Job 2

Lao Bible 2012 (ພຣະຄຳພີສັກສິ)

← Chapter 1 Jump to: Chapter 3 →

1ເມື່ອເຖິງວັນທີ່ບັນດາເທວະດາຂອງພຣະເຈົ້າເຂົ້າມາຢູ່ຊ້ອງໜ້າພຣະເຈົ້າຢາເວອີກ ມານຊາຕານກໍຢູ່ໃນທີ່ນັ້ນທ່າມກາງພວກເທວະດາ.

2ພຣະເຈົ້າຢາເວຈຶ່ງຖາມມານຊາຕານວ່າ, “ເຈົ້າໄປໃສມາແດ່?” ມານຊາຕານຕອບວ່າ, “ຂ້ານ້ອຍໄປຫັ້ນມານີ້ ທ່ອງທ່ຽວໄປມາທົ່ວໂລກ.”

3ພຣະເຈົ້າຢາເວຖາມມານຊາຕານວ່າ, “ເຈົ້າໄດ້ສັງເກດເບິ່ງໂຢບ ຜູ້ຮັບໃຊ້ຂອງເຮົາບໍ? ໃນໂລກນີ້ບໍ່ມີຜູ້ໃດທີ່ສັດຊື່ແລະດີເທົ່າລາວ. ລາວຢຳເກງພຣະເຈົ້າ ແລະລະມັດລະວັງຕົວບໍ່ເຮັດຊົ່ວ. ເຈົ້າໄດ້ຊັກຊວນເຮົາໃຫ້ເຈົ້າໂຈມຕີລາວ ໂດຍບໍ່ມີເຫດຜົນຫຍັງແຕ່ໂຢບກໍຍັງສັດຊື່ຕໍ່ເຮົາ.”

4ມານຊາຕານຈຶ່ງໂຕ້ຕອບພຣະເຈົ້າຢາເວຄືນວ່າ, “ມະນຸດຍ່ອມສະລະທຸກສິ່ງເພື່ອໃຫ້ຊີວິດຕົນຍັງຢູ່.

5ແຕ່ບັດນີ້ ຖ້າວ່າພຣະອົງໃຫ້ຕົວລາວເຈັບປວດ ລາວກໍຈະສາບແຊ່ງພຣະອົງຕໍ່ໜ້າໂລດ.”

6ສະນັ້ນ ພຣະເຈົ້າຢາເວຈຶ່ງກ່າວຕໍ່ມານຊາຕານວ່າ, “ຕົກລົງ ລາວຢູ່ໃຕ້ອຳນາດຂອງເຈົ້າ ແຕ່ເຈົ້າບໍ່ຕ້ອງຂ້າລາວ.”

7ແລ້ວມານຊາຕານກໍໜີອອກຈາກການຊ້ອງໜ້າພຣະເຈົ້າຢາເວໄປ ແລະເຮັດໃຫ້ຮ່າງກາຍຂອງໂຢບເປັນບາດແຜເຕັມຕົວ.

8ໂຢບໄປນັ່ງຢູ່ໃກ້ໆກອງຂີ້ເຖົ່າ ແລະເອົາກະບີ້ງໝໍ້ແຕກຂູດຕາມເນື້ອຕົວຕົນເອງ.

9ເມຍຂອງໂຢບຈຶ່ງເວົ້າວ່າ, “ເຈົ້າຍັງຈະສັດຊື່ຢູ່ອີກບໍ? ເປັນຫຍັງບໍ່ດ່າພຣະເຈົ້າ ແລະຕາຍເສຍ?”

10ໂຢບຕອບວ່າ, “ເຈົ້າຢ່າເວົ້າແບບບໍ່ມີຄວາມຄິດຢ່າງນີ້ແມ ເມື່ອພຣະເຈົ້າໃຫ້ຂອງດີແກ່ເຮົາ ເຮົາກໍຮັບເອົາໄວ້. ເມື່ອພຣະອົງໃຫ້ຄວາມລຳບາກແກ່ເຮົາ ເຮົາຈະຈົ່ມທຸກໄດ້ຢ່າງໃດ?” ເຖິງແມ່ນໄດ້ຮັບຄວາມທົນທຸກທັງໝົດນີ້ກໍຕາມ ແຕ່ໂຢບກໍບໍ່ໄດ້ເວົ້າຫຍັງຕໍ່ສູ້ພຣະເຈົ້າເລີຍ.

11ໂຢບມີໝູ່ເພື່ອນສາມຄົນດັ່ງນີ້: ເອລີຟັດ ຊາວເຕມານ, ບິນດາດ ຊາວຊູອາ ແລະໂຊພາ ຊາວນາອາມາ. ເມື່ອໄດ້ຍິນຂ່າວວ່າ, ໂຢບກຳລັງທົນທຸກຢູ່ຢ່າງໜັກ ພວກເຂົາກໍຕັດສິນໃຈມາຢ້ຽມຢາມລາວເພື່ອເລົ້າໂລມໃຈ.

12ເມື່ອແນມເບິ່ງແຕ່ໄກ ພວກເຂົາກໍເຫັນໂຢບ; ແຕ່ພວກເຂົາຈື່ລາວບໍ່ໄດ້. ເມື່ອຈື່ລາວໄດ້ແລ້ວ ພວກເຂົາກໍພາກັນຮ້ອງໄຫ້ຄວນຄາງ ທັງຈີກເສື້ອຜ້າຂອງຕົນດ້ວຍຄວາມທຸກໃຈ ແລະຫວ່ານຂີ້ຝຸ່ນດິນໄປໃນອາກາດ ກັບທັງໂຮຍໃສ່ເທິງຫົວຂອງພວກຕົນດ້ວຍ.

13ແລ້ວພວກເຂົາກໍນັ່ງລົງກັບພື້ນດິນທີ່ນັ້ນນຳລາວ ເປັນເວລາເຈັດວັນແລະເຈັດຄືນ ໂດຍບໍ່ເວົ້າຈາຫຍັງຈັກຄຳ ຍ້ອນພວກເຂົາເຫັນໂຢບທົນທຸກຢ່າງໜັກ.

← Chapter 1 Jump to: Chapter 3 →