2 Chronicles 27

Lao Bible 2012 (ພຣະຄຳພີສັກສິ)

← Chapter 26 Jump to: Chapter 28 →

1ເຈົ້າໂຢທາມໄດ້ຂຶ້ນເປັນກະສັດເມື່ອເພິ່ນອາຍຸຊາວຫ້າປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສິບຫົກປີ. ແມ່ຂອງເພິ່ນຊື່ວ່າເຢຣູຊາລູກສາວຂອງຊາດົກ.

2ເພິ່ນໄດ້ເຮັດສິ່ງທີ່ພຣະເຈົ້າຢາເວພໍໃຈເໝືອນກັນກັບພໍ່ຂອງເພິ່ນໄດ້ເຮັດ ແຕ່ວ່າບໍ່ຄືກັນ. ເພິ່ນບໍ່ໄດ້ເຮັດບາບໂດຍເຜົາເຄື່ອງຫອມ ຖວາຍໃນວິຫານຂອງພຣະເຈົ້າຢາເວ. ແຕ່ປະຊາຊົນຍັງສືບຕໍ່ເຮັດບາບຢູ່.

3ແມ່ນໂຢທາມທີ່ເປັນຜູ້ສ້າງປະຕູທາງດ້ານເໜືອຂອງວິຫານຂອງພຣະເຈົ້າຢາເວ ແລະຂະຫຍາຍກຳແພງເມືອງໃນບໍລິເວນຂອງນະຄອນເຢຣູຊາເລັມຊື່ວ່າ ໂອເຟນ.

4ເພິ່ນໄດ້ສ້າງເມືອງຕ່າງໆໃນເຂດເນີນພູຂອງຢູດາຍ ແລະໄດ້ສ້າງປ້ອມປ້ອງກັນເມືອງ ແລະຫໍຄອຍຫລາຍບ່ອນໄວ້ໃນປ່າ.

5ເພິ່ນໄດ້ຕໍ່ສູ້ກະສັດອຳໂມນ ໂດຍໄດ້ຕີກອງທັບໃຫ້ພ່າຍແພ້ໄປ. ແລ້ວເພິ່ນກໍໄດ້ບັງຄັບໃຫ້ຊາວອຳໂມນເສຍສ່ວຍແຕ່ລະປີຕະຫລອດສາມປີດັ່ງນີ້: ເງິນປະມານສີ່ໂຕນ, ເຂົ້າໜຶ່ງພັນໂຕນ ແລະເຂົ້າເດືອຍໜຶ່ງພັນໂຕນ.

6ໂຢທາມມີອຳນາດເຂັ້ມແຂງຂຶ້ນ ເພາະເພິ່ນເຊື່ອຟັງພຣະເຈົ້າຢາເວ ພຣະເຈົ້າຂອງເພິ່ນຢ່າງສັດຊື່.

7ເຫດການອື່ນໆໃນຣາຊການຂອງເພິ່ນເຊັ່ນ: ການເຮັດເສິກ ແລະນະໂຍບາຍການປົກຄອງອານາຈັກ ແມ່ນໄດ້ຖືກບັນທຶກໄວ້ໃນ ປຶ້ມປະຫວັດສາດຂອງບັນດາກະສັດແຫ່ງອິດສະຣາເອນແລະຢູດາຍ.

8ໂຢທາມໄດ້ຂຶ້ນເປັນກະສັດເມື່ອເພິ່ນອາຍຸຊາວຫ້າປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສິບຫົກປີ.

9ເພິ່ນໄດ້ຕາຍໄປ ແລະໄດ້ຖືກຟັງໄວ້ໃນເມືອງຂອງດາວິດ. ເຈົ້າອາຮາດ ລູກຊາຍຂອງເພິ່ນໄດ້ຂຶ້ນເປັນກະສັດປົກຄອງແທນ.

← Chapter 26 Jump to: Chapter 28 →