2 Chronicles 12

Lao Bible 2012 (ພຣະຄຳພີສັກສິ)

← Chapter 11 Jump to: Chapter 13 →

1ພໍເຣໂຫໂບອາມໄດ້ຂຶ້ນຄອງອຳນາດເປັນກະສັດແລ້ວ ເພິ່ນເອງແລະປະຊາຊົນກໍໄດ້ປະຖິ້ມກົດບັນຍັດຂອງພຣະເຈົ້າຢາເວ.

2ໃນຣາຊການປີທີຫ້າຂອງເຣໂຫໂບອາມ ພຣະເຈົ້າຢາເວໄດ້ລົງໂທດເພິ່ນຍ້ອນເພິ່ນບໍ່ສັດຊື່ຕໍ່ພຣະອົງ. ກະສັດຊີຊາກແຫ່ງເອຢິບໄດ້ບຸກໂຈມຕີນະຄອນເຢຣູຊາເລັມ

3ໂດຍມີກອງທັບທີ່ປະກອບດ້ວຍລົດຮົບ ໜຶ່ງພັນສອງຮ້ອຍຄັນ, ທະຫານມ້າຫົກສິບພັນຄົນ ແລະທະຫານຫລາຍເກີນກວ່າທີ່ຈະນັບໄດ້ຄືມີທະຫານເອຢິບ, ລີເບຍ, ສຸກກິດ ແລະເອທີໂອເປຍຮ່ວມຢູ່ດ້ວຍ.

4ເພິ່ນໄດ້ຢຶດເມືອງຕ່າງໆທີ່ມີປ້ອມປ້ອງກັນໃນຢູດາຍ ແລະບຸກໜ້າໄປຈົນເຖິງນະຄອນເຢຣູຊາເລັມ.

5ຜູ້ທຳນວາຍເຊມາອີຢາໄດ້ເຂົ້າໄປພົບກະສັດເຣໂຫໂບອາມ ພ້ອມກັບບັນດາຜູ້ນຳຊາວຢູດາ ທີ່ໄດ້ມາເຕົ້າໂຮມກັນທີ່ນະຄອນເຢຣູຊາເລັມ ຍ້ອນປົບໜີຈາກກະສັດຊີຊາກ. ເພິ່ນໄດ້ກ່າວແກ່ພວກເຂົາວ່າ, “ຕໍ່ໄປນີ້ແມ່ນຖ້ອຍຄຳຂອງພຣະເຈົ້າຢາເວສຳລັບພວກທ່ານ: ‘ພວກເຈົ້າໄດ້ປະຖິ້ມເຮົາ; ສະນັ້ນ ເຮົາຈຶ່ງຈະປະຖິ້ມພວກເຈົ້າໃຫ້ຊີຊາກຄືກັນ.”’

6ກະສັດແລະພວກຜູ້ນຳທັງຫລາຍໄດ້ຍອມຮັບວ່າພວກຕົນໄດ້ເຮັດບາບ ແລະພວກເຂົາເວົ້າວ່າ, “ສິ່ງທີ່ພຣະເຈົ້າຢາເວກຳລັງເຮັດຢູ່ນີ້ເປັນການຖືກຕ້ອງ.”

7ເມື່ອພຣະເຈົ້າຢາເວໄດ້ເຫັນເຊັ່ນນີ້ ຖ້ອຍຄຳຂອງພຣະເຈົ້າຢາເວໄດ້ມາເຖິງເຊມາອີຢາ ກ່າວວ່າ, “ຍ້ອນພວກເຂົາໄດ້ຍອມຮັບວ່າພວກເຂົາໄດ້ເຮັດບາບ ເຮົາຈະບໍ່ທຳລາຍພວກເຂົາ, ແຕ່ເມື່ອຊີຊາກເຂົ້າມາໂຈມຕີ ພວກເຂົາຈະລອດຊີວິດໄປໄດ້ຍາກເຕັມທີ. ນະຄອນເຢຣູຊາເລັມຈະບໍ່ໄດ້ຮັບຄວາມໂກດຮ້າຍຂອງເຮົາຢ່າງເຕັມຂະໜາດ.

8ແຕ່ຊີຊາກຈະເອົາຊະນະພວກເຂົາ ແລະພວກເຂົາກໍຈະໄດ້ຮຽນຮູ້ເຖິງຄວາມແຕກຕ່າງ ລະຫວ່າງການຮັບໃຊ້ເຮົາ ແລະການຮັບໃຊ້ບັນດາຜູ້ປົກຄອງຂອງໂລກນີ້.”

9ກະສັດຊີຊາກໄດ້ມາທີ່ນະຄອນເຢຣູຊາເລັມ ແລະກວາດເອົາຊັບສົມບັດຢູ່ໃນວິຫານຂອງພຣະເຈົ້າຢາເວແລະຣາຊວັງໄປຈົນໝົດ. ເພິ່ນໄດ້ກວາດເອົາທຸກສິ່ງ ລວມທັງໂລ້ຄຳຂອງກະສັດໂຊໂລໂມນທີ່ໄດ້ເຮັດໄວ້.

10ຕໍ່ມາ ກະສັດເຣໂຫໂບອາມໄດ້ເຮັດໂລ້ເປັນທອງສຳຣິດມາໄວ້ແທນ ແລະມອບໃຫ້ທະຫານທີ່ເຝົ້າຍາມປະຕູຣາຊວັງເປັນຜູ້ເບິ່ງແຍງ.

11ເມື່ອໃດທີ່ກະສັດເຂົ້າໄປໃນວິຫານຂອງພຣະເຈົ້າຢາເວ, ເມື່ອນັ້ນຄົນເຝົ້າຍາມປະຕູກໍຈະຖືໂລ້; ຫຼັງຈາກນັ້ນ ກໍຈະນຳໄປໄວ້ໃນຫ້ອງທະຫານຍາມຄືເກົ່າ.

12ຍ້ອນເພິ່ນຍອມຈຳນົນແກ່ພຣະເຈົ້າຢາເວ ພຣະອົງຈຶ່ງບໍ່ໂກດຮ້າຍເພິ່ນຮຸນແຮງຈົນຕ້ອງທຳລາຍເພິ່ນ ແລະເຫດການໃນຢູດາຍຈຶ່ງເປັນໄປໂດຍດີ.

13ເຈົ້າເຣໂຫໂບອາມໄດ້ປົກຄອງຢູ່ທີ່ນະຄອນເຢຣູຊາເລັມ ແລະເປັນກະສັດທີ່ມີອຳນາດໝັ້ນຄົງດີ. ເພິ່ນໄດ້ຂຶ້ນເປັນກະສັດເມື່ອເພິ່ນອາຍຸໄດ້ສີ່ສິບເອັດປີ ແລະໄດ້ປົກຄອງເປັນເວລາສິບເຈັດປີ ຢູ່ທີ່ນະຄອນເຢຣູຊາເລັມ, ເມືອງທີ່ພຣະເຈົ້າຢາເວໄດ້ເລືອກເອົາຈາກເຂດແດນທັງໝົດໃນຊາດອິດສະຣາເອນ ເພື່ອໃຫ້ນາມຊື່ຂອງພຣະອົງຕັ້ງຢູ່ທີ່ນັ້ນ. ແມ່ຂອງກະສັດເຣໂຫໂບອາມຊື່ວ່ານາອາມາຈາກດິນແດນອຳໂມນ.

14ເພິ່ນໄດ້ເຮັດໃນສິ່ງທີ່ຊົ່ວຊ້າ ເພາະເພິ່ນບໍ່ໄດ້ເອົາໃຈໃສ່ເຮັດຕາມຄວາມປະສົງຂອງພຣະເຈົ້າຢາເວ.

15ປະຫວັດຂອງກະສັດເຣໂຫໂບອາມພ້ອມຄອບຄົວ ຕັ້ງແຕ່ຕົ້ນຈົນຈົບແມ່ນໄດ້ຖືກບັນທຶກໄວ້ໃນ ປຶ້ມປະຫວັດສາດຂອງຜູ້ທຳນວາຍເຊມາອີຢາ ແລະ ປຶ້ມປະຫວັດສາດຂອງຜູ້ທຳນວາຍອິດໂດ. ເຣໂຫໂບອາມແລະເຢໂຣໂບອາມໄດ້ເຮັດເສິກກັນມາຕະຫລອດ.

16ເຣໂຫໂບອາມໄດ້ຕາຍໄປ ແລະໄດ້ຖືກຝັງໄວ້ ທີ່ອຸບມຸງແຫ່ງກະສັດໃນເມືອງຂອງດາວິດ. ແລ້ວອາບີຢາ ລູກຊາຍຂອງເພິ່ນກໍໄດ້ຂຶ້ນປົກຄອງແທນ.

← Chapter 11 Jump to: Chapter 13 →