2 Chronicles 7

Lao Bible 2012 (ພຣະຄຳພີສັກສິ)

← Chapter 6 Jump to: Chapter 8 →

1ເມື່ອກະສັດໂຊໂລໂມນໄດ້ພາວັນນາອະທິຖານຈົບແລ້ວ ກໍມີໄຟລົງມາຈາກສະຫວັນລຸກໄໝ້ເຄື່ອງບູຊາຕ່າງໆ ແລະສະຫງ່າຣາສີຂອງພຣະເຈົ້າຢາເວກໍຫຸ້ມເຕັມຢູ່ທີ່ພຣະວິຫານ.

2ຍ້ອນວິຫານຂອງພຣະເຈົ້າຢາເວເຕັມດ້ວຍສະຫງ່າຣາສີຂອງພຣະເຈົ້າຢາເວ ບັນດາປະໂຣຫິດຈຶ່ງບໍ່ອາດເຂົ້າໄປໃນວິຫານຂອງພຣະເຈົ້າຢາເວໄດ້.

3ເມື່ອປະຊາຊົນອິດສະຣາເອນໄດ້ເຫັນໄຟລົງມາ ແລະສະຫງ່າຣາສີຂອງພຣະເຈົ້າຢາເວປົກຄຸມຢູ່ເຕັມພຣະວິຫານເຊັ່ນນັ້ນ; ພວກເຂົາກໍກາບລົງກັບພື້ນດິນແລະນະມັດສະການແລະໂມທະນາຂອບພຣະຄຸນພຣະເຈົ້າຢາເວ ທັງສັນລະເສີນຄຸນງາມຄວາມດີ ແລະຄວາມຮັກອັນໝັ້ນຄົງຂອງພຣະອົງດຳລົງຢູ່ຕະຫລອດໄປເປັນນິດ.

4ແລ້ວກະສັດໂຊໂລໂມນພ້ອມກັບປະຊາຊົນທັງໝົດ ກໍໄດ້ຖວາຍເຄື່ອງບູຊາຕ່າງໆແກ່ພຣະເຈົ້າຢາເວ.

5ເພິ່ນໄດ້ຂ້າງົວ ຊາວສອງພັນໂຕ ແລະແກະ ໜຶ່ງຮ້ອຍຊາວພັນໂຕ ຖວາຍເພື່ອຄວາມສາມັກຄີທຳ. ດັ່ງນັ້ນ ກະສັດແລະປະຊາຊົນທັງໝົດຈຶ່ງໄດ້ຖວາຍວິຫານຂອງພຣະເຈົ້າ.

6ບັນດາປະໂຣຫິດໄດ້ຢືນປະຈຳບ່ອນທີ່ຖືກມອບໝາຍໃຫ້ ແລະຊື່ໜ້າພວກເຂົາແມ່ນຊາວເລວີທີ່ກຳລັງສັນລະເສີນພຣະເຈົ້າຢາເວ ດ້ວຍເຄື່ອງດົນຕຼີຊຶ່ງກະສັດດາວິດໄດ້ຈັດຫາໃຫ້ເພື່ອຮ້ອງເພງໂມທະນາຂອບພຣະຄຸນແກ່ພຣະເຈົ້າຢາເວ ເພາະຄວາມຮັກໝັ້ນຄົງຂອງພຣະອົງດຳລົງຢູ່ຕະຫລອດໄປເປັນນິດ ຕາມທີ່ກະສັດດາວິດໄດ້ມອບໝາຍໃຫ້. ໃນຂະນະທີ່ປະຊາຊົນທັງໝົດໄດ້ຢືນຢູ່ນັ້ນ ພວກປະໂຣຫິດກໍໄດ້ພາກັນເປົ່າແກ.

7ໂຊໂລໂມນໄດ້ຖວາຍສ່ວນກາງຂອງເດີ່ນ ເຂດດ້ານໜ້າວິຫານຂອງພຣະເຈົ້າຢາເວ ແລະຕໍ່ມາ ເພິ່ນໄດ້ຖວາຍເຄື່ອງບູຊາໃນທີ່ນັ້ນເປັນຕົ້ນ: ການບູຊາເຜົາທັງໝົດ, ພືດຜົນເປັນເມັດ ແລະໄຂມັນທີ່ໄດ້ມາຈາກເຄື່ອງຖວາຍເພື່ອຄວາມສາມັກຄີທຳ. ເພິ່ນໄດ້ເຮັດເຊັ່ນນີ້ເພາະແທ່ນບູຊາທອງສຳຣິດຊຶ່ງເພິ່ນໄດ້ເຮັດນັ້ນ ນ້ອຍໂພດສຳລັບບັນຈຸເຄື່ອງຖວາຍເຫຼົ່ານັ້ນທັງໝົດ.

8ໂຊໂລໂມນກັບປະຊາຊົນອິດສະຣາເອນທັງໝົດໄດ້ສະຫລອງເທດສະການປຸກຕຸບຢູ່ເປັນເວລາເຈັດວັນ. ປະຊາຊົນເປັນຈຳນວນຫລວງຫລາຍທີ່ຢູ່ໄກ ຄືຈາກທາງເໜືອສຸດຂອງຊ່ອງແຄບຮາມັດ ແລະເຂດແດນເບື້ອງໃຕ້ຂອງປະເທດເອຢິບກໍໄດ້ມາຮ່ວມນຳ.

9ພວກເຂົາໄດ້ຢູ່ທີ່ນັ້ນເປັນເວລາເຈັດວັນ ເພື່ອອຸທິດຖວາຍແທ່ນບູຊາ ແລະຢູ່ອີກເຈັດວັນ ເພື່ອສະຫລອງເທດສະການ. ໃນມື້ສຸດທ້າຍ ພວກເຂົາໄດ້ສະຫລອງມື້ປິດງານ

10ແລະວັນຕໍ່ມາ ຄືວັນທີຊາວສາມ ຂອງເດືອນທີເຈັດ ໂຊໂລໂມນໄດ້ໃຫ້ປະຊາຊົນກັບເມືອເຮືອນໃຜລາວ. ພວກເຂົາຊົມຊື່ນຍິນດີກັບຄຳອວຍພອນ ທີ່ພຣະເຈົ້າຢາເວໄດ້ໃຫ້ແກ່ປະຊາຊົນອິດສະຣາເອນຂອງພຣະອົງ, ແກ່ດາວິດ ແລະແກ່ໂຊໂລໂມນ.

11ຫລັງຈາກກະສັດໂຊໂລໂມນໄດ້ສ້າງວິຫານຂອງພຣະເຈົ້າຢາເວແລະວັງຂອງເພິ່ນສຳເລັດ ແລ້ວກະສັດໂຊໂລໂມນໄດ້ເຮັດຂ້າງໃນວິຫານຂອງພຣະເຈົ້າຢາເວແລະວັງຂອງເພິ່ນໃຫ້ສຳເລັດຮຽບຮ້ອຍຕາມແບບແຜນທັງໝົດນັ້ນ,

12ຂະນະນັ້ນ ພຣະເຈົ້າຢາເວໄດ້ປາກົດຕໍ່ເພິ່ນໃນເວລາກາງຄືນ ແລະໄດ້ກ່າວຕໍ່ເພິ່ນວ່າ, “ເຮົາໄດ້ຍິນຄຳພາວັນນາອະທິຖານຂອງເຈົ້າແລ້ວ ແລະເຮົາກໍຍິນດີຮັບເອົາວິຫານນີ້ ເພື່ອເປັນບ່ອນຖວາຍເຄື່ອງບູຊາແກ່ເຮົາ.

13ເມື່ອໃດເຮົາປິດຟ້າສະຫວັນກັກຝົນບໍ່ໃຫ້ຕົກ ຫລືສົ່ງຝູງຕັກແຕນມາກິນເຄື່ອງປູກຂອງຝັງ ຫລືສົ່ງພະຍາດລະບາດມາສູ່ປະຊາຊົນຂອງເຮົາ,

14ຖ້າປະຊາຊົນຂອງເຮົາຜູ້ທີ່ພວກເຂົາເອີ້ນກັນໂດຍຊື່ຂອງເຮົາຖ່ອມຕົວລົງ, ພາວັນນາອະທິຖານ, ຊອກຫາໜ້າເຮົາ ພ້ອມທັງກັບໃຈໃໝ່ ແລະຫັນໜີຈາກຄວາມຊົ່ວທີ່ພວກເຂົາກຳລັງເຮັດຢູ່; ແລ້ວທີ່ສະຫວັນ ເຮົາກໍຈະຟັງຄຳພາວັນນາອະທິຖານຂອງພວກເຂົາ, ໃຫ້ອະໄພການບາບຂອງພວກເຂົາ ແລະເຮັດໃຫ້ດິນແດນຂອງພວກເຂົາຈະເລີນຮຸ່ງເຮືອງຂຶ້ນໃໝ່.

15ເຮົາຈະເຝົ້າເບິ່ງວິຫານນີ້ ແລະຕຽມຟັງຄຳພາວັນນາອະທິຖານຂອງທຸກໆຄົນທີ່ຮ້ອງຫາເຮົາໃນທີ່ນີ້

16ເພາະເຮົາໄດ້ເລືອກເອົາສະຖານທີ່ນີ້ເປັນບ່ອນສັກສິດ ໃຫ້ພວກເຂົານະມັດສະການເຮົາຕະຫລອດໄປ. ເຮົາຈະເຝົ້າເບິ່ງສະຖານທີ່ນີ້ ແລະປົກປັກຮັກສາຢູ່ທຸກເວລາ.

17ຖ້າເຈົ້າຮັບໃຊ້ເຮົາຢ່າງສັດຊື່ ດັ່ງທີ່ດາວິດພໍ່ຂອງເຈົ້າໄດ້ເຮັດມາ ຄືເຊື່ອຟັງກົດບັນຍັດທັງຫລາຍຂອງເຮົາ ແລະຂັບຕາມທຸກໆສິ່ງທີ່ເຮົາໄດ້ສັ່ງເຈົ້າ,

18ເຮົາກໍຈະຮັກສາຄຳສັນຍາທີ່ເຮົາໄດ້ເຮັດກັບດາວິດພໍ່ຂອງເຈົ້າ ຄືເວລາທີ່ເຮົາໄດ້ບອກລາວວ່າ ຊາດອິດສະຣາເອນຈະມີເຊື້ອສາຍຂອງລາວ ປົກຄອງປະເທດສືບໆໄປ.

19ແຕ່ຖ້າເຈົ້າແລະປະຊາຊົນຂອງເຈົ້າ ບໍ່ເຊື່ອຟັງກົດບັນຍັດ ແລະຂໍ້ຄຳສັ່ງທີ່ເຮົາໄດ້ໃຫ້ພວກເຈົ້າ ແລະຫັນໄປຂາບໄຫວ້ບັນດາພະອື່ນ,

20ເຮົາກໍຈະຍົກຍ້າຍພວກເຈົ້າອອກຈາກດິນແດນ ຊຶ່ງເຮົາໄດ້ໃຫ້ພວກເຈົ້າ ແລະເຮົາຈະປະຖິ້ມພຣະວິຫານນີ້ ຊຶ່ງເຮົາໄດ້ເຮັດໃຫ້ເປັນສະຖານທີ່ສັກສິດເພື່ອນະມັດສະການເຮົາ. ປະຊາຊົນທົ່ວທຸກໆບ່ອນຈະຫຍໍ້ຫຍັນ ແລະໝິ່ນປະໝາດສະຖານທີ່ນີ້.

21ໃນເວລານີ້ ພຣະວິຫານເປັນທີ່ຍົກຍໍຢ່າງສູງສົ່ງແທ້, ແຕ່ແລ້ວໃນເວລານັ້ນ ທຸກໆຄົນທີ່ຜ່ານໄປກໍຈະສະດຸ້ງໃນໃຈ ແລະຖາມວ່າ, ‘ເປັນຫຍັງພຣະເຈົ້າຢາເວຈຶ່ງເຮັດກັບດິນແດນ ແລະວິຫານເຊັ່ນນີ້?’

22ຄົນທັງຫລາຍຈະຕອບວ່າ, ‘ກໍເພາະພວກເຂົາປະຖິ້ມພຣະເຈົ້າຢາເວ ພຣະເຈົ້າຂອງພວກເຂົາ ຜູ້ທີ່ໄດ້ນຳພາບັນພະບຸລຸດຂອງພວກເຂົາອອກມາຈາກປະເທດເອຢິບ. ພວກເຂົາຈົງຮັກພັກດີຕໍ່ບັນດາພະອື່ນ ແລະຂາບໄຫວ້ພະເຫຼົ່ານັ້ນ. ສະນັ້ນ ພຣະອົງຈຶ່ງນຳໄພພິບັດຫລາຍຢ່າງມາສູ່ພວກເຂົາ.”’

← Chapter 6 Jump to: Chapter 8 →