Job 32

Lao Bible 2012 (ພຣະຄຳພີສັກສິ)

← Chapter 31 Jump to: Chapter 33 →

1ຍ້ອນວ່າໂຢບແນ່ໃຈໃນຄວາມບໍຣິສຸດຂອງຕົນ ຄົນທັງສາມຈຶ່ງບໍ່ໄດ້ພະຍາຍາມ ໂຕ້ຕອບລາວອີກ.

2ແຕ່ມີຄົນໜຶ່ງທີ່ຢືນຢູ່ໃກ້ໆໂຢບນັ້ນທີ່ຊື່ວ່າ ເອລີຮູ ລາວຄວບຄຸມຄວາມຮ້າຍຂອງຕົນບໍ່ໄດ້ອີກຕໍ່ໄປ ເພາະໂຢບກຳລັງອ້າງເຫດຜົນຂອງຕົນຢ່າງເໝາະສົມ ແລະກຳລັງກ່າວຫາພຣະເຈົ້າ. (ເອລີຮູເປັນລູກຊາຍຂອງບາຣາເກນ ເຊື້ອສາຍຄົນໜຶ່ງຂອງບູຊີ ແລະສັງກັດຢູ່ໃນຕະກຸນຂອງຣາມ.)

3ລາວໃຈຮ້າຍໃຫ້ເພື່ອນຂອງໂຢບສາມຄົນດ້ວຍ. ພວກເຂົາຫາຄຳເວົ້າມາຕອບໂຢບບໍ່ໄດ້ ຈຶ່ງເຮັດໃຫ້ເຫັນຄືວ່າພຣະເຈົ້າເປັນຝ່າຍຜິດ.

4ເພາະເອລີຮູເປັນຜູ້ໜຸ່ມກວ່າທຸກຄົນໃນທີ່ນັ້ນ ລາວຈຶ່ງຄອຍຖ້າຈົນທຸກໆຄົນເວົ້າໝົດສາກ່ອນ.

5ເມື່ອລາວເຫັນວ່າຊາຍທັງສາມຕອບໂຢບບໍ່ໄດ້ແລ້ວ ລາວຈຶ່ງໃຈຮ້າຍຂຶ້ນ

6ແລະເລີ່ມຕົ້ນເວົ້າ. “ຂ້ອຍຍັງໜຸ່ມນ້ອຍ ແລະພວກເຈົ້າອາວຸໂສ ດັ່ງນັ້ນ ຂ້ອຍຈຶ່ງຢ້ານທີ່ຈະບອກສິ່ງທີ່ຂ້ອຍຄິດ.

7ຂ້ອຍຄິດວ່າພວກເຈົ້າຄວນຈະເປັນຜູ້ເວົ້າຈາ ແບ່ງປັນປັນຍາຂອງຄົນທີ່ອາວຸໂສໃຫ້.

8ແຕ່ແມ່ນວິນຍານຂອງພຣະເຈົ້າອົງຊົງຣິດອຳນາດຍິ່ງໃຫຍ່ ທີ່ໄດ້ມາຫາມະນຸດແລະໃຫ້ປັນຍາແກ່ເຂົາເຈົ້າ.

9ບໍ່ແມ່ນວ່າເຖົ້າແກ່ແລ້ວຈະເປັນຄົນມີປັນຍາ ຫລືຊ່ວຍພວກເຂົາໃຫ້ຮູ້ຈັກວ່າສິ່ງໃດແດ່ທີ່ຖືກຕ້ອງ.

10ສະນັ້ນ ບັດນີ້ຈຶ່ງຢາກໃຫ້ພວກເຈົ້າຟັງຂ້ອຍລອງເບິ່ງ ຈົ່ງໃຫ້ຂ້ອຍບອກພວກເຈົ້າສິ່ງທີ່ຂ້ອຍຄິດໃນໃຈ.

11ເວລາທີ່ພວກເຈົ້າເວົ້າກັນນັ້ນ ຂ້ອຍກໍອົດທົນຟັງ ເພາະຂ້ອຍຫວັງຈະໄດ້ຍິນຄຳ ໂຕ້ຖຽງອັນເລິກລັບ.

12ແຕ່ບໍ່ມີຜູ້ໃດໃນພວກເຈົ້າ ຕິຕຽນໂຢບໄດ້ເລີຍ; ຕ່າງກໍບໍ່ພິສູດໃຫ້ເຫັນວ່າບໍ່ມີຜົນ ໃນສິ່ງທີ່ໂຢບເວົ້າ.

13ພວກເຈົ້າອ້າງວ່າຄົ້ນພົບປັນຍາໄດ້ຢ່າງໃດ? ພຣະເຈົ້າຕ້ອງຕອບໂຢບໄປ ເພາະພວກເຈົ້າຕອບບໍ່ໄດ້.

14ໂຢບ ໂຕ້ຖຽງກັບພວກເຈົ້າບໍ່ແມ່ນກັບຂ້ອຍເດີ ແຕ່ຂ້ອຍຈະບໍ່ຕອບແບບດຽວກັບທີ່ພວກເຈົ້າໄດ້ຕອບ.

15ໂຢບເອີຍ ຄຳເວົ້ານັ້ນໄດ້ເຮັດໃຫ້ພວກເຂົາຜິດພາດໄປ ພວກເຂົາບໍ່ມີຄຳຕອບໃດໆມາໃຫ້ເຈົ້າອີກແລ້ວ.

16ຈະໃຫ້ຂ້ອຍລໍຖ້າລ້າໆເມື່ອພວກເຂົາມິດງຽບຊັ້ນບໍ? ພວກເຂົາຢືນຢູ່ທີ່ນີ້ໂດຍບໍ່ມີຫຍັງເວົ້າຕໍ່ເຈົ້າອີກແລ້ວ.

17ບັດນີ້ ຂ້ອຍຈະລອງໃຫ້ຄຳຕອບຂອງຂ້ອຍເອງ ແລະບອກເຈົ້າທຸກໆສິ່ງຕາມທີ່ຂ້ອຍຄິດເຫັນນັ້ນ.

18ຂ້ອຍອົດທົນໄວ້ໄດ້ຍາກ ເພາະຢາກເວົ້າອອກມາ ຂ້ອຍກີດກັ້ນຖ້ອຍຄຳທີ່ຈະເວົ້ານັ້ນບໍ່ໄດ້.

19ຖ້າຂ້ອຍບໍ່ມີໂອກາດທີ່ຈະໄດ້ເວົ້າຈາ ກໍຈະລະເບີດອອກດັ່ງເຫຼົ້າອະງຸ່ນໃໝ່ລົ້ນຖົງໜັງ.

20ຖ້າປ່ອຍໃຫ້ຂ້ອຍເວົ້າ ກໍຈະຄ່ອຍບັນເທົາລົງ ໃຫ້ຂ້ອຍຢືນກົງຢູ່ຊື່ໆຕໍ່ໄປແມ່ນບໍ່ໄດ້.

21ການໂຕ້ຖຽງນີ້ ຂ້ອຍຈະບໍ່ເຂົ້າຂ້າງອອກຂາ ຂ້ອຍຈະບໍ່ປະຈົບປະແຈງຄົນໃດໆທັງນັ້ນ.

22ຂ້ອຍກໍບໍ່ຮູ້ວ່າຈະປະຈົບປະແຈງຢ່າງໃດກັນ ພຣະເຈົ້າຕ້ອງລົງໂທດທັນຂ້ອຍຖ້າເຮັດເຊັ່ນນັ້ນ.

← Chapter 31 Jump to: Chapter 33 →