2 Chronicles 14

Lao Bible 2012 (ພຣະຄຳພີສັກສິ)

← Chapter 13 Jump to: Chapter 15 →

1ກະສັດອາບີຢາໄດ້ຕາຍໄປ ແລະຖືກຝັງໄວ້ຢູ່ໃນອຸບມຸງແຫ່ງກະສັດໃນເມືອງຂອງດາວິດ. ເຈົ້າອາສາລູກຊາຍຂອງເພິ່ນໄດ້ຂຶ້ນເປັນກະສັດປົກຄອງແທນ; ແລະພາຍໃຕ້ການປົກຄອງຂອງອາສາ ປະເທດຊາດຈຶ່ງສະຫງົບສຸກເປັນເວລາສິບປີ.

2ອາສາໄດ້ໃຊ້ຊີວິດເປັນທີ່ພໍໃຈພຣະເຈົ້າຢາເວ ພຣະເຈົ້າຂອງເພິ່ນ ໂດຍໄດ້ເຮັດສິ່ງທີ່ຖືກຕ້ອງແລະດີງາມ.

3ເພິ່ນໄດ້ໂຄ່ນລົ້ມແທ່ນບູຊາຂອງຊາວຕ່າງດ້າວ ແລະບ່ອນຂາບໄຫວ້ຂອງຄົນບໍ່ນັບຖືພຣະເຈົ້າ ທັງໄດ້ທຳລາຍເສົາຫີນສັກສິດ ແລະໄດ້ຕັດສັນຍາລັກຂອງຮູບເຈົ້າແມ່ອາເຊຣາລົງ.

4ເພິ່ນໄດ້ສັ່ງປະຊາຊົນຊາວຢູດາ ໃຫ້ເຮັດຕາມຄວາມປະສົງຂອງພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາ ແລະໃຫ້ເຊື່ອຟັງຄຳສັ່ງສອນແລະຂໍ້ຄຳສັ່ງຂອງພຣະອົງ.

5ຍ້ອນເພິ່ນໄດ້ລຶບລ້າງບ່ອນຂາບໄຫວ້ຂອງຄົນບໍ່ນັບຖືພຣະເຈົ້າ ແລະແທ່ນບູຊາເຄື່ອງຫອມຈາກເມືອງທັງໝົດຂອງຢູດາຍ ພາຍໃຕ້ການປົກຄອງຂອງເພິ່ນ ຢູດາຍຈຶ່ງເກີດມີຄວາມສະຫງົບສຸກ.

6ເພິ່ນໄດ້ສ້າງປ້ອມປ້ອງກັນເມືອງຕ່າງໆຂອງຢູດາຍໃນສະໄໝນັ້ນ ແລະເສິກສົງຄາມຈຶ່ງບໍ່ເກີດຂຶ້ນເປັນເວລາຫລາຍປີ ເພາະພຣະເຈົ້າຢາເວໄດ້ໃຫ້ເພິ່ນມີຄວາມສະຫງົບສຸກ.

7ເພິ່ນໄດ້ບອກປະຊາຊົນຊາວຢູດາວ່າ, “ໃຫ້ພວກເຮົາສ້າງປ້ອມປ້ອງກັນເມືອງໄວ້ ໂດຍສ້າງກຳແພງແລະຫໍຄອຍຕ່າງໆ ແລະປະຕູເມືອງທີ່ມີກອນເປັນເຫລັກແທ່ງ. ພວກເຮົາຄຸ້ມຄອງດິນແດນໄດ້ ເພາະພວກເຮົາໄດ້ເຮັດຕາມຄວາມປະສົງຂອງພຣະເຈົ້າຢາເວ ພຣະເຈົ້າຂອງພວກເຮົາ. ພຣະອົງໄດ້ປົກປັກຮັກສາພວກເຮົາ ແລະໄດ້ໃຫ້ພວກເຮົາມີຄວາມປອດໄພທຸກດ້ານ.” ສະນັ້ນ ພວກເຂົາຈຶ່ງໄດ້ດຳເນີນການສ້າງສາແລະຈະເລີນຮຸ່ງເຮືອງຂຶ້ນ.

8ກະສັດອາສາມີທະຫານສາມຮ້ອຍພັນຄົນຈາກເຜົ່າຢູດາ ຊຶ່ງປະກອບອາວຸດດ້ວຍໂລ້ແລະຫອກ ແລະມີທະຫານສອງຮ້ອຍແປດສິບພັນຄົນຈາກເຜົ່າເບັນຢາມິນ ຊຶ່ງປະກອບອາວຸດດ້ວຍໂລ້ແລະໜ້າທະນູ. ທຸກຄົນເປັນທະຫານທີ່ເກັ່ງກ້າແລະໄດ້ຮັບການຝຶກແອບເປັນຢ່າງດີ.

9ມີຊາວເອທີໂອເປຍຜູ້ໜຶ່ງຊື່ວ່າ ເຊຣາ; ລາວໄດ້ຮຸກຮານຢູດາຍ ໂດຍໄດ້ນຳກອງທັບທີ່ມີທະຫານໜຶ່ງລ້ານຄົນພ້ອມທັງລົດຮົບສາມຮ້ອຍຄັນ ແລະໄດ້ບຸກໜ້າມາຮອດເມືອງມາເຣຊາ.

10ອາສາໄດ້ຍົກທັບອອກໄປສູ້ຮົບເຊຣາ ແລະທັງສອງຝ່າຍໄດ້ຕັ້ງທີ່ໝັ້ນຢູ່ໃນຮ່ອມພູເຊຟາທາໃກ້ກັບເມືອງມາເຣຊາ.

11ອາສາໄດ້ພາວັນນາອະທິຖານຫາພຣະເຈົ້າຢາເວ ພຣະເຈົ້າຂອງເພິ່ນວ່າ, “ຂ້າແດ່ພຣະເຈົ້າຢາເວ ພຣະອົງຊ່ວຍກອງທັບທີ່ອ່ອນແຮງໄດ້ຢ່າງ່າຍດາຍ ໃຫ້ເທົ່າກັບກອງທັບທີ່ມີກຳລັງ. ຂ້າແດ່ພຣະເຈົ້າຢາເວ ພຣະເຈົ້າຂອງຂ້ານ້ອຍເອີຍ ບັດນີ້ ໂຜດຊ່ວຍຊູພວກຂ້ານ້ອຍດ້ວຍ ເພາະພວກຂ້ານ້ອຍເຊື່ອໝັ້ນໃນພຣະອົງແລະໃນນາມຂອງພຣະອົງ ພວກຂ້ານ້ອຍຈຶ່ງອອກມາສູ້ຮົບກອງທັບອັນໃຫຍ່ໂຕຢ່າງນີ້. ຂ້າແດ່ພຣະເຈົ້າຢາເວ ພຣະອົງເປັນພຣະເຈົ້າຂອງພວກຂ້ານ້ອຍ; ບໍ່ມີຜູ້ໃດເລີຍທີ່ຈະຫວັງຊະນະພຣະອົງໄດ້.”

12ພຣະເຈົ້າຢາເວໄດ້ເອົາຊະນະກອງທັບຂອງຊາວເອທີໂອເປຍ ເມື່ອອາສາ ແລະກອງທັບຊາວຢູດາບຸກໂຈມຕີພວກເຂົາ. ພວກເຂົາໄດ້ປົບໜີໄປ

13ແລະອາສາພ້ອມດ້ວຍທະຫານຂອງຕົນໄດ້ໄລ່ຕາມພວກເຂົາໄປ ຈົນຮອດເມືອງເກຣາກ. ທະຫານປະເທດເອທີໂອເປຍຕັ້ງຫລວງຫລາຍໄດ້ຖືກຂ້າ ຈົນລວບລວມທະຫານເຂົ້າມາສູ້ຮົບບໍ່ໄດ້. ພວກເຂົາຖືກຕີໃຫ້ພ່າຍແພ້ດ້ວຍອຳນາດຂອງພຣະເຈົ້າຢາເວ ແລະກອງທັບຂອງເພິ່ນ. ດັ່ງນັ້ນ ກອງທັບຈຶ່ງຢຶດເຄື່ອງຂອງມາໄດ້ຢ່າງຫລວງຫລາຍ.

14ແລ້ວພວກເຂົາກໍສາມາດທຳລາຍເມືອງຕ່າງໆທີ່ຢູ່ອ້ອມແອ້ມຂອບເຂດເມືອງເກຣາກ ເພາະປະຊາຊົນໃນທີ່ນັ້ນຢ້ານກົວພຣະເຈົ້າຢາເວຫລາຍ. ກອງທັບປຸ້ນສະດົມເມືອງ ແລະຢຶດສິ່ງຂອງຕ່າງໆມາໄດ້ຢ່າງຫລວງຫລາຍ.

15ພວກເຂົາໄດ້ໂຈມຕີຄ້າຍພັກຂອງຄົນລ້ຽງແກະບາງບ່ອນ ໂດຍໄດ້ຕ້ອນເອົາຝູງແກະແລະຝູງອູດໄປເປັນຈຳນວນຫລວງຫລາຍ. ແລ້ວພວກເຂົາກໍກັບຄືນສູ່ນະຄອນເຢຣູຊາເລັມ.

← Chapter 13 Jump to: Chapter 15 →