2 Chronicles 28

Lao Bible 2012 (ພຣະຄຳພີສັກສິ)

← Chapter 27 Jump to: Chapter 29 →

1ເຈົ້າອາຮາດໄດ້ຂຶ້ນເປັນກະສັດເມື່ອເພິ່ນອາຍຸຊາວປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສິບຫົກປີ. ເພິ່ນບໍ່ໄດ້ເຮັດຕາມແບບຢ່າງຂອງກະສັດດາວິດ ບັນພະບຸລຸດຂອງເພິ່ນ; ແຕ່ເພິ່ນໄດ້ເຮັດສິ່ງທີ່ພຣະເຈົ້າຢາເວບໍ່ພໍພຣະໄທ

2ຄືເຮັດຕາມແບບຢ່າງຂອງບັນດາກະສັດແຫ່ງອິດສະຣາເອນ. ເພິ່ນສ້າງຮູບພະບາອານເປັນໂລຫະຂຶ້ນ,

3ເຜົາເຄື່ອງຫອມບູຊາຢູ່ໃນຮ່ອມພູຮິນໂນມ ແລະເຜົາແມ່ນແຕ່ລູກຊາຍຂອງຕົນເອງເປັນເຄື່ອງບູຊາໃຫ້ຮູບເຄົາຣົບ ຕາມຮີດຄອງອັນໜ້າລັງກຽດຂອງຊາວຕ່າງຊາດ ຊຶ່ງພຣະເຈົ້າຢາເວໄດ້ຂັບໄລ່ອອກໄປຕໍ່ໜ້າປະຊາຊົນອິດສະຣາເອນ.

4ຢູ່ຕາມບ່ອນຂາບໄຫວ້ຂອງຄົນບໍ່ນັບຖືພຣະເຈົ້າ, ຢູ່ຕາມເນີນພູ ແລະຢູ່ຕາມຮົ່ມກົກໄມ້ໃບຂຽວຕ່າງໆ ອາຮາດໄດ້ເຜົາສັດ ແລະເຄື່ອງຖວາຍບູຊາ.

5ຍ້ອນກະສັດອາຮາດໄດ້ເຮັດບາບ, ພຣະເຈົ້າຢາເວ ພຣະເຈົ້າຂອງເພິ່ນ ຈຶ່ງໄດ້ໃຫ້ກະສັດຊີເຣຍຮົບຊະນະເພິ່ນ ແລະນຳເອົາຊາວຢູດາຈຳນວນຫລວງຫລາຍໄປເປັນຊະເລີຍທີ່ນະຄອນດາມັສກັດ. ພຣະອົງໄດ້ໃຫ້ເປກາລູກຊາຍຂອງເຣມາລີຢາກະສັດແຫ່ງອິດສະຣາເອນ ຮົບຊະນະອາຮາດຄືກັນ

6ແລະໄດ້ຂ້າທະຫານຢູດາທີ່ເກັ່ງກ້າ ໜຶ່ງຮ້ອຍຊາວພັນຄົນໃນມື້ດຽວ. ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາ ໄດ້ອະນຸຍາດໃຫ້ສິ່ງເຫຼົ່ານີ້ເກີດຂຶ້ນ, ເພາະປະຊາຊົນຢູດາໄດ້ປະຖິ້ມພຣະອົງ.

7ມີທະຫານອິດສະຣາເອນຄົນໜຶ່ງຊື່ວ່າ ຊີກະຣີ; ລາວໄດ້ຂ້າມາອາເສອີຢາລູກຊາຍຂອງກະສັດອາຮາດ, ອາຊະຣີກຳເປັນຫົວໜ້າກົມປົກຄອງປະຈຳວັງ ແລະເອນການາເປັນຜູ້ຮອງກະສັດ.

8ເຖິງແມ່ນວ່າ ຊາວຢູດາເປັນພີ່ນ້ອງຮ່ວມຊາດດຽວກັນກໍຕາມ ແຕ່ກອງທັບອິດສະຣາເອນກໍໄດ້ຈັບຜູ້ຍິງພ້ອມທັງເດັກນ້ອຍສອງຮ້ອຍພັນຄົນໄປເປັນຊະເລີຍ ແລະນຳພວກເຂົາກັບຄືນມາທີ່ນະຄອນຊາມາເຣຍ ຮ່ວມກັບສິ່ງຂອງເປັນຈຳນວນຫລວງຫລາຍ ຊຶ່ງພວກເຂົາຢຶດມາໄດ້ນັ້ນ.

9ມີຊາຍຜູ້ໜຶ່ງຊື່ວ່າ ໂອເດັດ. ລາວເປັນຜູ້ທຳນວາຍຂອງພຣະເຈົ້າຢາເວທີ່ນະຄອນຊາມາເຣຍ. ລາວມາພົບກອງທັບອິດສະຣາເອນ ທີ່ກຳລັງກັບເຂົ້າມາໃນເມືອງ ພ້ອມທັງຊະເລີຍເສິກຊາວຢູດາ. ເພິ່ນກ່າວວ່າ, “ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກທ່ານໄດ້ໂກດຮ້າຍຊາວຢູດາ ແລະໃຫ້ພວກທ່ານເອົາຊະນະພວກເຂົາ. ແຕ່ບັດນີ້ ພຣະອົງໄດ້ຍິນວ່າ ພວກທ່ານໄດ້ສັງຫານພວກເຂົາຢ່າງໂຫດຮ້າຍ.

10ມາບັດນີ້ ພວກທ່ານຕັ້ງໃຈເຮັດໃຫ້ຜູ້ຊາຍແລະຜູ້ຍິງເຢຣູຊາເລັມແລະຢູດາຕົກເປັນທາດຮັບໃຊ້ຂອງພວກທ່ານອີກ. ພວກທ່ານບໍ່ຮູ້ຫລືບໍ່ວ່າ ພວກທ່ານໄດ້ເຮັດບາບຕໍ່ສູ້ພຣະເຈົ້າຢາເວ ພຣະເຈົ້າຂອງພວກທ່ານເໝືອນກັນ?

11ຈົ່ງຟັງໃຫ້ດີ ຊະເລີຍເສິກເຫຼົ່ານີ້ແມ່ນອ້າຍເອື້ອຍນ້ອງຂອງພວກທ່ານເອງ. ຈົ່ງປ່ອຍພວກເຂົາໄປສາ ຫລືຈະໃຫ້ພຣະເຈົ້າຢາເວໂກດຮ້າຍແລະລົງໂທດພວກທ່ານຢ່າງຮຸນແຮງ.”

12ຜູ້ນຳຂອງອານາຈັກເໜືອສີ່ຄົນຄື: ອາຊາຣີຢາລູກຊາຍຂອງໂຢຮານານ, ເບເຣກີຢາລູກຊາຍຂອງເມຊິນເລໂມດ, ເຢຮີຊະກີຢາລູກຊາຍຂອງຊານລູມ ແລະອາມາສາລູກຊາຍຂອງຮັດໄລ ໄດ້ຄັດຄ້ານການກະທຳຂອງຝ່າຍກອງທັບເໝືອນກັນ.

13ພວກເຂົາໄດ້ເວົ້າວ່າ, “ຢ່ານຳຊະເລີຍເສິກເຫຼົ່ານັ້ນມາທີ່ນີ້ ພວກເຮົາໄດ້ເຮັດບາບຕໍ່ສູ້ພຣະເຈົ້າຢາເວ ແລະໄດ້ເຮັດໃຫ້ພຣະອົງໂກດຮ້າຍ ພໍທີ່ພຣະອົງຈະລົງໂທດພວກເຮົາໄດ້. ບັດນີ້ ພວກທ່ານຢາກເຮັດສິ່ງທີ່ທະວີຄວາມຜິດຂອງພວກເຮົາໃຫ້ເພີ່ມຂຶ້ນອີກ.”

14ດັ່ງນັ້ນ ກອງທັບຈຶ່ງສົ່ງພວກຊະເລີຍ ແລະສິ່ງຂອງທີ່ພວກເຂົາໄດ້ຢຶດມານັ້ນ ໃຫ້ປະຊາຊົນແລະບັນດາຜູ້ນຳຂອງພວກເຂົາ

15ແລະຊາຍສີ່ຄົນໄດ້ຖືກແຕ່ງຕັ້ງໃຫ້ຮັບຜິດຊອບຢາຍເຄື່ອງນຸ່ງຫົ່ມທີ່ຢຶດມານັ້ນໃຫ້ພວກຊະເລີຍ. ພວກເຂົາໄດ້ເອົາເຄື່ອງໃຫ້ພວກຊະເລີຍນຸ່ງ, ເອົາເກີບໃຫ້ພວກເຂົາໃສ່, ໃຫ້ພວກເຂົາກິນແລະດື່ມ ແລະທານໍ້າມັນໝາກກອກເທດໃສ່ບາດແຜໃຫ້. ຄົນທີ່ອ່ອນແຮງຍ່າງບໍ່ໄດ້ແມ່ນໃຫ້ຂີ່ລໍ ແລະພວກຊະເລີຍເສິກທັງໝົດຈຶ່ງຖືກນຳກັບຄືນເມືອສູ່ເຂດແດນຂອງຢູດາຍທີ່ເມືອງເຢຣິໂກເມືອງຕົ້ນຕານ. ແລ້ວພວກອິດສະຣາເອນກໍໄດ້ກັບຄືນມານະຄອນຊາມາເຣຍ.

16ຊາວເອໂດມໄດ້ເລີ່ມເຂົ້າມາປຸ້ນສະດົມຢູດາຍອີກ ແລະພວກເຂົາກໍໄດ້ຈັບຫລາຍຄົນໄປເປັນຊະເລີຍ; ສະນັ້ນ ກະສັດອາຮາດຈຶ່ງຂໍໃຫ້ຕີກະລາດປີເລເສ ກະສັດແຫ່ງອັດຊີເຣຍມາຊ່ວຍເຫລືອ.

18ໃນເວລາດຽວກັນນັ້ນ ຊາວຟີລິດສະຕິນກໍໄດ້ປຸ້ນສະດົມເມືອງຕ່າງໆ ທາງທິດຕາເວັນຕົກຂອງຕີນພູແລະທາງທິດໃຕ້ຂອງຢູດາຍ. ພວກເຂົາໄດ້ຢຶດເມືອງຕ່າງໆ ດັ່ງນີ້: ເບັດເຊເມດ, ໄອຢາໂລນ ແລະເກເດໂຣດ ແລະເມືອງຕ່າງໆຂອງໂສໂກ, ຕິມນາ ແລະກິມໂຊ, ພ້ອມທັງໝູ່ບ້ານຕ່າງໆ ແລະຕັ້ງຖິ່ນຖານຢູ່ທີ່ນັ້ນຢ່າງຖາວອນ.

19ຍ້ອນກະສັດອາຮາດແຫ່ງຢູດາຍໄດ້ຝ່າຝືນສິດຂອງປະຊາຊົນຂອງຕົນເອງ ແລະໄດ້ໝິ່ນປະໝາດພຣະເຈົ້າຢາເວ; ພຣະເຈົ້າຢາເວຈຶ່ງໄດ້ນຳເອົາຄວາມເດືອດຮ້ອນມາສູ່ຢູດາຍ.

20ແທນທີ່ກະສັດຕີກະລາດເປເລເສແຫ່ງອັດຊີເຣຍຈະຊ່ວຍກະສັດອາຮາດ ເພິ່ນກັບຫັນມາຕໍ່ຕ້ານ ແລະໄດ້ສ້າງຄວາມເດືອດຮ້ອນໃຫ້ອີກ.

21ສະນັ້ນ ອາຮາດຈຶ່ງໄດ້ນຳເອົາຄຳຈາກວິຫານຂອງພຣະເຈົ້າຢາເວ, ຈາກຣາຊວັງ ແລະຈາກບ້ານເຮືອນບັນດາຜູ້ນຳປະຊາຊົນຂົນໄປໃຫ້ກະສັດແຫ່ງອັດຊີເຣຍ; ແຕ່ເຖິງປານນັ້ນ ເພິ່ນກໍຍັງບໍ່ຍອມໃຫ້ຄວາມຊ່ວຍເຫລືອ.

22ເມື່ອຄວາມເດືອດຮ້ອນມາຈົນເຖິງທີ່ສຸດ ອາຮາດກໍຍິ່ງເຮັດບາບຕໍ່ສູ້ພຣະເຈົ້າຢາເວຫລາຍຂຶ້ນ.

23ເພິ່ນໄດ້ຖວາຍບູຊາແກ່ບັນດາພະຂອງຊາວຊີເຣຍຜູ້ຊະນະຕົນ. ເພິ່ນເວົ້າວ່າ, “ພະຂອງຊາວຊີເຣຍຊ່ວຍກະສັດຊີເຣຍໄດ້; ສະນັ້ນ ຖ້າເຮົາຖວາຍບູຊາແກ່ພະເຫຼົ່ານັ້ນ ພະເຫຼົ່ານັ້ນກໍຈະຊ່ວຍເຮົາເໝືອນກັນ.” ການກະທຳເຊັ່ນນີ້ແມ່ນນຳເອົາຄວາມຈິບຫາຍ ມາສູ່ເພິ່ນເອງ ແລະອານາຈັກຂອງເພິ່ນດ້ວຍ.

24ນອກເໜືອໄປກວ່ານີ້ ອາຮາດໄດ້ໂຮມເອົາເຄື່ອງໃຊ້ໃນວິຫານຂອງພຣະເຈົ້າ ແລະທັບເຄື່ອງໃຊ້ໃນວິຫານຂອງພຣະເຈົ້າເປັນປ່ຽງໆ, ອັດວິຫານຂອງພຣະເຈົ້າຢາເວໄວ້ ແລະຕັ້ງແທ່ນບູຊາຂຶ້ນທົ່ວນະຄອນເຢຣູຊາເລັມ.

25ຕາມເມືອງໃຫຍ່ແລະນ້ອຍທຸກໆແຫ່ງໃນຢູດາຍ ເພິ່ນໄດ້ສ້າງບ່ອນຂາບໄຫວ້ຂອງຄົນບໍ່ນັບຖືພຣະເຈົ້າ ເພື່ອໃຊ້ເປັນບ່ອນເຜົາເຄື່ອງຫອມຖວາຍບູຊາແກ່ພະຕ່າງຊາດ. ດ້ວຍວິທີນີ້ ເພິ່ນຈຶ່ງໄດ້ເຮັດໃຫ້ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງເພິ່ນໂກດຮ້າຍ.

26ເຫດການອື່ນໆທັງໝົດໃນຣາຊການຂອງເພິ່ນ ຕັ້ງແຕ່ບັ້ນຕົ້ນຈົນເຖິງບັ້ນປາຍແມ່ນໄດ້ຖືກບັນທຶກໄວ້ໃນ ປຶ້ມປະຫວັດສາດຂອງບັນດາກະສັດແຫ່ງຢູດາຍແລະອິດສະຣາເອນ.

27ກະສັດອາຮາດໄດ້ຕາຍໄປ ແລະຊາກສົບຂອງເພິ່ນໄດ້ຖືກຝັງໄວ້ໃນນະຄອນເຢຣູຊາເລັມ ແຕ່ບໍ່ໄດ້ຝັງໄວ້ໃນອຸບມຸງແຫ່ງກະສັດ. ເຈົ້າເຮເຊກີຢາລູກຊາຍຂອງເພິ່ນໄດ້ຂຶ້ນເປັນກະສັດປົກຄອງແທນ.

← Chapter 27 Jump to: Chapter 29 →