2 Chronicles 13

Lao Bible 2012 (ພຣະຄຳພີສັກສິ)

← Chapter 12 Jump to: Chapter 14 →

1ໃນຣາຊການທີສິບແປດຂອງກະສັດເຢໂຣໂບອາມແຫ່ງອິດສະຣາເອນ ເຈົ້າອາບີຢາໄດ້ຂຶ້ນເປັນກະສັດແຫ່ງຢູດາຍ

2ແລະເພິ່ນໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສາມປີ. ແມ່ຂອງເພິ່ນຊື່ວ່າມີກາອີຢາລູກສາວຂອງອູຣິເອນຊາວເມືອງກີເບອາ. ເສິກໄດ້ເກີດຂຶ້ນລະຫວ່າງອາບີຢາ ແລະເຢໂຣໂບອາມ.

3ອາບີຢາໄດ້ຍົກທັບອອກໄປໂຈມຕີໂດຍມີທະຫານສີ່ຮ້ອຍພັນຄົນ ແລະເຢໂຣໂບອາມກໍຍົກທັບອອກໄປຕໍ່ສູ້ໂດຍມີທະຫານແປດຮ້ອຍພັນຄົນ.

4ກອງທັບທັງສອງຝ່າຍໄດ້ມາປະເຊີນໜ້າກັນທີ່ເນີນພູຂອງເອຟຣາອິມ. ກະສັດອາບີຢາໄດ້ຂຶ້ນໄປທີ່ພູເຂົາເຊມາຣາອິມ ແລະຮ້ອງໃສ່ເຢໂຣໂບອາມແລະຊາວອິດສະຣາເອນວ່າ,

5“ຈົ່ງຟັງຂ້າພະເຈົ້າໃຫ້ດີ ພວກທ່ານບໍ່ຮູ້ບໍວ່າພຣະເຈົ້າຢາເວ ພຣະເຈົ້າຂອງຊາດອິດສະຣາເອນໄດ້ເຮັດພັນທະສັນຍາ ອັນບໍ່ມີວັນລຶບລ້າງໄດ້ກັບດາວິດ ໂດຍໄດ້ມອບໃຫ້ເພິ່ນກັບເຊື້ອສາຍຂຶ້ນເປັນກະສັດປົກຄອງຊາດອິດສະຣາເອນຕະຫລອດໄປ?

6ເຢໂຣໂບອາມລູກຊາຍຂອງເນບັດໄດ້ກະບົດຕໍ່ເຈົ້າໂຊໂລໂມນ ກະສັດຂອງລາວເອງ.

7ຕໍ່ມາ ລາວໄດ້ເຕົ້າໂຮມເອົາພວກນັກເລງໝວດໜຶ່ງ ມາບັງຄັບເຣໂຫໂບອາມລູກຊາຍຂອງໂຊໂລໂມນ ຜູ້ທີ່ຍັງໜຸ່ມນ້ອຍທັງຂາດປະສົບການທີ່ຈະຕໍ່ຕ້ານພວກເຂົາ.

8ບັດນີ້ ພວກທ່ານຄິດຈະຕໍ່ສູ້ກັບອຳນາດແຫ່ງອານາຈັກຂອງພຣະເຈົ້າຢາເວທີ່ໄດ້ມອບໃຫ້ເຊື້ອສາຍຂອງກະສັດດາວິດ. ພວກທ່ານມີກອງທັບທີ່ໃຫຍ່ໂຕ ແລະທັງມີຮູບງົວຄຳ ທີ່ເຢໂຣໂບອາມໄດ້ສ້າງຂຶ້ນເປັນພະຂອງພວກທ່ານ.

9ພວກທ່ານໄດ້ຂັບໄລ່ບັນດາປະໂຣຫິດຂອງພຣະເຈົ້າຢາເວ ເຊື້ອສາຍຂອງອາໂຣນ ໃຫ້ອອກໜີໄປ ແລະພວກທ່ານຍັງໄດ້ຂັບໄລ່ຊາວເລວີໃຫ້ອອກໜີດ້ວຍ. ພວກທ່ານໄດ້ແຕ່ງຕັ້ງປະໂຣຫິດຂຶ້ນແທນພວກເຂົາໃນແບບດຽວກັນກັບຊົນຊາດອື່ນໆໄດ້ເຮັດ. ຄົນໃດທີ່ນຳເອົາງົວເຖິກໜຸ່ມ ຫລືແກະເຖິກເຈັດໂຕມາມອບໃຫ້ພວກທ່ານ ຄົນນັ້ນກໍໄດ້ຖືກແຕ່ງຕັ້ງໃຫ້ເປັນປະໂຣຫິດສຳລັບພະຂອງພວກທ່ານ.

10ແຕ່ພວກເຮົາຍັງບົວລະບັດຮັບໃຊ້ພຣະເຈົ້າຢາເວ ພຣະເຈົ້າຂອງພວກເຮົາ ແລະບໍ່ໄດ້ປະຖິ້ມພຣະອົງ. ພວກປະໂຣຫິດທີ່ໄດ້ສືບເຊື້ອສາຍຈາກອາໂຣນ ກໍເຮັດໜ້າທີ່ຮັບໃຊ້ພຣະເຈົ້າຢາເວໂດຍມີຊາວເລວີຊ່ວຍພວກເຂົາ.

11ທຸກເຊົ້າແລະທຸກແລງ ພວກເຂົາໄດ້ຖວາຍເຄື່ອງຫອມ ແລະຂ້າສັດເຜົາທັງໂຕບູຊາແກ່ພຣະເຈົ້າຢາເວ. ພວກເຂົາຖວາຍເຂົ້າຈີ່ທີ່ເທິງໂຕະ ຊຶ່ງຖືກຊຳລະໃຫ້ໝົດມົນທິນແລ້ວຕາມພິທີ ແລະທຸກແລງພວກເຂົາໄດ້ໄຕ້ຕະກຽງເທິງຫລັກຮອງຕະກຽງທີ່ເຮັດດ້ວຍຄຳ. ພວກເຮົາປະຕິບັດຕາມສິ່ງທີ່ພຣະເຈົ້າຢາເວ ພຣະເຈົ້າຂອງພວກເຮົາໄດ້ສັ່ງໄວ້, ແຕ່ພວກທ່ານໄດ້ປະຖິ້ມພຣະອົງ.

12ພຣະເຈົ້າເອງເປັນຜູ້ນຳພາຂອງພວກເຮົາ ແລະປະໂຣຫິດຂອງພຣະອົງກໍຢູ່ທີ່ນີ້ໂດຍມີແກຕຽມພ້ອມທີ່ຈະເປົ່າ ເພື່ອເອີ້ນພວກເຮົາເຂົ້າສູ້ຮົບພວກທ່ານ. ປະຊາຊົນອິດສະຣາເອນເອີຍ ຢ່າຕໍ່ສູ້ພຣະເຈົ້າຢາເວ ພຣະເຈົ້າຂອງບັນພະບຸລຸດພວກທ່ານເທາະ ພວກທ່ານຕີຊະນະບໍ່ໄດ້ດອກ.”

13ຂະນະດຽວກັນນັ້ນ ເຢໂຣໂບອາມກໍໄດ້ສົ່ງທະຫານບາງສ່ວນຂອງຕົນ ມາດັກສະກັດທາງແນວຫລັງຂອງກອງທັບຢູດາ ສ່ວນພວກທີ່ເຫຼືອກໍໄດ້ປະເຊີນໜ້າກັນທີ່ແນວໜ້າ.

14ພວກທະຫານຢູດາໄດ້ແນມໄປອ້ອມຮອບ ແລະເຫັນວ່າພວກຕົນຖືກປິດລ້ອມແລ້ວ. ພວກເຂົາຈຶ່ງຂໍຮ້ອງພຣະເຈົ້າຢາເວໃຫ້ຊ່ວຍເຫລືອ ແລະພວກປະໂຣຫິດກໍເປົ່າແກຂຶ້ນ.

15ທະຫານຢູດາໄດ້ໂຮຮ້ອງຂຶ້ນ ແລະໂດຍການນຳພາຂອງອາບີຢາ ພວກເຂົາໄດ້ບຸກໂຈມຕີສັດຕູ; ພຣະເຈົ້າໄດ້ເອົາຊະນະເຢໂຣໂບອາມ ແລະກອງທັບອິດສະຣາເອນ.

16ຊາວອິດສະຣາເອນໄດ້ປົບໜີຈາກຊາວຢູດາໄປ ແລະພຣະເຈົ້າໄດ້ໃຫ້ຊາວຢູດາມີອຳນາດເໜືອພວກເຂົາ.

17ອາບີຢາແລະກອງທັບຂອງຕົນໄດ້ຕີກອງທັບອິດສະຣາເອນໃຫ້ພ່າຍແພ້ຢ່າງໜັກ ຄືທະຫານທີ່ເກັ່ງກ້າຂອງກອງທັບອິດສະຣາເອນ ເຄິ່ງລ້ານຄົນໄດ້ຖືກຂ້າ.

18ດັ່ງນັ້ນ ປະຊາຊົນຊາວຢູດາຈຶ່ງໄດ້ໄຊຊະນະເໜືອຊາວອິດສະຣາເອນ ເພາະພວກເຂົາໄດ້ເພິ່ງພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາ.

19ອາບີຢາໄດ້ໄລ່ຕິດຕາມກອງທັບຂອງເຢໂຣໂບອາມໄປ ແລະຢຶດຄອງເອົາບາງເມືອງຂອງເພິ່ນໄດ້ເຊັ່ນ: ເບັດເອນ, ເຢຊານາ ແລະເອຟະໂຣນ ພ້ອມທັງໝູ່ບ້ານຕ່າງໆທີ່ຢູ່ໃກ້ເມືອງເຫຼົ່ານີ້.

20ເຢໂຣໂບອາມບໍ່ໄດ້ອຳນາດຂອງຕົນຄືນມາເລີຍ ຕະຫລອດຊົ່ວຣາຊການຂອງອາບີຢາ. ໃນທີ່ສຸດພຣະເຈົ້າຢາເວໄດ້ຕີເພິ່ນລົງ ແລະເພິ່ນໄດ້ຕາຍໄປ.

21ສ່ວນອາບີຢານັ້ນຍິ່ງມີອຳນາດຫລາຍຂຶ້ນ. ເພິ່ນມີເມຍສິບສີ່ຄົນ ແລະມີລູກຊາຍຊາວສອງຄົນແລະມີລູກສາວສິບຫົກຄົນ.

22ປະຫວັດສາດຢ່າງອື່ນອີກຂອງກະສັດອາບີຢາ ຄືສິ່ງທີ່ເພິ່ນໄດ້ເວົ້າ ແລະໄດ້ເຮັດແມ່ນໄດ້ຖືກບັນທຶກໄວ້ໃນ ປຶ້ມປະຫວັດສາດຂອງຜູ້ທຳນວາຍອິດໂດ.

← Chapter 12 Jump to: Chapter 14 →