເຂົ້າຂ້າງຄົນທີ່ກຽດຊັງພຣະເຈົ້າຢາເວ? ສິ່ງທີ່ທ່ານໄດ້ເຮັດນັ້ນເປັນເຫດໃຫ້ພຣະເຈົ້າຢາເວໂກດຮ້າຍທ່ານ.

3ແຕ່ເຖິງຢ່າງໃດກໍຕາມ, ທ່ານກໍໄດ້ເຮັດບາງສິ່ງທີ່ດີງາມ; ທ່ານໄດ້ທຳລາຍສັນຍາລັກຂອງເຈົ້າແມ່ອາເຊຣາ ຊຶ່ງປະຊາຊົນໄດ້ຂາບໄຫວ້ ແລະທ່ານໄດ້ພະຍາຍາມເຮັດຕາມພຣະປະສົງຂອງພຣະເຈົ້າ.”

4ເຖິງແມ່ນວ່າ ກະສັດເຢໂຮຊາຟັດໄດ້ອາໄສຢູ່ທີ່ນະຄອນເຢຣູຊາເລັມ, ແຕ່ເພິ່ນກໍໄດ້ອອກໄປຢ້ຽມຢາມປະຊາຊົນສະເໝີ, ຕັ້ງແຕ່ເບເອນເຊບາທາງພາກໃຕ້ ຈົນຮອດສົ້ນສຸດຂອງເຂດເນີນພູເອຟຣາອິມທາງພາກເໜືອ ເພື່ອຮຽກຮ້ອງປະຊາຊົນໃຫ້ຄືນມາຫາພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາ.

5ເພິ່ນໄດ້ແຕ່ງຕັ້ງພວກຜູ້ຕັດສິນປະຈຳແຕ່ລະເມືອງຂອງຢູດາຍທີ່ມີປ້ອມປ້ອງກັນ

6ແລະໄດ້ແນະນຳພວກເຂົາວ່າ, “ເມື່ອກ່າວຄຳຕັດສິນນັ້ນ ຈົ່ງລະວັງໃຫ້ດີ; ພວກທ່ານບໍ່ໄດ້ເຮັດຕາມອຳນາດຂອງມະນຸດ, ແຕ່ເຮັດຕາມອຳນາດຂອງພຣະເຈົ້າຢາເວ ແລະພຣະອົງສະຖິດຢູ່ນຳພວກທ່ານເມື່ອພວກທ່ານກ່າວຄຳຕັດສິນລົງໂທດ.

7ຈົ່ງຢຳເກງພຣະເຈົ້າຢາເວ ແລະປະພຶດຢ່າງລະມັດລະວັງ, ຍ້ອນວ່າພຣະເຈົ້າຢາເວ ພຣະເຈົ້າຂອງພວກເຮົາບໍ່ຜ່ອນຜັນຄວາມຜິດໃດໆ ຫລືຕັດສິນເຂົ້າຂ້າງ ຫລືຮັບສິນຈ້າງລາງວັນໃດໆທັງສິ້ນ.”

8ໃນນະຄອນເຢຣູຊາເລັມ ເຢໂຮຊາຟັດໄດ້ແຕ່ງຕັ້ງຊາວເລວີ, ພວກປະໂຣຫິດ ແລະຊາວເມືອງຊັ້ນຜູ້ນຳບາງຄົນ ໃຫ້ເປັນຜູ້ຕັດສິນຄວາມ ໃນກໍລະນີທີ່ກ່ຽວຂ້ອງກັບການຝ່າຝືນກົດບັນຍັດຂອງພຣະເຈົ້າຢາເວ ຫລືການຂັດແຍ່ງທາງດ້ານກົດໝາຍລະຫວ່າງປະຊາຊົນໃນເມືອງ.

9ເພິ່ນໄດ້ໃຫ້ຄຳແນະນຳແກ່ພວກເຂົາດັ່ງນີ້: “ພວກທ່ານຕ້ອງປະຕິບັດໜ້າທີ່ຂອງພວກທ່ານດ້ວຍຄວາມຢຳເກງພຣະເຈົ້າຢາເວ ແລະເຊື່ອຟັງພຣະອົງຢ່າງສັດຊື່ໃນທຸກໆສິ່ງທີ່ພວກທ່ານເຮັດ.

10ເມື່ອໃດທີ່ຊາວເມືອງອື່ນໆນຳຄະດີຂ້າຄົນ ຫລືການຝ່າຝືນກົດໝາຍ ຫລືຝ່າຝືນຄຳສັ່ງມາຫາພວກທ່ານ; ພວກທ່ານຕ້ອງແນະນຳພວກເຂົາຢ່າງລະມັດລະວັງວ່າ ພວກເຂົາຄວນປະພຶດຢ່າງໃດໃນລະຫວ່າງການສອບສວນ ເພື່ອວ່າພວກເຂົາຈະບໍ່ເປັນຝ່າຍຜິດໂດຍເຮັດບາບຕໍ່ສູ້ພຣະເຈົ້າຢາເວ. ເວັ້ນເສຍແຕ່ພວກທ່ານຂືນເຮັດເທົ່ານັ້ນ ພວກທ່ານກັບພວກພີ່ນ້ອງຊາວເມືອງກໍຈະຖືກພຣະອົງໂກດຮ້າຍຢ່າງໜັກ. ແຕ່ຖ້າພວກທ່ານປະຕິບັດຕາມໜ້າທີ່ຂອງພວກທ່ານ ພວກທ່ານກໍຈະບໍ່ເປັນຝ່າຍຜິດ.

11ມະຫາປະໂຣຫິດອາມາຣີຢາຈະມີອຳນາດສູງສຸດໃນທຸກໆຄະດີ ກ່ຽວກັບກິດຈະການວຽກງານຂອງພຣະເຈົ້າຢາເວ ແລະເຊບາດີຢາລູກຊາຍຂອງອິດຊະມາເອນ ທີ່ເປັນຜູ້ປົກຄອງຂອງຢູດາຍ ຈະມີອຳນາດເດັດຂາດກ່ຽວກັບຄະດີດ້ານພົນລະເຮືອນ. ຊາວເລວີຕ້ອງຮັບຜິດຊອບເບິ່ງວ່າ ຄຳຕັດສິນຂອງສານນັ້ນໄດ້ຖືກປະຕິບັດຕາມຫລືບໍ່. ຈົ່ງກ້າຫານແລະເຮັດຕາມຄຳແນະນຳເຫຼົ່ານີ້ ແລະຂໍໃຫ້ພຣະເຈົ້າຢາເວສະຖິດນຳຝ່າຍທີ່ຖືກຕ້ອງ.”

← Chapter 18 Jump to: Chapter 20 →