Job 23

Lao Bible 2012 (ພຣະຄຳພີສັກສິ)

← Chapter 22 Jump to: Chapter 24 →

1“ຄຳຈົ່ມທຸກຂອງຂ້ອຍໃນມື້ນີ້ກໍຂົມຂື່ນ; ການທີ່ຂ້ອຍຖືກຕີກໍຍັງໜັກກວ່າການຮ້ອງຄາງຂອງຂ້ອຍ.

3ຂ້ອຍຢາກຮູ້ເດວ່າຂ້ອຍຈະພົບພຣະອົງໄດ້ຢູ່ໃສ? ແລະຂ້ອຍຈະໄປພົບພຣະອົງຢູ່ທີ່ນັ້ນ.

4ຂ້ອຍຈະຖະແຫລງຄະດີຂອງຂ້ອຍຕໍ່ໜ້າພຣະອົງ ແລະຂ້ອຍຈະໃຫ້ປາກຂອງຂ້ອຍເຕັມໄປດ້ວຍການໂຕ້ແຍ້ງ.

5ຂ້ອຍຢາກຈະຮູ້ສິ່ງທີ່ພຣະອົງຕ້ອງເວົ້າອອກມາ ແລະພຣະອົງຈະຕອບຂ້ອຍຢ່າງໃດແດ່.

6ພຣະອົງໃຊ້ພຣະກຳລັງທຸກຢ່າງຕໍ່ສູ້ຂ້ອຍບໍ? ບໍ່ແມ່ນດອກ ພຣະອົງຈະຟັງຕາມທີ່ຂ້ອຍໄດ້ເວົ້າ.

7ໃນທີ່ນັ້ນ ຄົນຊອບທຳຈະອ້າງເຫດຜົນກັບພຣະເຈົ້າໄດ້ໝົດ, ແລະຂ້ອຍຈະພົ້ນຈາກການພິພາກສາຂອງຂ້ອຍ ຕະຫລອດໄປ.

8ຂ້ອຍໄດ້ຊອກຄົ້ນຫາທາງທິດຕາເວັນອອກ ແຕ່ພຣະເຈົ້າບໍ່ຢູ່ໃນທີ່ນັ້ນເລີຍ; ເມື່ອຂ້ອຍໄດ້ຊອກຄົ້ນຫາທາງທິດຕາເວັນຕົກ ຂ້ອຍກໍບໍ່ໄດ້ພົບພຣະອົງໃນທີ່ນັ້ນ.

9ພຣະເຈົ້າດຳເນີນການທັງທິດໃຕ້ແລະທິດເໜືອ ແຕ່ຂ້ອຍກໍຍັງບໍ່ໄດ້ເຫັນພຣະອົງເຊັ່ນກັນດ້ວຍ.

10ແຕ່ພຣະເຈົ້າຊົງຮູ້ທາງທີ່ຂ້ອຍກ້າວໄປ ເມື່ອພຣະອົງຊົງທົດສອບຂ້ອຍແລ້ວ ພຣະອົງຈະພົບວ່າຂ້ອຍບໍຣິສຸດເໝືອນຄຳ.

11ຂ້ອຍຕາມທາງຂອງພຣະອົງຢ່າງສັດຊື່ ແລະບໍ່ມີທ່າທີຫັນເຫໄປມາຕາມທາງໃດໆອີກ.

12ຂ້ອຍເຮັດຕາມເລື້ອຍໆສິ່ງທີ່ພຣະເຈົ້າໄດ້ສັ່ງມາ ຂ້ອຍເຮັດຕາມພຣະປະສົງ ບໍ່ແມ່ນຕາມໃຈຂ້ອຍ.

13ພຣະອົງບໍ່ມີວັນປ່ຽນແປງ ຜູ້ໃດນໍຈະປ່ຽນພຣະອົງໄດ້ ຫລືຢັບຢັ້ງພຣະອົງໃນສິ່ງທີ່ພຣະອົງຢາກເຮັດ.

14ພຣະອົງຈະໃຫ້ແຜນການທີ່ພຣະອົງວາງໄວ້ສຳລັບຂ້ອຍສຳເລັດຜົນ ຊົງເປັນໜຶ່ງໃນຫລາຍໆແຜນການທີ່ພຣະອົງມີນັ້ນ.

15ຂ້ອຍສັ່ນເຊັນຕໍ່ໜ້າພຣະເຈົ້າດ້ວຍຄວາມຢ້ານອັນໃຫຍ່ ຍິ່ງຄິດຫລາຍ ກໍຍິ່ງຢ້ານພຣະອົງຫລາຍຂຶ້ນ.

16ພຣະເຈົ້າອົງຊົງຣິດອຳນາດຍິ່ງໃຫຍ່ນັ້ນ ທຳລາຍຄວາມກ້າຫານຂອງຂ້ອຍລົງ ແລະເຮັດໃຫ້ຂ້ອຍຢ້ານກົວຫລາຍ ຕໍ່ຣິດອຳນາດຂອງພຣະເຈົ້າ ແມ່ນພຣະເຈົ້າແລະບໍ່ແມ່ນຄວາມມືດທີ່ເຮັດໃຫ້ຂ້ອຍຢ້ານກົວ ເຖິງວ່າຄວາມມືດເຮັດໃຫ້ຕາຂ້ອຍບອດກໍຕາມ.

← Chapter 22 Jump to: Chapter 24 →