Job 27

Lao Bible 2012 (ພຣະຄຳພີສັກສິ)

← Chapter 26 Jump to: Chapter 28 →

1“ຂ້ອຍຂໍສາບານຕໍ່ພຣະເຈົ້າ ອົງຊົງຊີວິດຢູ່ ແລະຊົງຣິດອຳນາດຍິ່ງໃຫຍ່ ອົງທີ່ບໍ່ຍອມໃຫ້ຄວາມຍຸດຕິທຳ ແລະນຳຊີວິດອັນລະທົມແກ່ຂ້ອຍ.

3ຕາບໃດທີ່ຂ້ອຍນີ້ຍັງມີຊີວິດຢູ່ ທີ່ພຣະເຈົ້າໂຜດໃຫ້ຂ້ອຍມີລົມຫາຍໃຈ,

4ສົບປາກຂ້ອຍຈະບໍ່ຍອມເວົ້າຄວາມຊົ່ວໃດໆເລີຍ ລີ້ນຂ້ອຍຈະບໍ່ຍອມເວົ້າຕົວະຈັກເທື່ອດ້ວຍ.

5ຂ້ອຍຈະບໍ່ເວົ້າວ່າຄົນ ດັ່ງພວກເຈົ້າເປັນຝ່າຍຖືກເລີຍ ຂ້ອຍຈະຢືນຢັນວ່າ ຂ້ອຍບໍ່ຜິດຈົນເທົ່າວັນຕາຍພຸ້ນ.

6ຂ້ອຍຈະບໍ່ຍົກເລີກສິດຮຽກຮ້ອງວ່າຂ້ອຍບໍ່ຜິດ ຈິດສຳນຶກຂ້ອຍຍັງແຈ່ມໃສແລະຜຸດຜ່ອງຢູ່.

7ຂໍໃຫ້ຄົນທີ່ຕໍ່ຕ້ານ ແລະຕໍ່ສູ້ກັບຂ້ອຍທັງໝົດ ຖືກລົງໂທດດັ່ງຄົນຊົ່ວຊາມ ແລະຄົນອະທຳເຖີດ.

8ຄົນບໍ່ເຊື່ອຖືພຣະເຈົ້ານັ້ນມີຄວາມຫວັງຫຍັງແດ່? ໃນໂມງທີ່ພຣະເຈົ້າຖາມເອົາຊີວິດຂອງພວກເຂົາ?

9ເມື່ອຄວາມເດືອດຮ້ອນແລ່ນມາຕຳພວກເຂົາ ພຣະເຈົ້າຈະຟັງສຽງຂອງພວກເຂົາຫລືບໍ່?

10ພວກເຂົາປາຖະໜາແຕ່ຄວາມຊົມຊື່ນຍິນດີ ຈຶ່ງໄດ້ພາວັນນາອະທິຖານຫາພຣະອົງຢູ່ບໍ່ຂາດ.

11ຂໍໃຫ້ຂ້ອຍສັ່ງສອນພວກເຈົ້າແດ່ວ່າ ຣິດອຳນາດຂອງພຣະເຈົ້າຍິ່ງໃຫຍສໍ່າໃດ ແລະອະທິບາຍເຖິງແຜນການ ຊຶ່ງພຣະເຈົ້າອົງຊົງຣິດອຳນາດຍິ່ງໃຫຍ່ໄດ້ວາງໄວ້.

12ແຕ່ທີ່ສຸດນັ້ນ ພວກເຈົ້າກໍບໍ່ໄດ້ເຫັນດ້ວຍຕົນເອງ; ເປັນຫຍັງພວກເຈົ້າຈຶ່ງເວົ້າສິ່ງທີ່ເຫລວໄຫລຢ່າງນີ້?”

13ຕໍ່ໄປນີ້ແມ່ນສິ່ງທີ່ພຣະເຈົ້າ ອົງຊົງຣິດອຳນາດຍິ່ງໃຫຍ່ຈະກະທຳ ພຣະອົງຈະລົງໂທດຄົນຊົ່ວທັງຫລາຍ ແລະຄົນມັກຮຸນແຮງຢ່າງໃດແດ່.

14ພວກເຂົາອາດມີລູກຊາຍຫລາຍຄົນກໍໄດ້ ແຕ່ຈະຖືກຂ້າທັງໝົດໃນເສິກສົງຄາມ ລູກໆຂອງພວກເຂົາຈະອຶດຫິວ ເພາະບໍ່ມີອາຫານການກິນພໍໃຫ້ອີ່ມທ້ອງ.

15ພວກທີ່ລອດຊີວິດກໍຈະຕາຍດ້ວຍພະຍາດໂຣຄາ ແມ່ນແຕ່ເມຍໝ້າຍຂອງພວກເຂົາກໍຈະບໍ່ໄວ້ທຸກໃຫ້.

16ພວກຄົນຊົ່ວຊ້າອາດຈະມີເງິນຫລວງຫລາຍ ແລະມີເຄື່ອງນຸ່ງຫົ່ມເກີນຄວາມຈຳເປັນດ້ວຍ.

17ເຂົາຈະທ້ອນໂຮມມັນ, ແຕ່ຄົນຊອບທຳຈະໄດ້ນຸ່ງຫົ່ມເຄື່ອງນັ້ນ ຄົນສັດຊື່ຈະໄດ້ໃຊ້ເງິນຂອງພວກເຂົາ.

18ຄົນຊົ່ວສ້າງເຮືອນໄວ້ດັ່ງໄຍແມງມຸມ ຫລືດັ່ງຕູບຂອງທາດຮັບໃຊ້ຄົນໜຶ່ງພວມເຝົ້າຍາມທົ່ງເຂົ້າ.

19ເປັນເທື່ອສຸດທ້າຍ ທີ່ເຂົາເຈົ້າ ຈະເອ່ນຕົວນອນກັບຄວາມຮັ່ງມີ ເມື່ອຕື່ນຂຶ້ນມາກໍພົບວ່າຊັບສິນຫັບຫາຍໄປສິ້ນ.

20ຄວາມຢ້ານໃຫຍ່ຈະຫລອນມາດັ່ງນໍ້າຖ້ວມນາ ລົມຕອນກາງຄືນຈະພັດພາພວກເຂົາໄປສິ້ນ.

21ລົມຈາກທິດຕາເວັນອອກຈະພັດພວກເຂົາໄປໃຫ້ໄກ ຮື້ຮາກຖານຂອງພວກເຂົາໂຍນຖິ້ມຢ່າງຮ້າຍກາດ.

22ມັນຈະພັດລົງໃສ່ພວກເຂົາໂດຍບໍ່ມີຄວາມປານີ ຂະນະທີ່ພວກເຂົາພະຍາຍາມປົບໜີໄປຢ່າງສຸດຂີດ.

23ລົມໂຫ່ຮ້ອງໃສ່ພວກເຂົາເມື່ອແລ່ນໜີໄປ ໂດຍເຮັດໃຫ້ຢ້ານກົວອຳນາດທີ່ທຳລາຍພວກເຂົາໄດ້.

← Chapter 26 Jump to: Chapter 28 →