Job 41

Lao Bible 2012 (ພຣະຄຳພີສັກສິ)

← Chapter 40 Jump to: Chapter 42 →

1ຜູ້ໃດແດ່ຈັບເລວີອາທັນ ໄດ້ດ້ວຍສາຍເບັດນໍ? ຫລືມັດລີ້ນມັນດ້ວຍເຊືອກໄວ້ໄດ້?

2ເຈົ້າເອົາເຊືອກຄ້ອງຮູດັງມັນໄວ້ໄດ້ບໍ? ຫລືໃຊ້ຂໍເກາະຄາງມັນຄຸມໄວ້ໄດ້ຫລືບໍ່?

3ມັນຈະຂໍຮ້ອງເຈົ້າໃຫ້ປ່ອຍມັນໄປບໍ? ມັນຈະຂໍໃຫ້ເຈົ້າເມດຕາມັນຫລືບໍ່?

4ມັນຈະຍິນຍອມເຮັດຂໍ້ຕົກລົງກັບເຈົ້າບໍ? ແລະສັນຍາຈະຍອມຮັບໃຊ້ເຈົ້າສືບໄປຫລືບໍ່?

5ເຈົ້າຈະມັດມັນໄວ້ດັ່ງມັດນົກລ້ຽງໄດ້ບໍ? ເພື່ອເປັນສິ່ງເພີດເພີນໃຫ້ສາວຮັບໃຊ້ຂອງເຈົ້າ?

6ຄົນຫາປານັ້ນ ຈະຕໍ່ລອງກັບມັນໄດ້ບໍ? ພໍ່ຄ້າຈະຕັດເປັນຕ່ອນຂາຍທີ່ຕະຫລາດໄດ້ຫລືບໍ່?

7ເຈົ້າເອົາຫອກສຽບໜັງຂອງມັນໄດ້ບໍ? ຫລືໃຊ້ຫລາວແທງຫົວຂອງມັນໄດ້ຫລືບໍ່?

8ລອງບາຍມັນເບິ່ງເທື່ອໜຶ່ງ ຈະບໍ່ຢາກລອງອີກເລີຍ ຖ້າເຈົ້າເຄີຍຕໍ່ສູ້ມັນ ເຈົ້າຈະລືມບໍ່ລົງຈັກເທື່ອ.

9ມະນຸດໝົດຫວັງ ທີ່ຈະປາບມັນໃຫ້ຮູ້ຄວາມ ພໍຫລຽວເຫັນມັນ ກໍຫງາຍຫລັງລົງກັບພື້ນ.

10ເມື່ອມັນຕື່ນຂຶ້ນ ມັນກໍໂຫດຮ້າຍເຫລືອຫລາຍ ບໍ່ມີຜູ້ໃດກ້າຢືນຢູ່ ສູ້ໜ້າກັບມັນໄດ້.

11ຜູ້ໃດແດ່ໂຈມຕີມັນໄດ້ ແລະຍັງຢູ່ຢ່າງປອດໄພ? ບໍ່ມີຜູ້ໃດໃນທົ່ວໂລກນີ້ ທີ່ສາມາດເຮັດໄດ້.

12ຂໍໃຫ້ເຮົາບອກເຈົ້າກ່ຽວກັບຂາຂອງມັນ ເລົ່າເຖິງຄວາມຍິ່ງໃຫຍ່ແລະເຫື່ອແຮງມັນພ້ອມ.

13ບໍ່ມີຜູ້ໃດເອົາເຄື່ອງຊັ້ນນອກມັນມາຈີກໄດ້ເລີຍ ຫລືແທງເຂົ້າໃນເສື້ອຫຸມເກາະ ທີ່ມັນນຸ່ງນັ້ນໄດ້.

14ຜູ້ໃດເຮັດໃຫ້ມັນອ້າຄາງກະໄຕໄດ້ແດ່ ຊຶ່ງມີແຕ່ແຂ້ວຄົມໜ້າສະຫຍອງຂວັນ?

15ທີ່ຫລັງ ມັນນັ້ນເຮັດດ້ວຍໂລ້ເປັນແຖວໆ ຜູກມັດເຂົ້າກັນ ແລະ ແຂງສໍ່າກັບຫີນເປັນກ້ອນ.

16ແຕ່ລະອັນຕິດເຂົ້າກັນໄດ້ໜາແໜ້ນກັບຕົວ ແມ່ນແຕ່ລົມກໍພັດຜ່ານທາງກາງເຂົ້າໄປບໍ່ໄດ້.

17ທັງໝົດນັ້ນຜູກກັນເຂົ້າສະໜິດແໜ້ນທີ່ສຸດ ຊຶ່ງບໍ່ມີສິ່ງໃດດຶງມັນອອກເປັນປ່ຽງໆໄດ້.

18ໄຟມາບແມບຂຶ້ນ ເມື່ອມັນຈາມອອກມາ ຕາມັນກໍລຸກແດງເປັນແສງ ດັ່ງຕາເວັນກຳລັງຂຶ້ນ.

19ແປວໄຟອອກມາຈາກທາງໃນປາກຂອງມັນ ແລະມີກະແສໄຟກະຈາຍອອກມາພ້ອມ.

20ຄວັນກໍຟົ້ງອອກມາຈາກທາງຮູດັງຂອງມັນ ດັ່ງຄວັນໄຟໄໝ້ຫຍ້າຄາທີ່ຟົ້ງຂຶ້ນຈາກໃຕ້ກົ້ນໝໍ້.

21ລົມຫາຍໃຈມັນຕິດໄຟໃຫ້ລຸກໄໝ້ໄດ້ໃຫຍ່ ເປັນແປວໄຟທີ່ພົ່ນອອກຈາກໃນປາກຂອງມັນ.

22ຄໍຂອງມັນນັ້ນມີອຳນາດຢ່າງມະຫາສານ ຊຶ່ງທຸກຄົນທີ່ພົບກໍຢ້ານກົວຕົວສັ່ນເຊັນທັງນັ້ນ.

23ໃນໜັງມັນນັ້ນ ບໍ່ມີຈຸດອ່ອນບ່ອນໃດເລີຍ ມັນແຂງແກ່ນເຫລືອຫລາຍຊໍ່າກັບເຫລັກກ້າ.

24ຈິດໃຈມັນແຂງກະດ້າງ ແລະບໍ່ຢ້ານຫຍັງເລີຍ ບໍ່ເຄີຍຈຳນົນຕໍ່ຜູ້ໃດ ແລະແຂງດັ່ງຫີນໂມ້ແປ້ງ.

25ເມື່ອລຸກຂຶ້ນ ຜູ້ແຂງແຮງທີ່ສຸດ ກໍຍັງສັ່ນເຊັນ; ພວກເຂົາສິ້ນຫວັງໝົດ ແລະຕ່າງກໍເກີດຢ້ານ.

26ບໍ່ມີດາບໃດໆ ເຮັດໃຫ້ມັນບາດເຈັບໄດ້ເລີຍ ແມ່ນແຕ່ຫອກຫລືລູກທະນູຫລືຫລາວກໍບໍ່ໄດ້.

27ສຳລັບມັນແລ້ວໂລຫະນັ້ນເປັນຄືກັບເຟືອງ ແລະທອງເຫລືອງກໍອ່ອນດັ່ງໄມ້ໂດກ.

28ບໍ່ມີລູກໜ້າທະນູໃດໆ ຈະເຮັດໃຫ້ມັນແລ່ນໜີໄປ ເອົາກ້ອນຫີນແກວ່ງໃສ່ມັນ ກໍສໍ່າກັບຕີຕໍເຟືອງເທົ່ານັ້ນ.

29ໄມ້ຄ້ອນກໍເປັນພຽງແຕ່ຕໍເຟືອງສຳລັບມັນ ແລະມັນຫົວເລາະຫຍໍ້ຫຍັນເມື່ອຄົນຊັດຫອກໃສ່.

30ທ້ອງມັນເປັນດັ່ງປ່ຽງເສດໝໍ້ແຕກອັນຄົມໆ ມັນບຸຂີ້ຕົມໄປດັ່ງຄາດທີ່ກຳລັງຄາດ.

31ມັນເຮັດໃຫ້ທະເລຟອງຂຶ້ນດັ່ງນໍ້າຮ້ອນຟົດ ແລະຟອງເປັນຈູມປວກດັ່ງນໍ້າຟົດໃນໝໍ້ກາ.

32ມັນປະທາງເຫລື້ອມແມບມາບໄວ້ເບື້ອງຫລັງຂອງມັນ ແລະປ່ຽນນໍ້າທະເລໃຫ້ເປັນຟອງສີຂາວປຸມປວກ.

33ບໍ່ມີສິ່ງໃດໃນໂລກນີ້ ຈະປຽບກັບມັນໄດ້ເລີຍ ມັນເປັນສັດທີ່ຖືກສ້າງມາ ບໍ່ໃຫ້ມີຄວາມຢ້ານ.

34ມັນຫຍໍ້ຫຍັນສັດຕ່າງໆ ທີ່ທະນົງຕົວທີ່ສຸດ ເປັນກະສັດບັນດາສັດທຸກໂຕ ທີ່ອາໄສຢູ່ໃນປ່າ.”

← Chapter 40 Jump to: Chapter 42 →