Job 4

Lao Bible 2012 (ພຣະຄຳພີສັກສິ)

← Chapter 3 Jump to: Chapter 5 →

1“ໂຢບເອີຍ ຖ້າຂ້ອຍເວົ້າຈະບໍ່ລົບກວນເຈົ້າບໍ? ຂ້ອຍອົດມິດເສີຍຕໍ່ໄປອີກບໍ່ໄດ້ແລ້ວ.

3ເຈົ້າເຄີຍສອນຄົນມາແລ້ວຕັ້ງຫລວງຫລາຍ ແລະຊ່ວຍຊູຜູ້ອ່ອນແຮງໃຫ້ເຂັ້ມແຂງຂຶ້ນ.

4ເມື່ອຄົນໜຶ່ງສະດຸດລົ້ມໝົດແຮງແລະເມື່ອຍອ່ອນ, ຄຳບອກສອນຂອງເຈົ້າກໍຊ່ວຍຍູ້ໃຫ້ເຂົາຢືນຂຶ້ນ.

5ບັດນີ້ ແມ່ນທີຂອງເຈົ້າທີ່ລຳບາກຂັດສົນ ເຈົ້າສູ້ຈົນບໍ່ໄຫວຈຶ່ງເຮັດໃຫ້ເຈົ້າມຶນງົງຢູ່.

6ເຈົ້າຢຳເກງພຣະເຈົ້າແລະຊີວິດກໍບໍ່ດ່າງພອຍ, ສະນັ້ນ ເຈົ້າຈົ່ງໝັ້ນໃຈ ແລະຫວັງໃຈເອົາໄວ້.

7ບັດນີ້ ເຈົ້າຈົ່ງຄິດທົບທວນເບິ່ງດູວ່າ ມີຄົນທຳຊອບຜູ້ໃດເຄີຍພົບໄພພິບັດ.

8ຂ້ອຍເຄີຍເຫັນຄົນໄຖຄາດຄວາມຊົ່ວນາໆ ແລະປູກຝັງຄວາມຜິດດັ່ງເມັດຂອງພັນພືດ; ບັດນີ້ ກໍເລີຍເກັບກ່ຽວໄດ້ສິ່ງຊົ່ວຮ້າຍແລະຜິດໆ ພຣະເຈົ້າໂກດຮ້າຍທັງທຳລາຍພວກເຂົາດັ່ງພະຍຸກ້າ.

10ຄົນຊົ່ວແຜດສຽງຮ້ອງດັງກ້ອງດັ່ງໂຕສິງ, ແຕ່ພຣະເຈົ້າໃຫ້ພວກເຂົາມິດແລະຫັກແຂ້ວພວກເຂົາຖິ້ມ.

11ດັ່ງສິງໂຕມີແຮງ ກໍຍັງພິນາດເພາະຂາດເຫຍື່ອ ແລະລູກຂອງສິງກໍແຕກກະຈັດກະຈາຍໄປ.

12ຄັ້ງໜຶ່ງ ມີຖ້ອຍຄຳມາເຖິງຂ້ອຍຢ່າງງຽບໆ ສຽງດັງຄ່ອຍໆ ຈົນຂ້ອຍເກືອບບໍ່ໄດ້ຍິນ.

13ດັ່ງຝັນຮ້າຍທີ່ກຸກກວນຂ້ອຍຕອນນອນຫລັບ ຂ້ອຍນອນຫລັບໆຕື່ນໆສັບສົນວຸ້ນວາຍໃຈຍ້ອນ.

14ຂ້ອຍຈຶ່ງມົວແຕ່ຢ້ານ ແລະຂົນລຸກເຕັມຕົວ; ທົ່ວທັງຮ່າງກາຍສັ່ນເຊັນດ້ວຍຄວາມຢ້ານ.

15ລົມເບົາໆພັດມາແຕະຕ້ອງໃບໜ້າຜ່ານໄປ ແລະຂົນລຸກຕາມຕົນຕົວສັ່ນເຊັນດ້ວຍຄວາມຢ້ານ.

16ຂ້ອຍເຫັນສິ່ງໜຶ່ງຢູ່ຫັ້ນຢືນຈຶ້ງຢູ່ບໍ່ເໜັງຕີງ; ຂ້ອຍສັກຕາເບິ່ງແຕ່ບອກບໍ່ໄດ້ວ່າແມ່ນຫຍັງແທ້. ແລ້ວຂ້ອຍກໍໄດ້ຍິນສຽງໜຶ່ງພວມເວົ້າອອກມາ ເປັນສຽງທີ່ດັງມາຈາກຄວາມງຽບດັ່ງນີ້:

17ມີຜູ້ໃດແດ່ຊອບທຳໃນສາຍຕາ ຂອງພຣະເຈົ້ານໍ ຫລືມີຜູ້ໃດແດ່ບໍຣິສຸດຕໍ່ໜ້າ ອົງພຣະຜູ້ສ້າງຂອງຕົນໄດ້?

18ພຣະເຈົ້າບໍ່ໄວ້ໃຈຜູ້ຮັບໃຊ້ພຣະອົງໃນສະຫວັນ; ຊົງພົບແມ່ນແຕ່ຄວາມຜິດໃນຝູງເທວະດານັ້ນ.

19ເຈົ້າຄິດວ່າພຣະອົງຈະໄວ້ວາງໃຈຕໍ່ ສິ່ງທີ່ຖືກສ້າງຈາກດິນໜຽວຊັ້ນບໍ? ສິ່ງທີ່ເປັນຂີ້ດິນອາດຖືກຢຽບໝຸ່ນ ໃຫ້ທະລາຍໄປດັ່ງແມງເມົ່າກໍໄດ້.

20ຄົນໜຶ່ງອາດມີຊີວິດຢູ່ໄດ້ໃນຍາມເຊົ້າ ແຕ່ຕາຍຢ່າງບໍ່ຄາດຄິດ ເມື່ອຕອນແລງມາຮອດ.

21ສິ່ງທັງໝົດທີ່ລາວມີຢູ່ ກໍສູນເສຍໄປໝົດ; ເມື່ອລາວຕາຍໄປກໍຍັງບໍ່ມີປັນຍາຊໍ້າ.”

← Chapter 3 Jump to: Chapter 5 →