Job 42

Lao Bible 2012 (ພຣະຄຳພີສັກສິ)

← Chapter 41 Jump to:

1ແລ້ວໂຢບກໍໄດ້ຕອບພຣະເຈົ້າຢາເວ.

2“ຂ້າແດ່ພຣະເຈົ້າຢາເວ ຂ້ານ້ອຍຮູ້ວ່າພຣະອົງຊົງຣິດອຳນາດຍິ່ງໃຫຍ່ ແລະພຣະອົງເຮັດທຸກໆສິ່ງຕາມໃຈມັກດ້ວຍ.

3ພຣະອົງກ່າວວ່າ, ‘ເປັນຫຍັງກ້າຖາມເຖິງພຣະປັນຍາ ເພາະຂ້ານ້ອຍເອງໂງ່ຈ້າທີ່ສຸດ.’ ຂ້ານ້ອຍໄດ້ເວົ້າເຖິງສິ່ງທີ່ຂ້ານ້ອຍບໍ່ເຂົ້າໃຈ ເຖິງສິ່ງທີ່ອັດສະຈັນຍິ່ງໃຫຍ່ທີ່ຂ້ານ້ອຍຈະຮູ້ໄດ້.

4ພຣະອົງໄດ້ບອກໃຫ້ຂ້ານ້ອຍຟັງ ເມື່ອພຣະອົງເວົ້າຈາ ແລະໃຫ້ຊອກຕອບຄຳຖາມ ທີ່ພຣະອົງຖາມນັ້ນ.

5ແລ້ວກໍພຽງແຕ່ໄດ້ຮູ້ສິ່ງທີ່ຄົນອື່ນໄດ້ບອກຂ້ານ້ອຍ ແຕ່ບັດນີ້ ຂ້ານ້ອຍເຫັນພຣະອົງດ້ວຍຕາແລ້ວ.

6ດັ່ງນັ້ນ ຂ້ານ້ອຍຈຶ່ງອັບອາຍຕໍ່ສິ່ງທີ່ໄດ້ກ່າວຈາ ຂ້ານ້ອຍເສຍໃຈ ຈຶ່ງນັ່ງທີ່ຂີ້ຝຸ່ນດິນແລະຂີ້ເຖົ່າ.”

7ຫລັງຈາກພຣະເຈົ້າຢາເວໄດ້ກ່າວຕໍ່ໂຢບສຸດແລ້ວ ພຣະເຈົ້າຢາເວກໍກ່າວຕໍ່ເອລີຟັດຊາວເຕມານວ່າ, “ເຮົາໃຈຮ້າຍໃຫ້ເຈົ້າ ແລະເພື່ອນສອງຄົນຂອງເຈົ້າ ເພາະພວກເຈົ້າບໍ່ໄດ້ເວົ້າຄວາມຈິງກ່ຽວກັບເຮົາ ຕາມວິທີທີ່ໂຢບຄົນຮັບໃຊ້ຂອງເຮົາໄດ້ເວົ້າ.

8ບັດນີ້ ຈົ່ງເອົາງົວເຖິກເຈັດໂຕ ແລະແກະເຖິກເຈັດໂຕໄປໃຫ້ໂຢບ ເພື່ອເຜົາບູຊາສຳລັບຄວາມຜິດຂອງພວກເຈົ້າ. ໂຢບຈະພາວັນນາອະທິຖານສຳລັບພວກເຈົ້າ ແລະເຮົາຈະຕອບຄຳພາວັນນາອະທິຖານຂອງລາວ ແລະເຮົາຈະບໍ່ເອົາໂທດ ຕາມທີ່ພວກເຈົ້າຄວນໄດ້ຮັບ. ພວກເຈົ້າບໍ່ໄດ້ເວົ້າຄວາມຈິງກ່ຽວກັບເຮົາດັ່ງທີ່ໂຢບໄດ້ເວົ້າ.”

9ເອລີຟັດຊາວເຕມານ, ບິນດາດຊາວຊູອາ ແລະໂຊພາຊາວນາອາມາ ກະທຳຕາມສິ່ງທີ່ພຣະເຈົ້າຢາເວໄດ້ບອກພວກເຂົາ ແລະພຣະເຈົ້າຢາເວກໍໄດ້ຕອບຄຳພາວັນນາອະທິຖານຂອງໂຢບ.

10ຕໍ່ມາ ຫລັງຈາກໂຢບໄດ້ພາວັນນາອະທິຖານສຳລັບເພື່ອນທັງສາມຄົນແລ້ວ ພຣະເຈົ້າຢາເວໄດ້ເຮັດໃຫ້ໂຢບຈະເລີນຮຸ່ງເຮືອງຂຶ້ນໃໝ່; ແລະພຣະເຈົ້າຢາເວໃຫ້ເພິ່ນຮັ່ງມີຕື່ມອີກເຖິງສອງເທົ່າ ໃນສິ່ງທີ່ເພິ່ນເຄີຍມີມາກ່ອນ.

11ພວກອ້າຍເອື້ອຍນ້ອງຂອງໂຢບ ແລະພວກໝູ່ເພື່ອນເກົ່າແກ່ ຕ່າງກໍໄດ້ມາຢ້ຽມຢາມໂຢບ ແລະກິນລ້ຽງສະຫລອງທີ່ເຮືອນຂອງເພິ່ນ. ພວກເຂົາໄດ້ສະແດງຄວາມເຫັນອົກເຫັນໃຈ ແລະເລົ້າໂລມເພິ່ນສຳລັບຄວາມເດືອດຮ້ອນທັງໝົດ ທີ່ພຣະເຈົ້າຢາເວໄດ້ນຳມາສູ່ເພິ່ນ, ແຕ່ລະຄົນໃນພວກເຂົາໄດ້ເອົາເງິນບາງສ່ວນ ແລະແຫວນຄຳຜູ້ລະວົງໃຫ້ໂຢບ.

12ພຣະເຈົ້າຢາເວໄດ້ອວຍພອນຊີວິດບັ້ນປາຍຂອງໂຢບ ຫລາຍກວ່າພຣະອົງໄດ້ອວຍພອນຊີວິດບັ້ນຕົ້ນຂອງເພິ່ນ. ໂຢບມີແກະສິບສີ່ພັນໂຕ, ອູດຫົກພັນໂຕ, ງົວສອງພັນໂຕ ແລະລໍໜຶ່ງພັນໂຕ.

13ເພິ່ນໄດ້ມີລູກຊາຍເຈັດຄົນ ແລະລູກສາວສາມຄົນ.

14ເພິ່ນໄດ້ໃສ່ຊື່ລູກສາວກົກວ່າ ເຢມີມາ, ລູກສາວຜູ້ທີສອງວ່າ ເກຊີຢາ ແລະລູກສາວຜູ້ນ້ອຍວ່າ ເກເຣັນຮັບປຸກ.

15ບໍ່ມີຍິງຜູ້ໃດໃນໂລກນີ້ ທີ່ງາມເທົ່າກັບລູກສາວຂອງໂຢບ. ພໍ່ຂອງພວກເຂົາໄດ້ແບ່ງສ່ວນມໍຣະດົກໃຫ້ຄືກັນກັບອ້າຍຂອງພວກເຂົາ.

16ຫລັງຈາກນັ້ນມາ ໂຢບກໍມີຊີວິດຢູ່ອີກໜຶ່ງຮ້ອຍສີ່ສິບປີ ນານພໍເຫັນຫລານເຫຼັນຂອງຕົນ.

17ແລ້ວເພິ່ນກໍໄດ້ຕາຍໄປ ເມື່ອເຖົ້າແກ່ຫລາຍທີ່ສຸດ.

← Chapter 41 Jump to: