2 Chronicles 23

Lao Bible 2012 (ພຣະຄຳພີສັກສິ)

← Chapter 22 Jump to: Chapter 24 →

1ຫລັງຈາກທີ່ຖ້າຢູ່ເປັນເວລາຫົກປີ ປະໂຣຫິດເຢໂຮຍອາດາກໍເຫັນວ່າ ເຖິງເວລາແລ້ວທີ່ຈະດຳເນີນການຢ່າງໃດຢ່າງໜຶ່ງ. ເພິ່ນໄດ້ເຮັດສັນຍາລັບກັບນາຍທະຫານຫ້າຄົນ ມີດັ່ງນີ້: ອາຊາຣີຢາລູກຊາຍຂອງເຢໂຣຮາມ, ອິດຊະມາເອນລູກຊາຍຂອງເຢໂຮຮານານ, ອາຊາຣີຢາລູກຊາຍຂອງໂອເບັດ, ມາອາເສອີຢາລູກຊາຍຂອງອາດາອີຢາ ແລະເອລີຊາຟັດລູກຊາຍຂອງຊີກະຣີ.

2ພວກເຂົາໄດ້ເດີນທາງໄປເມືອງຕ່າງໆທົ່ວຢູດາຍ ແລະໄດ້ນຳເອົາຊາວເລວີພ້ອມທັງຫົວໜ້າທຸກຄົນ ມາທີ່ນະຄອນເຢຣູຊາເລັມກັບພວກເຂົາ.

3ພວກເຂົາທັງໝົດໄດ້ມາເຕົ້າໂຮມກັນທີ່ວິຫານຂອງພຣະເຈົ້າ ແລະໃນທີ່ນັ້ນ ພວກເຂົາໄດ້ເຮັດພັນທະສັນຍາກັບໂຢອາດລູກຊາຍຂອງກະສັດ. ເຢໂຮຍອາດາໄດ້ກ່າວແກ່ພວກເຂົາວ່າ, “ນີ້ເປັນລູກຊາຍຂອງກະສັດຄົນທີ່ຜ່ານມາແລ້ວ. ບັດນີ້ ລາວຈະຕ້ອງຂຶ້ນເປັນກະສັດຕາມທີ່ພຣະເຈົ້າຢາເວໄດ້ສັນຍາໄວ້ວ່າ ເຊື້ອສາຍຂອງກະສັດດາວິດຈະຕ້ອງເປັນດັ່ງນັ້ນ.

4ນີ້ແມ່ນສິ່ງທີ່ພວກເຮົາຈະຕ້ອງເຮັດ: ເມື່ອພວກປະໂຣຫິດກັບພວກເລວີມາປະຕິບັດໜ້າທີ່ໃນວັນຊະບາໂຕ ໃຫ້ແບ່ງພວກເຂົາອອກເປັນສາມໝວດດັ່ງນີ້: ໝວດທີໜຶ່ງໃຫ້ຮັກສາປະຕູພຣະວິຫານ

5ໝວດທີສອງໃຫ້ຮັກສາປະຕູຣາຊວັງ ແລະສ່ວນທີ່ເຫຼືອຢູ່ນັ້ນໃຫ້ປະຈຳທີ່ປະຕູໂຂງ. ປະຊາຊົນທຸກຄົນຈະຕ້ອງມາໂຮມກັນທີ່ເດີ່ນຂອງວິຫານຂອງພຣະເຈົ້າຢາເວ.

6ຢ່າໃຫ້ຜູ້ໃດເຂົ້າໄປໃນວິຫານຂອງພຣະເຈົ້າຢາເວເດັດຂາດ ນອກຈາກພວກປະໂຣຫິດກັບພວກເລວີທີ່ປະຕິບັດໜ້າທີ່ຂອງພວກເຂົາເທົ່ານັ້ນ. ພວກເຂົາອາດເຂົ້າໄປໄດ້ເພາະພວກເຂົາໄດ້ອຸທິດຕົວແລ້ວ ສ່ວນປະຊາຊົນຄົນອື່ນໆຕ້ອງຄອຍຖ້າຟັງຄຳແນະນຳຂອງພຣະເຈົ້າຢາເວຢູ່ຂ້າງນອກ.

7ໃຫ້ຊາວເລວີຢືນຢູ່ຮັກສາກະສັດຢ່າງໃກ້ຊິດ ແລະໃຫ້ຕຽມພ້ອມທີ່ຈະຊັກດາບ ແລະໃຫ້ຢູ່ກັບກະສັດໃນທຸກບ່ອນທີ່ເພິ່ນໄປ. ຜູ້ໃດຜູ້ໜຶ່ງທີ່ພະຍາຍາມເຂົ້າໄປໃນວິຫານໃຫ້ຂ້າຜູ້ນັ້ນໂລດ.”

8ຊາວເລວີແລະຊາວຢູດາໄດ້ເຮັດຕາມຄຳແນະນຳຂອງເຢໂຮຍອາດາ. ເມື່ອພວກຜູ້ຊາຍເຮັດໜ້າທີ່ຂອງພວກເຂົາໃນວັນຊະບາໂຕແລ້ວ ພວກເຂົາບໍ່ໄດ້ກັບເມືອ; ດັ່ງນັ້ນ ນາຍທະຫານທີ່ບັນຊາການຈຶ່ງມີຄົນເຂົ້າເວນຍາມ ແລະຫວິດຈາກເວນຍາມຢູ່ຮ່ວມດ້ວຍ.

9ເຢໂຮຍອາດາໄດ້ເອົາໂລ້ ແລະຫອກຂອງກະສັດດາວິດ ທີ່ເພິ່ນໄດ້ມອບແກ່ວິຫານຂອງພຣະເຈົ້ານັ້ນໃຫ້ພວກນາຍທະຫານ.

10ເພິ່ນໃຫ້ຄົນຂອງຕົນປະຈຳທີ່ ຖືດາບຕຽມພ້ອມຢູ່ອ້ອມພຣະວິຫານ ເພື່ອຮັກສາກະສັດ.

11ແລ້ວເຢໂຮຍອາດາກໍໄດ້ນຳໂຢອາດອອກມາ; ເພິ່ນສວມມົງກຸດໃຫ້ເພິ່ນ ແລະມອບກົດໝາຍປົກຄອງສະບັບໜຶ່ງໃຫ້ເພິ່ນ ແລະໄດ້ແຕ່ງຕັ້ງເພິ່ນໃຫ້ຂຶ້ນເປັນກະສັດ. ແລ້ວເຢໂຮຍອາດາແລະລູກຊາຍຂອງເພິ່ນໄດ້ໃຊ້ນໍ້າມັນສັກສິດຫົດສົງໂຢອາດ ແລະທຸກຄົນຕ່າງກໍຮ້ອງຂຶ້ນວ່າ, “ຂໍໃຫ້ກະສັດຈົ່ງໝັ້ນຍືນ!”

12ເມື່ອນາງອາທາລີຢາໄດ້ຍິນປະຊາຊົນໂຮຮ້ອງອວຍພອນກະສັດ ນາງຈຶ່ງຟ້າວໄປທີ່ວິຫານຂອງພຣະເຈົ້າຢາເວບ່ອນທີ່ປະຊາຊົນໄດ້ມາເຕົ້າໂຮມກັນຢູ່.

13ໃນທີ່ນັ້ນ ຍານາງໄດ້ເຫັນກະສັດຜູ້ໃໝ່ທີ່ທາງເຂົ້າພຣະວິຫານ ຢືນຢູ່ຂ້າງເສົາທີ່ໄດ້ຈັດໄວ້ສະເພາະກະສັດ ແລະມີນາຍທະຫານໃນກອງທັບ ແລະກອງດູລິຍາງຢືນອ້ອມຢູ່. ປະຊາຊົນທັງໝົດພາກັນໂຮຮ້ອງຢ່າງຊົມຊື່ນຍິນດີ ແລະສຽງແກກໍດັງຂຶ້ນ ແລະພວກນັກດົນຕຼີປະຈຳພຣະວິຫານກໍບັນເລງເພງເປັນການສະຫລອງ. ນາງໄດ້ຈີກເສື້ອຂອງຕົນຢ່າງເປັນທຸກໃຈ ແລະຮ້ອງຂຶ້ນວ່າ, “ຄົນທໍລະຍົດ ຄົນທໍລະຍົດ.”

14ປະໂຣຫິດເຢໂຮຍອາດາໄດ້ເອີ້ນບັນດານາຍທະຫານໃນກອງທັບມາ ແລະສັ່ງວ່າ, “ເອົານາງອອກໄປລະຫວ່າງແຖວທະຫານສາ ແລະຂ້າທຸກຄົນທີ່ພະຍາຍາມຊ່ວຍກູ້ເອົານາງ.” ສຳລັບປະໂຣຫິດໄດ້ກ່າວວ່າ, “ຢ່າປະຫານຊີວິດນາງໃນວິຫານຂອງພຣະເຈົ້າຢາເວ.”

15ພວກເຂົາໄດ້ຈັບນາງໄປທີ່ຣາຊວັງ ແລະໄດ້ປະຫານນາງເສຍທີ່ປະຕູຄອກມ້າຂອງຣາຊວັງນັ້ນເອງ.

16ປະໂຣຫິດເຢໂຮຍອາດາ ໂດຍມີກະສັດໂຢອາດພ້ອມປະຊາຊົນເຂົ້າຮ່ວມ ໄດ້ເຮັດພິທີຕັ້ງພັນທະສັນຍາວ່າ ພວກເຂົາຈະເປັນປະຊາຊົນຂອງພຣະເຈົ້າຢາເວ.

17ແລ້ວທຸກຄົນກໍໄປບ່ອນຂາບໄຫວ້ພະບາອານ ແລະມ້າງມັນລົງ. ພວກເຂົາທັບແທ່ນບູຊາ ແລະເທວະຮູບໃນທີ່ນັ້ນຖິ້ມ ແລະໄດ້ຂ້າມັດທານ ປະໂຣຫິດພະບາອານຕໍ່ໜ້າແທ່ນບູຊານັ້ນ.

18ເຢໂຮຍອາດາໄດ້ຕັ້ງພວກປະໂຣຫິດແລະຊາວເລວີໃຫ້ດູແລວຽກງານໃນວິຫານຂອງພຣະເຈົ້າຢາເວ. ພວກເຂົາໄດ້ຮັບມອບໝາຍໃຫ້ເຮັດຕາມຄຳສັ່ງທີ່ກະສັດດາວິດໄດ້ຈັດຕັ້ງໄວ້ ໂດຍໃຫ້ເຜົາເຄື່ອງບູຊາຖວາຍແກ່ພຣະເຈົ້າຢາເວຕາມກົດບັນຍັດຂອງໂມເຊ. ນອກຈາກນີ້ແລ້ວ ພວກເຂົາຍັງເປັນຜູ້ຮັບຜິດຊອບຝ່າຍດົນຕຼີແລະພິທີສະຫລອງ.

19ເຢໂຮຍອາດາໄດ້ຈັດໃຫ້ມີຄົນເຝົ້າຍາມວິຫານຂອງພຣະເຈົ້າຢາເວ ເພື່ອປ້ອງກັນບໍ່ໃຫ້ຜູ້ໃດຜູ້ໜຶ່ງທີ່ເປັນມົນທິນເຂົ້າໄປໃນທີ່ນັ້ນ.

20ບັນດານາຍທະຫານໃນກອງທັບ, ພົນລະເມືອງຂັ້ນຜູ້ນຳ, ເຈົ້າໜ້າທີ່ຕ່າງໆພ້ອມທັງປະຊາຊົນທັງຫລາຍ ໄດ້ເຂົ້າຮ່ວມກັບເຢໂຮຍອາດາໃນການນຳພາກະສັດ ຈາກວິຫານຂອງພຣະເຈົ້າຢາເວໄປທີ່ພະຣາຊວັງ. ພວກເຂົາໄດ້ເຂົ້າໄປທາງປະຕູໂຂງ ແລະກະສັດກໍໄດ້ຂຶ້ນໄປນັ່ງທີ່ບັນລັງ.

21ປະຊາຊົນທັງໝົດຕ່າງກໍຊົມຊື່ນຍິນດີຢ່າງເຕັມລົ້ນ ແລະບ້ານເມືອງຈຶ່ງມີຄວາມສະຫງົບສຸກ ຍ້ອນວ່າບັດນີ້ນາງອາທາລີຢາໄດ້ຖືກປະຫານເສຍແລ້ວ.

← Chapter 22 Jump to: Chapter 24 →