2 Chronicles 17

Lao Bible 2012 (ພຣະຄຳພີສັກສິ)

← Chapter 16 Jump to: Chapter 18 →

1ເຈົ້າເຢໂຮຊາຟັດໄດ້ຂຶ້ນເປັນກະສັດແທນກະສັດອາສາພໍ່ຂອງຕົນ ແລະໄດ້ເສີມສ້າງຖານະຂອງຕົນໃຫ້ເຂັ້ມແຂງຂຶ້ນ ເພື່ອຕໍ່ສູ້ຊາດອິດສະຣາເອນ.

2ເພິ່ນໄດ້ວາງທະຫານປະຈຳປ້ອມປ້ອງກັນເມືອງຕ່າງໆໃນຢູດາຍ, ຕາມນອກເມືອງໃນຢູດາຍແລະຕາມເມືອງຕ່າງໆ ທີ່ອາສາຢຶດໄດ້ໃນເຂດແດນຂອງເຜົ່າເອຟຣາອິມ.

3ພຣະເຈົ້າຢາເວໄດ້ອວຍພອນກະສັດເຢໂຮຊາຟັດ ເພາະເພິ່ນໄດ້ເຮັດຕາມແຕ່ຕອນຕົ້ນແບບຢ່າງຂອງພໍ່ເພິ່ນ ແລະບໍ່ໄດ້ຂາບໄຫວ້ພະບາອານ.

4ເພິ່ນໄດ້ຮັບໃຊ້ພຣະເຈົ້າຂອງພໍ່ຂອງເພິ່ນ ໂດຍເຮັດຕາມຂໍ້ຄຳສັ່ງຂອງພຣະອົງ ແລະບໍ່ໄດ້ປະພຶດຕາມວິທີທາງທີ່ກະສັດອິດສະຣາເອນໄດ້ປະພຶດ.

5ພຣະເຈົ້າຢາເວໄດ້ໃຫ້ເຢໂຮຊາຟັດຄອບຄອງທົ່ວຢູດາຍຢ່າງໝັ້ນຄົງ ແລະປະຊາຊົນທົ່ວປະເທດກໍໄດ້ນຳຂອງຂວັນມາໃຫ້ເພິ່ນ ຈົນກາຍເປັນຄົນຮັ່ງມີແລະມີກຽດຍິ່ງ.

6ເພິ່ນພາກພູມໃຈຫລາຍທີ່ໄດ້ຮັບໃຊ້ພຣະເຈົ້າຢາເວ ແລະໄດ້ທຳລາຍບ່ອນຂາບໄຫວ້ຂອງຄົນບໍ່ນັບຖືພຣະເຈົ້າແລະສັນຍາລັກຂອງເຈົ້າແມ່ອາເຊຣາໃນຢູດາຍຢ່າງໝົດສິ້ນ.

7ໃນຣາຊການປີທີສາມ ເພິ່ນໄດ້ສົ່ງພວກເຈົ້າໜ້າທີ່ໄປສັ່ງສອນຕາມເມືອງຕ່າງໆໃນຢູດາຍ ມີດັ່ງນີ້: ເບັນຮາຍ, ໂອບາດີຢາ, ເຊກາຣີຢາ, ເນທາເນນ ແລະມີກາອີຢາ.

8ພວກເຂົາມີຊາວເລວີເກົ້າຄົນ ແລະປະໂຣຫິດສອງຄົນຕິດຕາມໄປດ້ວຍ. ຊາວເລວີມີດັ່ງນີ້: ເຊມາອີຢາ, ເນທານີຢາ, ເຊບາດີຢາ, ອາສາເຮນ, ເຊມີຣາໂມດ, ເຢໂຮນາທານ, ອາໂດນີຢາ, ໂຕບີຢາ ແລະໂຕບາໂດນີຢາ; ແລະປະໂຣຫິດມີດັ່ງນີ້: ເອລີຊາມາ ແລະເຢໂຮຣາມ.

9ພວກເພິ່ນໄດ້ນຳໜັງສືກົດບັນຍັດຂອງພຣະເຈົ້າຢາເວໄປສັ່ງສອນປະຊາຊົນໃນເມືອງຕ່າງໆທົ່ວຢູດາຍ.

10ພຣະເຈົ້າຢາເວໄດ້ບັນດານໃຫ້ອານາຈັກຕ່າງໆທີ່ຢູ່ອ້ອມແອ້ມນັ້ນ ຢ້ານກົວຈົນບໍ່ກ້າເຮັດເສິກຕໍ່ສູ້ກະສັດເຢໂຮຊາຟັດ.

11ຊາວຟີລິດສະຕິນບາງຄົນໄດ້ນຳເອົາເງິນແລະຂອງຂວັນຕ່າງໆ ເປັນຈຳນວນຫລວງຫລາຍມາມອບໃຫ້ເຢໂຮຊາຟັດ ແລະຊາວອາຣັບບາງຄົນກໍໄດ້ນຳແກະເຖິກຈຳນວນເຈັດພັນເຈັດຮ້ອຍໂຕ ແລະແບ້ເຖິກເຈັດພັນເຈັດຮ້ອຍໂຕມາມອບໃຫ້ເພິ່ນ.

12ດັ່ງນັ້ນ ເຢໂຮຊາຟັດຈຶ່ງຄອງອຳນາດຫລາຍຂຶ້ນ. ເພິ່ນໄດ້ສ້າງປ້ອມປ້ອງກັນເມືອງຕ່າງໆທົ່ວຢູດາຍ

13ເພື່ອເປັນບ່ອນສະສົມສະບຽງອາຫານໄວ້ຢ່າງຫລວງຫລາຍ. ໃນນະຄອນເຢຣູຊາເລັມ ເພິ່ນໄດ້ໃຫ້ນາຍທະຫານທີ່ເກັ່ງກ້າປະຈຳການຢູ່

14ຕາມຕະກຸນຂອງພວກເຂົາ. ອາດນາໄດ້ເປັນຜູ້ບັນຊາການທະຫານໃນຕະກຸນຢູດາ ແລະເພິ່ນມີທະຫານຢູ່ໃຕ້ບັນຊາການຂອງເພິ່ນຈຳນວນສາມແສນຄົນ.

15ຜູ້ທີ່ມີຕຳແໜ່ງຮອງລົງມາແມ່ນເຢໂຮຮານານ ເພິ່ນມີທະຫານຈຳນວນສອງຮ້ອຍແປດສິບພັນຄົນ

16ແລະຜູ້ທີສາມແມ່ນອາມາສີຢາລູກຊາຍຂອງຊີກະຣີ ເພິ່ນມີທະຫານຈຳນວນສອງແສນຄົນ. (ອາມາສີຢາໄດ້ສະໝັກເຂົ້າຮັບໃຊ້ພຣະເຈົ້າຢາເວ.)

17ຜູ້ບັນຊາການທະຫານຈາກຕະກຸນເບັນຢາມິນແມ່ນເອລີອາດາ ທະຫານຜູ້ເກັ່ງກ້າ ເພິ່ນບັນຊາທະຫານຈຳນວນສອງແສນຄົນ ຊຶ່ງປະກອບອາວຸດດ້ວຍໂລ້ແລະໜ້າທະນູ.

18ຜູ້ບັນຊາການຄົນຮອງລົງມາແມ່ນເຢໂຮຊາບັດ ເພິ່ນມີທະຫານຈຳນວນໜຶ່ງແສນແປດສິບພັນຄົນ ຊຶ່ງໄດ້ຮັບການຝຶກອາວຸດພ້ອມເຂົ້າສູ້ຮົບ.

19ຄົນເຫຼົ່ານີ້ໄດ້ຮັບໃຊ້ກະສັດຢູ່ໃນນະຄອນເຢຣູຊາເລັມ ແລະນອກເໜືອຈາກນີ້ອີກ ເພິ່ນໄດ້ໃຫ້ທະຫານຄົນອື່ນໆປະຈຳການຢູ່ຕາມເມືອງຕ່າງໆ ທີ່ມີປ້ອມປ້ອງກັນໃນຢູດາຍ.

← Chapter 16 Jump to: Chapter 18 →