2 Chronicles 5

Lao Bible 2012 (ພຣະຄຳພີສັກສິ)

← Chapter 4 Jump to: Chapter 6 →

1ເມື່ອກະສັດໂຊໂລໂມນໄດ້ສ້າງວິຫານຂອງພຣະເຈົ້າຢາເວສຳເລັດແລ້ວ ເພິ່ນກໍເອົາເຄື່ອງທັງໝົດ ມີດັ່ງນີ້: ເງິນ, ຄຳ ແລະເຄື່ອງອື່ນໆທີ່ພໍ່ຂອງເພິ່ນໄດ້ອຸທິດຖວາຍ ເຂົ້າໄປໄວ້ໃນຫ້ອງເກັບເຄື່ອງຂອງພຣະວິຫານຂອງພຣະເຈົ້າ.

2ແລ້ວກະສັດໂຊໂລໂມນກໍໄດ້ເອີ້ນປະຊຸມ ພວກຜູ້ນຳທຸກເຜົ່າແລະທຸກຕະກຸນຂອງຊາດອິດສະຣາເອນທີ່ນະຄອນເຢຣູຊາເລັມ ເພື່ອນຳຫີບພັນທະສັນຍາຂອງພຣະເຈົ້າຢາເວຈາກພູເຂົາຊີໂອນ ເມືອງຂອງດາວິດ ມາທີ່ພຣະວິຫານ.

3ພວກເຂົາທັງໝົດໄດ້ມາພ້ອມພຽງກັນໃນເວລາສະຫລອງເທດສະການປຸກຕູບຢູ່.

4ເມື່ອບັນດາຜູ້ນຳໄດ້ມາເຕົ້າໂຮມກັນໝົດແລ້ວ ພວກເລວີກໍໄດ້ຍົກຫີບນັ້ນ

5ແລະຫາມເຂົ້າໄປໃນພຣະວິຫານ. ບັນດາປະໂຣຫິດກັບພວກເລວີຍັງຍົກຍ້າຍຫໍເຕັນບ່ອນຊຸມນຸມ ແລະເຄື່ອງໃຊ້ສັກສິດທັງໝົດປະຈຳຫໍເຕັນເຂົ້າໄປໃນພຣະວິຫານ.

6ກະສັດໂຊໂລໂມນແລະປະຊາຊົນຊາວອິດສະຣາເອນ ໄດ້ມາປະຊຸມກັນຕໍ່ໜ້າຫີບ ແລະໄດ້ຖວາຍແກະແລະງົວ ຈຳນວນຫລວງຫລາຍຈົນນັບບໍ່ຖ້ວນເປັນເຄື່ອງບູຊາ.

7ແລ້ວປະໂຣຫິດກໍຫາມຫີບພັນທະສັນຍາຂອງພຣະເຈົ້າຢາເວເຂົ້າໄປໃນສະຖານທີ່ສັກສິດຂອງວິຫານ ແລະເອົາຫີບວາງໄວ້ໃນບ່ອນສັກສິດທີ່ສຸດ ຄືຢູ່ລຸ່ມເຄຣຸບ.

8ປີກຂອງເຄຣຸບນັ້ນກາງອອກປົກຫີບນັ້ນ ແລະໄມ້ຄານຫາມ.

9ຜູ້ທີ່ຢືນຢູ່ຊື່ໜ້າຂອງບ່ອນສັກສິດທີ່ສຸດ ຈຶ່ງຈະແນມເຫັນສົ້ນສຸດຂອງໄມ້ຫາມຫີບໄດ້ ແຕ່ຖ້າຈະເບິ່ງຈາກທີ່ອື່ນກໍຈະເບິ່ງບໍ່ເຫັນ. (ໄມ້ຄານຫາມຍັງຢູ່ທີ່ນັ້ນຈົນເທົ່າທຸກວັນນີ້.)

10ຢູ່ໃນຫີບນັ້ນມີພຽງແຕ່ຫີນສອງແຜ່ນ ຊຶ່ງໂມເຊໄດ້ໃສ່ລົງໄວ້ໃນນັ້ນທີ່ພູເຂົາຊີນາຍ ເມື່ອພຣະເຈົ້າຢາເວໄດ້ເຮັດພັນທະສັນຍາກັບປະຊາຊົນອິດສະຣາເອນ ໃນເວລາທີ່ພວກເຂົາໄດ້ອອກມາຈາກປະເທດເອຢິບ.

11ແລ້ວພວກປະໂຣຫິດກໍໄດ້ຖອຍອອກຈາກບ່ອນສັກສິດ. ພວກປະໂຣຫິດທັງໝົດທີ່ຢູ່ໃນທີ່ນັ້ນບໍ່ວ່າຢູ່ໃນໝວດໃດແມ່ນໄດ້ອຸທິດຖວາຍຕົວແລ້ວ.

12ຊາວເລວີທັງໝົດທີ່ເປັນນັກດົນຕຼີເຊັ່ນ: ອາສັບ, ເຮມານ ແລະເຢດູທູນ ແລະພວກລູກຊາຍຂອງພວກເຂົາຕະຫລອດທັງຍາດຕິພີ່ນ້ອງ ໂດຍຢືນຢູ່ທາງດ້ານທິດຕາເວັນອອກ ຕ່າງກໍໄດ້ນຸ່ງຜ້າປ່ານເນື້ອລະອຽດດີ ຕົບແສ່ງ ແລະດີດພິນ ຢູ່ໃກ້ແທ່ນບູຊາ. ພວກເຂົາມີປະໂຣຫິດໜຶ່ງຮ້ອຍຊາວຄົນ ເປົ່າແກປະສົມປະສານໄປນຳ.

13ພວກເປົ່າແກແລະພວກນັກຮ້ອງໄດ້ບັນເລງດ້ວຍຄວາມສອດຄ່ອງກັນ ເປັນສຽງດຽວກັນເພື່ອຖວາຍຄຳຍ້ອງຍໍສັນລະເສີນແລະໂມທະນາຂອບພຣະຄຸນແກ່ພຣະເຈົ້າຢາເວ. ໂດຍປະສົມປະສານໄປກັບສຽງແກ, ສຽງແສ່ງ ແລະສຽງເຄື່ອງດົນຕຼີອື່ນໆ; ພວກເຂົາໄດ້ເປ່ງສຽງຮ້ອງສັນລະເສີນພຣະເຈົ້າຢາເວວ່າ, “ສັນລະເສີນພຣະເຈົ້າຢາເວ ເພາະພຣະອົງຊົງຄຸນງາມຄວາມດີ ແລະຄວາມຮັກຂອງພຣະອົງ ກໍດຳລົງຢູ່ຕະຫລອດໄປເປັນນິດ.” ໃນຂະນະທີ່ພວກປະໂຣຫິດກຳລັງອອກຈາກວິຫານຂອງພຣະເຈົ້າຢາເວໄປ ທັນໃດນັ້ນ ກໍມີເມກຫຸ້ມເຕັມຢູ່ວິຫານຂອງພຣະເຈົ້າ ໂດຍມີສະຫງ່າຣາສີຂອງພຣະເຈົ້າຢາເວສາດແສງແຈ້ງທົ່ວໄປ ແລະພວກເຂົາກໍດຳເນີນພິທີນະມັດສະການຕໍ່ໄປບໍ່ໄດ້.

← Chapter 4 Jump to: Chapter 6 →