2 Chronicles 36

Lao Bible 2012 (ພຣະຄຳພີສັກສິ)

← Chapter 35 Jump to:

1ປະຊາຊົນຊາວຢູດາຍໄດ້ເລືອກເຈົ້າເຢໂຮອາຮາດລູກຊາຍຂອງກະສັດໂຢສີຢາໂດຍໃຊ້ນໍ້າມັນສັກສິດຫົດສົງເພິ່ນ ໃຫ້ຂຶ້ນເປັນກະສັດປົກຄອງໃນນະຄອນເຢຣູຊາເລັມ.

2ເມື່ອເຈົ້າເຢໂຮອາຮາດໄດ້ຂຶ້ນເປັນກະສັດແຫ່ງຢູດາຍນັ້ນ ເພິ່ນອາຍຸຊາວສາມປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມພຽງສາມເດືອນ.

3ກະສັດແຫ່ງເອຢິບໄດ້ຈັບເພິ່ນໄປເປັນຊະເລີຍ ແລະບັງຄັບໃຫ້ຢູດາຈ່າຍເງິນຈຳນວນສາມພັນສີ່ຮ້ອຍກິໂລກຼາມ ແລະ ຄຳ ສາມສິບສີ່ກິໂລກຼາມ ເປັນຄ່າໜີ້ສິນ.

4ກະສັດແຫ່ງເອຢິບໄດ້ແຕ່ງຕັ້ງເຈົ້າເອລີອາກິມ ນ້ອງຊາຍຂອງເຢໂຮອາຮາດໃຫ້ຂຶ້ນເປັນກະສັດແຫ່ງຢູດາຍ ໂດຍປ່ຽນຊື່ໃໝ່ໃຫ້ເພິ່ນວ່າ ເຢໂຮຍອາກິມ. ສ່ວນເຢໂຮອາຮາດນັ້ນໄດ້ຖືກເນໂກນຳຕົວໄປທີ່ເອຢິບ.

5ເຈົ້າເຢໂຮຍອາກິມໄດ້ຂຶ້ນເປັນກະສັດແຫ່ງຢູດາຍເມື່ອເພິ່ນອາຍຸຊາວຫ້າປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສິບເອັດປີ. ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ພຣະເຈົ້າຂອງເພິ່ນ.

6ກະສັດເນບູກາດເນັດຊາແຫ່ງບາບີໂລນໄດ້ຮຸກຮານຢູດາຍ, ຈັບເຢໂຮຍອາກິມ ແລະລ່າມໂສ້ເພິ່ນນຳໄປສູ່ບາບີໂລນ.

7ເນບູກາດເນັດຊາໄດ້ນຳຊັບສົມບັດບາງສ່ວນຢູ່ໃນວິຫານຂອງພຣະເຈົ້າຢາເວ ໄປໄວ້ທີ່ວັງຂອງຕົນໃນນະຄອນບາບີໂລນ.

8ທຸກໆສິ່ງທີ່ກະສັດເຢໂຮຍອາກິມໄດ້ເຮັດ ລວມທັງການກະທຳອັນໜ້າກຽດໜ້າຊັງ ແລະອັນຊົ່ວຮ້າຍຕ່າງໆ ແມ່ນໄດ້ຖືກບັນທຶກໄວ້ໃນ ປຶ້ມປະຫວັດສາດຂອງກະສັດແຫ່ງອິດສະຣາເອນແລະຢູດາຍ. ເຈົ້າເຢໂຮຍອາກິນລູກຊາຍຂອງເພິ່ນໄດ້ຂຶ້ນປົກຄອງແທນ.

9ເຈົ້າເຢໂຮຍອາກິນຂຶ້ນເປັນກະສັດແຫ່ງຢູດາຍເມື່ອເພິ່ນອາຍຸສິບແປດປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສາມເດືອນກັບສິບວັນ. ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ.

10ເມື່ອຮອດລະດູໃບໄມ້ປົ່ງ ກະສັດເນບູກາເນັດຊາໄດ້ນຳເຢໂຮຍອາກິນໄປເປັນຊະເລີຍທີ່ບາບີໂລນ ພ້ອມທັງນຳຊັບສົມບັດອັນມີຄ່າໃນວິຫານຂອງພຣະເຈົ້າຢາເວໄປກ້ຽງ. ແລ້ວເພິ່ນກໍແຕ່ງຕັ້ງເຊເດກີຢາ ລູງ ຂອງເຢໂຮຍອາກິນ ໃຫ້ຂຶ້ນເປັນກະສັດປົກຄອງຢູດາຍແລະເຢຣູຊາເລັມແທນ.

11ເຈົ້າເຊເດກີຢາເພິ່ນຂຶ້ນເປັນກະສັດແຫ່ງຢູດາຍເມື່ອເພິ່ນອາຍຸຊາວເອັດປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສິບເອັດປີ.

12ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ພຣະເຈົ້າຂອງເພິ່ນ ແລະບໍ່ຍອມຖ່ອມໃຈລົງຕໍ່ໜ້າຜູ້ທຳນວາຍເຢເຣມີຢາຜູ້ທີ່ໄດ້ກ່າວຈາກປາກຂອງພຣະເຈົ້າຢາເວ.

13ເຊເດກີຢາໄດ້ກະບົດຕໍ່ກະສັດເນບູກາເນັດຊາ ຜູ້ທີ່ໄດ້ບັງຄັບເພິ່ນໃຫ້ສາບານໂດຍພຣະເຈົ້າວ່າຈະຍອມສັດຊື່. ເພິ່ນດື້ດຶງບໍ່ຍອມກັບໃຈໃໝ່ ແລະຄືນມາຫາພຣະເຈົ້າຢາເວ ພຣະເຈົ້າຂອງຊາດອິດສະຣາເອນ.

14ນອກຈາກນີ້ອີກ ບັນດາຜູ້ນຳຂອງຢູດາຍ ບັນດາປະໂຣຫິດແລະປະຊາຊົນຕ່າງກໍໄດ້ເຮັດບາບຕາມແບບຢ່າງຂອງຊົນຊາດ ທີ່ອ້ອມຮອບພວກເຂົານັ້ນໂດຍຂາບໄຫວ້ຮູບເຄົາຣົບ; ສະນັ້ນ ພວກເຂົາຈຶ່ງໄດ້ເຮັດໃຫ້ວິຫານຂອງພຣະເຈົ້າຢາເວ ບ່ອນທີ່ພຣະອົງເຮັດໃຫ້ສັກສິດໃນເຢຣູຊາເລັມນັ້ນເປັນມົນທິນ.

15ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາ ໄດ້ສືບຕໍ່ໃຊ້ຜູ້ທຳນວາຍຫລາຍຄົນມາເຕືອນປະຊາຊົນຂອງພຣະອົງ ເພາະພຣະອົງບໍ່ປະສົງຈະທຳລາຍພວກເຂົາ ແລະທີ່ສະຖິດຂອງພຣະອົງ.

16ແຕ່ພວກເຂົາໄດ້ຫົວເຍາະເຍີ້ຍໃສ່ພວກຜູ້ນຳຂ່າວຂອງພຣະເຈົ້າ ໂດຍບໍ່ຍອມຮັບເອົາຖ້ອຍຄຳຂອງພຣະອົງ ແລະຫົວຂວັນໃສ່ຜູ້ທຳນວາຍຂອງພຣະອົງ; ຈົນໃນທີ່ສຸດ ພຣະເຈົ້າຢາເວໄດ້ໂກດຮ້າຍປະຊາຊົນຂອງພຣະອົງຫລາຍຍິ່ງຂຶ້ນ ຈົນບໍ່ມີຜູ້ໃດໜີພົ້ນໄປໄດ້.

17ສະນັ້ນ ພຣະອົງຈຶ່ງໄດ້ນຳເອົາກະສັດແຫ່ງບາບີໂລນ ມາໂຈມຕີພວກເຂົາ. ກະສັດໄດ້ຂ້າຊາຍໜຸ່ມຊາວຢູດາແມ່ນແຕ່ໃນວິຫານແຫ່ງສະຖານທີ່ສັກສິດຂອງພວກເຂົາ. ເພິ່ນບໍ່ໄດ້ເມດຕາຕໍ່ຜູ້ໃດຜູ້ໜຶ່ງເລີຍ, ບໍ່ວ່າໜຸ່ມຫລືແກ່, ຊາຍຫລືຍິງ, ເຈັບປ່ວຍຫລືຢູ່ດີມີແຮງ. ພຣະເຈົ້າໄດ້ມອບພວກເຂົາໃຫ້ຢູ່ໃຕ້ອຳນາດຂອງເພິ່ນ.

18ກະສັດແຫ່ງບາບີໂລນໄດ້ປຸ້ນສະດົມວິຫານຂອງພຣະເຈົ້າ, ຊັບສົມບັດຂອງວິຫານຂອງພຣະເຈົ້າຢາເວ ແລະຊັບສົມບັດຂອງກະສັດຕະຫລອດທັງຂອງພວກຂ້າຣາຊການ ແລະນຳເອົາສິ່ງຂອງທັງໝົດໄປທີ່ນະຄອນບາບີໂລນ.

19ເພິ່ນໄດ້ຈູດວິຫານຂອງພຣະເຈົ້າແລະທຳລາຍກຳແພງເມືອງເຢຣູຊາເລັມ, ຈູດບັນດາຣາຊວັງທັງໝົດແລະທຳລາຍຊັບສົມບັດອັນມີຄ່າໝົດກ້ຽງ.

20ເພິ່ນໄດ້ນຳພວກທີ່ລອດຊີວິດໄປສູ່ນະຄອນບາບີໂລນ ເພື່ອເອົາໄປເປັນທາດຮັບໃຊ້ເພິ່ນ ແລະເຊື້ອສາຍຂອງເພິ່ນ ຈົນອານາຈັກເປີເຊຍຮຸ່ງເຮືອງຂຶ້ນ.

21ເພື່ອຖ້ອຍຄຳທີ່ພຣະເຈົ້າຢາເວໄດ້ກ່າວລ່ວງໜ້າ ຜ່ານປາກຂອງຜູ້ທຳນວາຍເຢເຣມີຢາກາຍເປັນຈິງ ຄືວ່າ: ດິນແດນຈະຮ້າງວ່າງເປົ່າເປັນເວລາເຈັດສິບປີ ເພື່ອຊົດເຊີຍການພັກຜ່ອນສຳລັບວັນຊະບາໂຕ ຊຶ່ງພວກເຂົາບໍ່ໄດ້ຢຶດຖື.

22ໃນປີທີໜຶ່ງ ຊຶ່ງກະສັດໄຊຣັດແຫ່ງເປີເຊຍໄດ້ຂຶ້ນເປັນຈັກກະພັດ ພຣະເຈົ້າຢາເວໄດ້ເຮັດຕາມຖ້ອຍຄຳທີ່ພຣະອົງໄດ້ກ່າວໄວ້ ຜ່ານທາງຜູ້ທຳນວາຍເຢເຣມີຢາ. ພຣະເຈົ້າຢາເວໄດ້ບັນດານໃຫ້ກະສັດໄຊຣັດອອກຄຳສັ່ງປະກາດໄປທົ່ວທຸກໆບ່ອນໃນອານາຈັກຂອງເພິ່ນ ໂດຍມີຖ້ອຍຄຳດັ່ງນີ້:

23“ນີ້ແມ່ນຄຳສັ່ງຂອງກະສັດໄຊຣັດແຫ່ງເປີເຊຍ. ພຣະເຈົ້າຢາເວ ພຣະເຈົ້າແຫ່ງສະຫວັນໄດ້ມອບອານາຈັກທັງໝົດທົ່ວທັງແຜ່ນດິນໂລກໃຫ້ຂ້າພະເຈົ້າ ແລະໄດ້ສັ່ງໃຫ້ຂ້າພະເຈົ້າຮັບຜິດຊອບໃນການສ້າງວິຫານຂອງພຣະອົງທີ່ນະຄອນເຢຣູຊາເລັມຂຶ້ນໃໝ່. ບັດນີ້ ພວກທ່ານທັງໝົດທີ່ເປັນປະຊາຊົນຂອງພຣະອົງເອີຍ ຈົ່ງໄປທີ່ນັ້ນ ແລະຂໍໃຫ້ພຣະເຈົ້າຢາເວ ພຣະເຈົ້າຂອງພວກທ່ານສະຖິດຢູ່ກັບພວກທ່ານເທີ້ນ.”

← Chapter 35 Jump to: