Job 22

Lao Bible 2012 (ພຣະຄຳພີສັກສິ)

← Chapter 21 Jump to: Chapter 23 →

1“ມະນຸດທີ່ຕ້ອງຕາຍຈະເປັນປະໂຫຍດອັນໃດສຳລັບພຣະເຈົ້າ? ແມ່ນມະນຸດທີ່ສະຫລາດທີ່ສຸດ ກໍເປັນປະໂຫຍດສຳລັບລາວເອງເທົ່ານັ້ນ?

3ທີ່ເຈົ້າເຮັດຖືກຕ້ອງນັ້ນ ເປັນປະໂຫຍດຫຍັງແກ່ພຣະເຈົ້າ? ຫລືທີ່ເຈົ້າເຮັດດີຮອບຄອບນັ້ນ ຊ່ວຍຫຍັງພຣະອົງໄດ້ແດ່?

4ມັນບໍ່ແມ່ນຍ້ອນເຈົ້າຢຳເກງພຣະເຈົ້າດອກຫລື ທີ່ພຣະອົງຕໍ່ສູ້ເຈົ້າ ແລະນຳເຈົ້າຂຶ້ນສານນັ້ນ.

5ແຕ່ຍ້ອນເຈົ້າຕ່າງຫາກ ທີ່ໄດ້ເຮັດບາບໄວ້ຫລາຍ ຍ້ອນຄວາມຊົ່ວທັງໝົດທີ່ເຈົ້າໄດ້ກະທຳໄວ້.

6ເພື່ອໃຫ້ພີ່ນ້ອງຂອງເຈົ້າຄືນໜີ້ ທີ່ພວກເຂົາໄດ້ຢືມໄປ ເຈົ້າເອົາເຄື່ອງນຸ່ງຂອງພວກເຂົາ ແລະບໍ່ປະຫຍັງໃຫ້ພວກເຂົານຸ່ງ.

7ເຈົ້າບໍ່ຍອມແມ່ນແຕ່ໃຫ້ນໍ້າແກ່ຜູ້ຫິວກະຫາຍ ແລະປະຕິເສດລ້ຽງດູແມ່ນແຕ່ຜູ້ອຶດຢາກ.

8ເຈົ້າໄດ້ໃຊ້ອຳນາດແລະຕຳແໜ່ງຢ່າງຜິດໆ ເພື່ອຢຶດດິນດອນບ່ອນທຳມາຫາກິນທັງໝົດນັ້ນ.

9ເຈົ້າບໍ່ພຽງແຕ່ປະຕິເສດຊ່ວຍແມ່ໝ້າຍທັງຫລາຍ ແຕ່ເຈົ້າຍັງໄດ້ປຸ້ນ ແລະຂົ່ມເຫັງເດັກກຳພ້າດ້ວຍ.

10ສະນັ້ນ ບັດນີ້ຢູ່ອ້ອມຕົວເຈົ້າຈຶ່ງເຕັມແຕ່ສິ່ງດັກຈັບ ໃນທັນໃດ ເຈົ້າກໍເຕັມໄປແຕ່ຄວາມຢ້ານ.

11ມັນແຮ່ງມືດມົວຍິ່ງຂຶ້ນ ຈົນເຈົ້າເບິ່ງບໍ່ເຫັນມັນ ມັນມາດັ່ງນໍ້າໄຫລພັດຖ້ວມ ທັບເທິງຕົວເຈົ້າ.

12ພຣະເຈົ້າບໍ່ໄດ້ສະຖິດຢູ່ທີ່ຟ້າສະຫວັນບ່ອນສູງສຸດບໍ? ແລະແນມເບິ່ງໝູ່ດວງດາວທີ່ຢູ່ບ່ອນສູງໆພຸ້ນ?

13ເຈົ້າຊໍ້າພັດຖາມວ່າ, ‘ພຣະເຈົ້າຮູ້ໄດ້ຢ່າງໃດ? ກ້ອນເມກບັງພຣະອົງໄວ້ ຈະຕັດສິນຂ້ອຍໄດ້ຢ່າງໃດ?’

14ເຈົ້າຄິດວ່າເມກອັນໜາບັງພຣະອົງບໍ່ໃຫ້ເຫັນເຈົ້າບໍ ເມື່ອພຣະອົງຍ່າງເທິງວົງໂຄ້ງຂອງຂອບຟ້າ.

15ເຈົ້າໄດ້ຕັດສິນໃຈຍ່າງໃນຮ່ອມແຫ່ງເສັ້ນທາງ ບ່ອນທີ່ຄົນຊົ່ວທັງຫລາຍໄດ້ເດີນຕາມສະເໝີນັ້ນ?

16ແມ່ນວ່າກ່ອນເວລາຂອງພວກເຂົາມາຮອດມາເຖິງ ພວກເຂົາກໍຖືກນໍ້າຖ້ວມກວາດລ້າງໄປຈົນໝົດສິ້ນ.

17ຄົນປະຖິ້ມພຣະເຈົ້າກໍເປັນເຊັ່ນນີ້ແຫລະ ແລະຄິດວ່າພຣະອົງຈະເຮັດຫຍັງໃຫ້ພວກເຂົາບໍ່ໄດ້.

18ແທ້ຈິງແມ່ນພຣະເຈົ້າ ທີ່ໄດ້ເຮັດໃຫ້ພວກເຂົາຮຸ່ງເຮືອງ ຂ້ອຍຈຶ່ງບໍ່ເຂົ້າໃຈຄວາມຄິດຂອງຄົນຊົ່ວເຊັ່ນນັ້ນ.

19ຄົນດີກໍດີໃຈໄດ້ ແລະຄົນບໍ່ຜິດກໍຫົວເລາະ ເມື່ອພວກເຂົາໄດ້ເຫັນຄົນຊົ່ວຖືກຕັດສິນ.

20ສິ່ງຂອງທີ່ຄົນຊົ່ວມີນັ້ນ ກໍຖືກທຳລາຍຖິ້ມໝົດ ແລະໄຟກໍເຜົາຜານສິ່ງທັງປວງທີ່ຍັງເຫລືອຢູ່.

21ໂຢບເອີຍ ບັດນີ້ຈົ່ງຄືນດີກັບພຣະເຈົ້າສາ ແລະທຸກສິ່ງກໍຈະເປັນໄປໂດຍດີສຳລັບເຈົ້າ. ຢ່າສູ່ເຮັດກັບພຣະເຈົ້າຄືພຣະອົງເປັນສັດຕູໃດ ຖ້າເຮັດໄດ້ ພຣະອົງກໍຈະອວຍພອນເຈົ້າ.

22ຈົ່ງຮັບຄຳສັ່ງສອນທີ່ຊົງມອບໃຫ້ເຈົ້ານັ້ນສາ ແລະຮັກສາພຣະທຳໄວ້ຢູ່ໃນຈິດໃຈຂອງເຈົ້າ.

23ຈົ່ງກັບມາຫາພຣະເຈົ້າດ້ວຍຄວາມຖ່ອມໃຈ ໃຫ້ທຸກຄວາມຊົ່ວສິ້ນສູນໄປຈາກເຮືອນຂອງເຈົ້າ.

24ຈົ່ງໂຍນຄຳຂອງເຈົ້າຖິ້ມອອກໄປສາ ໂຍນຄຳບໍຣິສຸດທີ່ເຈົ້າມີໃສ່ຫ້ວຍທີ່ແລ້ງນໍ້າ.

25ຈົ່ງໃຫ້ພຣະເຈົ້າອົງຊົງຣິດອຳນາດຍິ່ງໃຫຍ່ເປັນຄຳຂອງເຈົ້າສາ ແລະໃຫ້ພຣະອົງເປັນເງິນກອງສູງໆສຳລັບເຈົ້າ.

26ແລ້ວເຈົ້າກໍຈະປິຕິຍິນດີໃນອົງຊົງຣິດອຳນາດຍິ່ງໃຫຍ່ ແລະຈະເງີຍໜ້າຂອງເຈົ້າຂື້ນຫາພຣະເຈົ້າ.

27ເມື່ອເຈົ້າພາວັນນາອະທິຖານຫານັ້ນ ພຣະອົງກໍຈະຊົງຕອບ ເຈົ້າຈະຮັກສາຄຳສາບານທີ່ເຈົ້າໄດ້ເຮັດໄວ້.

28ເຈົ້າຈະເຮັດສຳເລັດໃນທຸກສິ່ງທີ່ເຈົ້າກະທຳ ແສງແຈ້ງຈະສ່ອງໃສໃນທາງເດີນຂອງເຈົ້າ.

29ພຣະເຈົ້າຂົ່ມຄົນຈອງຫອງ ໃຫ້ພວກເຂົາໄດ້ຕົກຕໍ່າ ແລະຊ່ວຍຊູຄົນຖ່ອມໃຈໃຫ້ຢູ່ໄດ້ຢ່າງປອດໄພ.

30ພຣະອົງຈະຊ່ວຍກູ້ເອົາ ຖ້າເຈົ້າບໍ່ມີຄວາມຜິດ ຖ້າສິ່ງທີ່ເຈົ້າກະທຳເປັນການຖືກຕ້ອງ.”

← Chapter 21 Jump to: Chapter 23 →