2 Chronicles 4

Lao Bible 2012 (ພຣະຄຳພີສັກສິ)

← Chapter 3 Jump to: Chapter 5 →

1ກະສັດໂຊໂລໂມນມີແທ່ນບູຊາແທ່ນໜຶ່ງທີ່ເຮັດດ້ວຍທອງສຳຣິດ ຊຶ່ງແຕ່ລະຂ້າງແທກໄດ້ເກົ້າແມັດ ແລະສູງສີ່ແມັດເຄິ່ງ.

2ເພິ່ນຍັງໄດ້ເຮັດຂັນເປັນທອງສຳຣິດເລິກສອງແມັດຊາວເຊັນ ແລະເສັ້ນຜ່ານກາງຍາວສີ່ແມັດສີ່ສິບເຊັນ ແລະລວງອ້ອມມີສິບສາມແມັດຊາວເຊັນ.

3ທີ່ຂອບອ້ອມຮອບຂັນດ້ານນອກ ມີການຕົບແຕ່ງເປັນສອງແຖວ ຄືແຖວເທິງຢອງແຖວລຸ່ມ. ການຕົບແຕ່ງນີ້ແມ່ນໄດ້ຫລໍ່ຮູບງົວໃຫ້ເປັນເນື້ອດຽວກັນກັບຂັນ.

4ຂັນນັ້ນຕັ້ງຢູ່ເທິງຫລັງງົວສິບສອງໂຕທີ່ຫລໍ່ເປັນທອງສຳຣິດ ໂດຍສາມໂຕໃດໄດ້ປິ່ນໜ້າໄປສູ່ແຕ່ລະທິດ.

5ຂັນນັ້ນໜາເຈັດສິບຫ້າມີລີແມັດ. ຂອບຂອງຂັນຄືກັນກັບຂອບຂອງຈອກ ມັນໂຄ້ງອອກເໝືອນກີບດອກໄມ້. ຂັນນັ້ນບັນຈຸນໍ້າໄດ້ປະມານຫົກສິບພັນລິດ.

6ພວກເຂົາໄດ້ເຮັດຂັນສິບໜ່ວຍ ຄືຫ້າໜ່ວຍຕັ້ງໄວ້ຢູ່ທາງດ້ານໃຕ້ຂອງພຣະວິຫານ ແລະອີກຫ້າໜ່ວຍຕັ້ງໄວ້ທາງດ້ານເໜືອຂອງພຣະວິຫານ. ຂັນເຫຼົ່ານີ້ມີໄວ້ເພື່ອລ້າງສ່ວນຕ່າງໆຂອງສັດທີ່ນຳມາເຜົາຖວາຍບູຊາ. ນໍ້າທີ່ຢູ່ໃນຖັງໃຫຍ່ແມ່ນໃຫ້ປະໂຣຫິດໃຊ້ສຳລັບຊຳລະລ້າງ.

7ພວກເຂົາໄດ້ໃຊ້ຄຳເຮັດຕີນຮອງໂຄມໄຟສິບອັນ ຕາມແບບທີ່ໃຊ້ກັນທົ່ວໄປ ແລະໄດ້ນຳໄປວາງໄວ້ໃນຫ້ອງໂຖງຂອງພຣະວິຫານ, ຂ້າງຂວາຫ້າໜ່ວຍ ແລະຂ້າງຊ້າຍຫ້າໜ່ວຍ.

8ພວກເຂົາໄດ້ເຮັດໂຕະ ສິບໜ່ວຍ ແລະໄດ້ນຳໄປຕັ້ງໄວ້ໃນຫ້ອງໂຖງຂອງພຣະວິຫານຄືກັນ ຂ້າງຂວາຫ້າໜ່ວຍ ແລະຂ້າງຊ້າຍຫ້າໜ່ວຍ. ພວກເຂົາຍັງໄດ້ເຮັດຖ້ວຍຄຳໜຶ່ງຮ້ອຍໃບ.

9ພວກເຂົາໄດ້ເຮັດເດີ່ນຂ້າງໃນສຳລັບປະໂຣຫິດ ແລະເດີ່ນຂ້າງນອກໃຫ້ອີກດ້ວຍ. ປະຕູຂັ້ນລະຫວ່າງເດີ່ນທັງສອງນັ້ນເຮັດດ້ວຍທອງສຳຣິດ.

10ສ່ວນຂັນນັ້ນໄດ້ຕັ້ງໄວ້ຢູ່ໃກ້ແຈ ທາງດ້ານຕາເວັນອອກສ່ຽງໃຕ້ຂອງພຣະວິຫານ.

11ຮູຣາມຍັງໄດ້ເຮັດໝໍ້, ຊວ້ານ ແລະຖ້ວຍ. ລາວໄດ້ເຮັດໝົດທຸກສິ່ງທີ່ຕົນໄດ້ສັນຍາໄວ້ກັບກະສັດໂຊໂລໂມນວ່າ ຈະເຮັດໃຫ້ສຳເລັດສຳລັບວິຫານຂອງພຣະເຈົ້າ ມີດັ່ງນີ້:

12ເສົາສອງຕົ້ນ ຍອດເສົາສອງອັນສຳລັບຄໍ້າເພດານທີ່ເປັນຮູບຖ້ວຍ, ລວດລາຍເທິງຍອດເສົາແຕ່ລະອັນເປັນຮູບລູກໂສ້,

13ໝາກພີລາເປັນທອງສຳຣິດສີ່ຮ້ອຍໜ່ວຍ ລຽນສອງແຖວອ້ອມຍອດເສົາແຕ່ລະຕົ້ນ

14ກວຽນສິບລຳ ອ່າງສິບໜ່ວຍ, ຂັນນໍ້າ

15ງົວສິບສອງໂຕເພື່ອຮັບຂັນນໍ້າ.

16ໝໍ້, ຊວ້ານ ແລະສ້ອມ. ຮູຣາມນາຍຊ່າງສີມືໄດ້ເຮັດສິ່ງເຫຼົ່ານີ້ທັງໝົດ ດ້ວຍທອງສຳຣິດເພື່ອໃຊ້ໃນວິຫານຂອງພຣະເຈົ້າຢາເວ ຕາມທີ່ກະສັດໂຊໂລໂມນໄດ້ສັ່ງທຸກປະການ.

17ກະສັດໄດ້ໃຫ້ພວກເຂົາເຮັດສິ່ງທັງໝົດນັ້ນທີ່ເຕົາຫລອມ ຢູ່ໃນຮ່ອມພູຂອງແມ່ນໍ້າຈໍແດນ ລະຫວ່າງເມືອງຊຸກໂກດແລະເມືອງເຊເຣດາ

18ສະນັ້ນ ຈຶ່ງມີຫລາຍສິ່ງຊຶ່ງໄດ້ເຮັດໃນທີ່ນັ້ນໂດຍບໍ່ມີຜູ້ໃດກຳນົດໄດ້ວ່າ ໃຊ້ທອງສຳຣິດໜັກເທົ່າໃດ.

19ກະສັດໂຊໂລໂມນຍັງມີເຄື່ອງຕົບແຕ່ງວິຫານຂອງພຣະເຈົ້າທີ່ເຮັດດ້ວຍຄຳເຊັ່ນກັນ ດັ່ງນີ້: ແທ່ນບູຊາແລະໂຕະໃສ່ເຂົ້າຈີ່ທີ່ຖວາຍໄວ້;

20ຕີນຮອງໂຄມໄຟ ແລະໂຄມໄຟທີ່ເຮັດດ້ວຍຄຳນໍ້າໜຶ່ງ ຊຶ່ງໃຊ້ເພື່ອໄຕ້ຢູ່ຕໍ່ໜ້າບ່ອນສັກສິດທີ່ສຸດຕາມແຜນຜັງ;

21ດອກໄມ້ທີ່ສຳລັບຕົບແຕ່ງ, ໂຄມໄຟ ແລະຄີມ;

22ມີດຕັດໄສ້ຕະກຽງ, ຖ້ວຍ, ຊາມຮອງເຄື່ອງຫອມ ແລະໝໍ້ຂາງທີ່ໃສ່ຖ່ານໄຟແດງ. ສິ່ງທັງໝົດນີ້ໄດ້ເຮັດດ້ວຍຄຳສົດ. ປະຕູຂ້າງນອກຂອງພຣະວິຫານ ແລະປະຕູຂອງພຣະວິຫານເຂົ້າໄປສະຖານທີ່ສັກສິດທີ່ສຸດ ກໍໄດ້ໂອບດ້ວຍຄຳເຊັ່ນກັນ.

← Chapter 3 Jump to: Chapter 5 →