Job 5

Lao Bible 2012 (ພຣະຄຳພີສັກສິ)

← Chapter 4 Jump to: Chapter 6 →

1“ໂຢບເອີຍ ຈົ່ງສົ່ງສຽງເອີ້ນ ມີຜູ້ໃດຈະຕອບແດ່ ມີເທວະດາຕົນໃດທີ່ເຈົ້າຫັນໜ້າຫາໄດ້ບໍ?

2ຄວາມຮ້າຍຂ້າຄົນເບົາປັນຍາ, ຄວາມອິດສາຂ້າຄົນໂງ່.

3ຂ້ອຍໄດ້ເຫັນຄົນໂງ່ຈ້າ ແຕ່ເບິ່ງຄືວ່າໝັ້ນຄົງ ແຕ່ເມື່ອຂ້ອຍຮ້ອງຂໍ ທັນໃດນັ້ນ ເຮືອນຂອງພວກເຂົາກໍຖືກສາບແຊ່ງ.

4ພວກລູກຊາຍພວກເຂົາບໍ່ເຄີຍພົບຄວາມປອດໄພ ຈົນບໍ່ມີຜູ້ໃດຈະຢືນສູ້ຄວາມທີ່ສານໃຫ້ພວກເຂົາໄດ້.

5ໂອ ຜົນເກັບກ່ຽວຂອງພວກເຂົານັ້ນ ຄົນຫິວກໍກິນເສຍ ແມ່ນແຕ່ສ່ວນທີ່ເອົາໜາມທຶບໄວ້ ພວກເຂົາກໍເອົາໄປ. ຄົນທີ່ຫິວໂຫຍນັ້ນ ກໍຈະຢຶດຊັບສົມບັດຂອງລາວຈົນໝົດກ້ຽງ.

6ຄວາມຊົ່ວຊ້າບໍ່ໄດ້ງອກໃຫຍ່ຂຶ້ນຈາກດິນ ພື້ນດິນກໍບໍ່ໄດ້ຜະລິດຄວາມເດືອດຮ້ອນໃຫ້.

7ບໍ່ແມ່ນດອກ ແມ່ນຄົນທີ່ເຮັດໃຫ້ຕົນເດືອດຮ້ອນເອງ ດັ່ງໝັດໄຟປິວອອກຈາກແປວໄຟນັ້ນແຫຼະ.

8ຖ້າຂ້ອຍເປັນເຈົ້າກໍຈະຂໍໃຫ້ພຣະເຈົ້າເບິ່ງແຍງ ແລະສະເໜີເລື່ອງລາວໃຫ້ພຣະອົງຮູ້.

9ພວກເຮົາເຂົ້າໃຈບໍ່ໄດ້ສິ່ງຍິ່ງໃຫຍ່ທີ່ພຣະອົງກະທຳ ແລະການອັດສະຈັນອັນບໍ່ມີທີ່ສິ້ນສຸດເປັນນັ້ນ.

10ພຣະອົງໃຫ້ຝົນຕົກມາໃສ່ທົ່ວທັງດິນແດນ ແລະໃຫ້ທົ່ງໄຮ່ທົ່ງນາມີນໍ້າເພື່ອຫລໍ່ລ້ຽງ.

11ຖືກຕ້ອງ ແມ່ນພຣະເຈົ້າຊົງຍົກຜູ້ທີ່ຖ່ອມຕົວລົງ ແລະຜູ້ທີ່ໄວ້ທຸກ ພຣະອົງກໍປະທານຄວາມປອດໄພໃຫ້.

12ພຣະອົງຂັດຂວາງແຜນການຊົ່ວ ຂອງຄົນສະຫລາດແກມໂກງ ແລະດັກຈັບຄົນທີ່ຫລັກແຫລມ ຕາມກົນອຸບາຍຂອງເຂົາເຈົ້າ ເພື່ອວ່າພວກເຂົາຈະບໍ່ໄດ້ເຮັດໃຫ້ສຳເລັດຜົນ; ເຖິງແມ່ນກາງເວັນ ພວກເຂົາກໍງົມຢູ່ໃນຄວາມມືດ.

15ແຕ່ພຣະເຈົ້າຊ່ວຍຄົນທຸກ ໃຫ້ພົ້ນຈາກຕາຍ; ພຣະອົງຊ່ວຍຄົນຂັດສົນຈາກການຖືກກົດຂີ່.

16ພຣະອົງໃຫ້ຄົນທຸກລຳບາກມີຄວາມຫວັງໃຈ ແລະຊົງງັບປາກຄົນຊົ່ວໃຫ້ມິດງຽບ.

17ຄວາມສຸກເປັນຂອງຜູ້ທີ່ພຣະເຈົ້າຕີສອນເດີ ຢ່າໂກດເຄືອງໃຈເມື່ອພຣະອົງຕຳໜິເຈົ້າ.

18ພຣະອົງພັນບາດແຜໃຫ້ ເພາະຊົງໃຫ້ເກີດບາດເຈັບ; ມືພຣະອົງຂ້ຽນຕີ ແລະມືພຣະອົງປິ່ນປົວໃຫ້ດີໄດ້.

19ພຣະອົງຈະຊ່ວຍເຈົ້າ ຈາກຖືກທຳຮ້າຍຫລາຍຄັ້ງຫລາຍຫົນ;

20ເມື່ອມີຄວາມອຶດຢາກ ພຣະອົງຈະບໍ່ໃຫ້ຕາຍ ຍາມເສິກເສືອ ພຣະອົງຈະປ້ອງກັນເຈົ້າໄວ້.

21ພຣະເຈົ້າຊ່ວຍກູ້ເອົາເຈົ້າໄວ້ຈາກຄົນນິນທາ; ພຣະອົງຈະຊ່ວຍເອົາ ເມື່ອຄວາມຈິບຫາຍມາຮອດ.

22ເຈົ້າຈະຍີ້ມຫົວໃສ່ ຍາມລຳບາກແລະອຶດຫິວ ແລະບໍ່ຢ້ານກົວຕໍ່ສັດປ່ານາໆຊະນິດດ້ວຍ.

23ທົ່ງນາທີ່ເຈົ້າໄຖນັ້ນ ຈະບໍ່ມີຫີນເຈືອປົນ ໝູ່ສັດຮ້າຍກໍຈະບໍ່ມາວົນວາຍທຳຮ້າຍເຈົ້າ.

24ແລ້ວເຈົ້າຈະຢູ່ໃນທີ່ພັກຢ່າງເຕັມປ່ຽມສຸກສັນ; ເມື່ອແນມເບິ່ງຝູງແກະ ກໍຢູ່ສະບາຍຫາຍຮ້ອນ.

25ເຈົ້າຈະມີລູກຫລານຫລວງຫລາຍເຫລືອຄະນານັບ ດັ່ງຫຍ້າຊ້ອນຂຽວຊອນລອນຕາມທົ່ງນາ.

26ເໝືອນດັ່ງເຂົ້າສຸກແລ້ວ ລໍເຖິງລະດູກ່ຽວ ເຈົ້າຈະມີອາຍຸຍືນໝັ້ນຈົນແກ່ຊະຣາ.

27ໂຢບເອີຍ ພວກເຮົາຮູ້ສິ່ງນີ້ ມາຕັ້ງແຕ່ນານ ມັນເປັນຄວາມຈິງ ບັດນີ້ ຈົ່ງຮັບເອົາມັນໄວ້ເຖີດ.”

← Chapter 4 Jump to: Chapter 6 →