Job 10

Lao Bible 2012 (ພຣະຄຳພີສັກສິ)

← Chapter 9 Jump to: Chapter 11 →

1ຂ້ານ້ອຍເບື່ອໜ່າຍຊີວິດຂອງຕົນເອງ ໂຜດຟັງຄຳຈົ່ມອັນຂົມຂື່ນແດ່ທ້ອນ.

2ຂ້າແດ່ພຣະເຈົ້າ ຂໍຢ່າກ່າວປະນາມຂ້ານ້ອຍເລີຍ ຂໍບອກແດ່ວ່າ ແມ່ນເລື່ອງຫຍັງທີ່ຊົງກ່າວຟ້ອງ?

3ເປັນການຖືກຕ້ອງແລ້ວຫລື ທີ່ພຣະອົງໂກດຮ້າຍເຊັ່ນນີ້? ຄືດູໝິ່ນນິນທາ ຜູ້ທີ່ພຣະອົງໄດ້ສ້າງຂຶ້ນມານັ້ນ? ແຕ່ຊົງຫົວເລາະພໍໃຈ ກັບແຜນການທັງຫລາຍຂອງຄົນຊົ່ວຮ້າຍ?

4ພຣະອົງເບິ່ງສິ່ງທັງປວງນີ້ດັ່ງມະນຸດເບິ່ງບໍ? ຊີວິດພຣະອົງສັ້ນຄືຊີວິດມະນຸດເມື່ອໃດແດ່?

6ເປັນຫຍັງຈຶ່ງຄົ້ນຫາການບາບຂອງຂ້ານ້ອຍ ແລະຄອຍຈັບຜິດທຸກໆແນວຂອງຂ້ານ້ອຍນັ້ນ?

7ພຣະອົງຮູ້ດີວ່າຂ້ານ້ອຍບໍ່ມີຄວາມຜິດຫຍັງໝົດ ບໍ່ມີຜູ້ໃດຊ່ວຍຂ້ານ້ອຍໃຫ້ຫວິດຈາກພຣະອົງໄດ້.

8ມືພຣະອົງຫລໍ່ຫລອມຂ້ານ້ອຍແລະສ້າງຂຶ້ນມາ ບັດນີ້ ມືອັນດຽວກັນນີ້ກຳລັງທຳລາຍຂ້ານ້ອຍຖິ້ມ.

9ຈົ່ງຈົດຈຳວ່າພຣະອົງສ້າງຂ້ານ້ອຍແຕ່ດິນໜຽວ ພຣະອົງຂ້ຽວຢຽບຂ້ານ້ອຍໃຫ້ເປັນຂີ້ຝຸ່ນດິນອີກຫລືນີ້?

10ພຣະອົງໃຫ້ເຫື່ອແຮງແກ່ພໍ່ຂອງຂ້ານ້ອຍ ເພື່ອໃຫ້ຂ້ານ້ອຍໄດ້ເກີດມາເພາະເພິ່ນ; ພຣະອົງໃຫ້ຂ້ານ້ອຍໄດ້ໃຫຍ່ຂຶ້ນມາ ໃນທ້ອງມານດາຂອງຂ້ານ້ອຍນັ້ນ.

11ພຣະອົງຫລໍ່ຕົວຂ້ານ້ອຍດ້ວຍກະດູກແລະເອັນ ແລະຫຸ້ມຫໍ່ທັງສອງດ້ວຍໜັງແລະກ້ອນຊີ້ນ.

12ພຣະອົງໄດ້ໃຫ້ຊີວິດແລະຄວາມຮັກອັນໝັ້ນຄົງ ໃຫ້ຂ້ານ້ອຍມີຊີວິດຍືນຍົງມາເຖິງປານນີ້.

13ແຕ່ບັດນີ້ ຂ້ານ້ອຍຮູ້ຕະຫລອດເວລາທີ່ຜ່ານມາ ພຣະອົງວາງແຜນລັບ ດັບຊີວາຂ້ານ້ອຍຖິ້ມ.

14ພຣະອົງລໍເບິ່ງການບາບທີ່ຂ້ານ້ອຍກະທຳ ເພື່ອວ່າພຣະອົງຈະບໍ່ໃຫ້ອະໄພການບາບນັ້ນ.

15ເມື່ອໃດທີ່ເຮັດບາບຕໍ່ພຣະອົງ ເມື່ອນັ້ນກໍເດືອດຮ້ອນທັນທີ ແຕ່ເມື່ອເຮັດຖືກພັດບໍ່ໄດ້ຮັບກຽດຊໍ້າ. ສຳລັບຂ້ານ້ອຍນັ້ນ ຈຶ່ງມີແຕ່ຄວາມອັບອາຍ ວຸ້ນວາຍຢູ່ກັບຄວາມທຸກໃຈຂອງຂ້ານ້ອຍເລື້ອຍໆ.

16ພຣະອົງບໍ່ປ່ອຍໃຫ້ຂ້ານ້ອຍສຳເລັດຜົນໃດໆ ພໍແຕ່ໂປໂລຫົວຂຶ້ນມາ ພຣະອົງກໍຂົ່ມຫົວລົງໂລດ. ເພື່ອໃຫ້ເຈັບປວດ ຊົງຕາມລ່າຂ້ານ້ອຍດັ່ງສິງໂຕ ແລະເຮັດການອັດສະຈັນຕໍ່ສູ້ຂ້ານ້ອຍດ້ວຍ.

17ພຣະອົງມີຫຼັກຖານຕໍ່ສູ້ຂ້ານ້ອຍຢູ່ສະເໝີ ຄວາມໂກດຮ້າຍຂອງພຣະອົງກໍທະວີເລື້ອຍໆ; ເພື່ອຕໍ່ສູ້ຂ້ານ້ອຍ ພຣະອົງວາງແຜນການຢູ່ສະເໝີ ພ້ອມທີ່ຈະບຸກເຂົ້າໂຈມຕີຂ້ານ້ອຍເທື່ອໃໝ່.

18ຂ້າແດ່ພຣະເຈົ້າ ເປັນຫຍັງຈຶ່ງໃຫ້ຂ້ານ້ອຍເກີດມາ? ຂ້ານ້ອຍຄວນຕາຍກ່ອນທີ່ບໍ່ມີຜູ້ໃດເຫັນຂ້ານ້ອຍພຸ້ນ.

19ຄືອອກແຕ່ທ້ອງແມ່ເລີຍໄປສູ່ຂຸມຝັງສົບ ຄົງຈະເປັນການດີທີ່ບໍ່ໄດ້ມີຊີວິດຢູ່ຢ່າງນີ້.

20ບັດນີ້ ການທີ່ມີຊີວິດຢູ່ນັ້ນ ມັນສັ້ນເຫຼືອເກີນ ໃຫ້ຂ້ານ້ອຍດີໃຈກັບເວລາທີ່ຍັງເຫລືອຢູ່ແດ່

21ຂ້ານ້ອຍຈະຈາກໄປໃນບໍ່ຊ້ານີ້ ແລະຈະບໍ່ກັບຄືນມາ ສູ່ດິນແດນອັນມືດມົວແລະເສົ້າໂສກ

22ດິນແດນທີ່ເຕັມໄປດ້ວຍຄວາມມືດແລະຄວາມຕາຍ, ບໍ່ມີລະບົບລະບຽບ ເພາະທີ່ນັ້ນແຫລະ ຄວາມສະຫວ່າງເປັນເໝືອນດັ່ງຄວາມມືດຕຶບ.”

← Chapter 9 Jump to: Chapter 11 →