2 Chronicles 8

Lao Bible 2012 (ພຣະຄຳພີສັກສິ)

← Chapter 7 Jump to: Chapter 9 →

1ກະສັດໂຊໂລໂມນໄດ້ໃຊ້ເວລາຊາວປີ ເພື່ອສ້າງວິຫານຂອງພຣະເຈົ້າຢາເວແລະຣາຊວັງຂອງຕົນ.

2ເພິ່ນໄດ້ສ້າງເມືອງຕ່າງໆ ທີ່ກະສັດຮີຣາມມອບໃຫ້ເພິ່ນນັ້ນຂຶ້ນໃໝ່ ແລະໄດ້ສົ່ງຊາວອິດສະຣາເອນໄປຕັ້ງຖິ່ນຖານໃໝ່ຢູ່ທີ່ນັ້ນ.

3ເພິ່ນໄດ້ຢຶດເຂດແດນຂອງຮາມັດ-ໂຊບາ

4ພ້ອມທັງໄດ້ສ້າງປ້ອມປ້ອງກັນເມືອງປານມີຣາຢູ່ໃນຖິ່ນແຫ້ງແລ້ງກັນດານ. ເພິ່ນໄດ້ສ້າງເມືອງທັງໝົດໃນຮາມັດຂຶ້ນໃໝ່ ເພື່ອໃຊ້ເປັນສູນກາງສະສົມສະບຽງອາຫານ.

5ກະສັດໂຊໂລໂມນໄດ້ສ້າງເມືອງເຫຼົ່ານີ້ຂຶ້ນໃໝ່ເຊັ່ນກັນ ດັ່ງນີ້: ເບັດໂຮໂຣນເບື້ອງເທິງ ແລະເບັດໂຮໂຣນເບື້ອງລຸ່ມ (ເມືອງທັງສອງນີ້ໄດ້ມີປ້ອມປ້ອງກັນ ແລະມີກອນປະຕູເປັນເຫລັກແທ່ງ),

6ເມືອງບາອາລາດ, ເມືອງທັງໝົດທີ່ເພິ່ນໃຊ້ເປັນບ່ອນສະສົມສະບຽງອາຫານ ແລະເມືອງທັງຫລາຍ ບ່ອນທີ່ເພິ່ນໄດ້ສະສົມຝູງມ້າແລະລົດຮົບ. ເພິ່ນຍັງດຳເນີນແຜນການກໍ່ສ້າງທັງໝົດຂອງເພິ່ນໃນນະຄອນເຢຣູຊາເລັມ, ໃນເລບານອນ, ຕະຫລອດທົ່ວທັງເຂດແດນທີ່ເພິ່ນປົກຄອງ.

7ໂຊໂລໂມນໄດ້ຮັບແຮງງານທັງໝົດນັ້ນ ມາຈາກເຊື້ອສາຍຂອງປະຊາຊົນການາອານທີ່ບໍ່ໄດ້ຖືກຂ້າ ເມື່ອຊາວອິດສະຣາເອນໄດ້ໄປຢຶດຄອງດິນແດນ. ປະຊາຊົນເຫຼົ່ານັ້ນມີດັ່ງນີ້: ຊາວຮິດຕີ, ອາໂມ, ເປຣີຊີ, ຮີວີ ແລະຊາວເຢບຸດ.

8ບັນດາເຊື້ອສາຍຂອງປະຊາຊົນເຫຼົ່ານັ້ນໄດ້ສືບຕໍ່ຕົກເປັນທາດຮັບໃຊ້ ມາຈົນເຖິງສະໄໝປັດຈຸບັນນີ້.

9ຊາວອິດສະຣາເອນບໍ່ເຄີຍເປັນກຳມະກອນອອກແຮງງານ; ແຕ່ພວກເຂົາເປັນທະຫານ, ຂ້າຣາຊການ, ຄົນຂັບລົດຮົບ ແລະທະຫານມ້າ.

10ມີຂ້າຣາຊການທັງໝົດ ສອງຮ້ອຍຫ້າສິບຄົນ ເປັນຜູ້ຮັບຜິດຊອບຄວບຄຸມກຳມະກອນທີ່ເຮັດວຽກຕາມໂຄງການກໍ່ສ້າງຕ່າງໆ.

11ໂຊໂລໂມນໄດ້ຍ້າຍເມຍຂອງເພິ່ນ ລູກສາວຂອງກະສັດແຫ່ງເອຢິບອອກຈາກເມືອງຂອງດາວິດ ແລະໃຫ້ໄປຢູ່ໃນເຮືອນທີ່ເພິ່ນໄດ້ສ້າງສຳລັບນາງໂດຍສະເພາະ. ເພິ່ນເວົ້າວ່າ, “ນາງບໍ່ສົມຄວນຢູ່ໃນວັງຂອງກະສັດແຫ່ງອິດສະຣາເອນ ເພາະບ່ອນໃດທີ່ມີຫີບຂອງພຣະເຈົ້າຢາເວກໍເປັນບ່ອນສັກສິດ.”

12ໂຊໂລໂມນໄດ້ຖວາຍເຄື່ອງບູຊາແກ່ພຣະເຈົ້າຢາເວທີ່ເທິງແທ່ນບູຊາຂອງພຣະເຈົ້າຢາເວ ຊຶ່ງເພິ່ນໄດ້ສ້າງຂຶ້ນຕໍ່ໜ້າລະບຽງ.

13ເພິ່ນໄດ້ເຜົາເຄື່ອງບູຊາຖວາຍຕາມກົດບັນຍັດຂອງໂມເຊທີ່ໄດ້ກຳນົດໄວ້ ດັ່ງນີ້: ວັນຊະບາໂຕ, ວັນເດືອນອອກໃໝ່, ເທດສະການສາມປາງປະຈຳປີຄື: ວັນກິນເຂົ້າຈີ່ບໍ່ມີເຊື້ອແປ້ງ, ວັນສະຫລອງການເກັບກ່ຽວ ແລະເທດສະການປຸກຕຸບຢູ່.

14ເພື່ອປະຕິບັດຕາມກົດລະບຽບທີ່ກະສັດດາວິດພໍ່ຂອງເພິ່ນໄດ້ວາງໄວ້ ເພິ່ນໄດ້ຈັດວຽກປະຈຳວັນໃຫ້ແກ່ພວກປະໂຣຫິດ ແລະພວກເລວີທີ່ເປັນຜູ້ຊ່ວຍຮ້ອງເພງແລະເຮັດວຽກໃຫ້ພວກປະໂຣຫິດ. ເພິ່ນຍັງໄດ້ຈັດຕັ້ງໃຫ້ມີທະຫານເຝົ້າຍາມພຣະວິຫານເປັນໝວດໆ ເພື່ອເຮັດໜ້າທີ່ປະຈຳວັນ ຢູ່ຕາມແຕ່ລະປະຕູເຂົ້າພຣະວິຫານ ຕາມຂໍ້ຄຳສັ່ງຂອງກະສັດດາວິດຄົນຂອງພຣະເຈົ້າ.

15ຄຳແນະນຳຕ່າງໆຊຶ່ງກະສັດດາວິດໄດ້ມອບໃຫ້ແກ່ບັນດາປະໂຣຫິດແລະພວກເລວີກ່ຽວກັບຫ້ອງໄວ້ເຄື່ອງ ແລະກ່ຽວກັບເລື່ອງອື່ນໆ ກໍໄດ້ຖືກນຳມາປະຕິບັດຢ່າງຕັ້ງໜ້າໂດຍທົ່ວເຖິງກັນ.

16ໃນທີ່ສຸດ ວຽກການທັງໝົດຂອງກະສັດໂຊໂລໂມນກໍສຳເລັດ. ຈາກການວາງຮາກຖານວິຫານຂອງພຣະເຈົ້າຢາເວຈົນເຖິງການສ້າງວິຫານຂອງພຣະເຈົ້າຢາເວແລ້ວ ວຽກງານທັງໝົດແມ່ນໄດ້ບັນລຸຜົນໂດຍດີ.

17ແລ້ວໂຊໂລໂມນກໍໄດ້ໄປທີ່ເອຊີໂອນ-ເກເບ ແລະເອລາດ ເມືອງທ່າເຮືອທີ່ແຄມອ່າວອາກາບາຢູ່ໃນດິນແດນຂອງເອໂດມ.

18ກະສັດຮີຣາມໄດ້ສົ່ງເຮືອຫລາຍລຳ ພາຍໃຕ້ການຄວບຄຸມຂອງຂ້າຣາຊການຂອງເພິ່ນເອງ ພ້ອມທັງລູກເຮືອທີ່ມີຄວາມຊຳນິຊຳນານທາງທະເລມາໃຫ້ກະສັດໂຊໂລໂມນ. ພວກເຂົາໄດ້ແລ່ນເຮືອໄປກັບຂ້າຣາຊການຂອງໂຊໂລໂມນ ຈົນຮອດດິນແດນຂອງໂອເຟຍ ແລະໄດ້ນຳຄຳປະມານສິບຫົກໂຕນ ມາມອບໃຫ້ກະສັດໂຊໂລໂມນ.

← Chapter 7 Jump to: Chapter 9 →