Job 20

Lao Bible 2012 (ພຣະຄຳພີສັກສິ)

← Chapter 19 Jump to: Chapter 21 →

1“ໂຢບເອີຍ ເຈົ້າໄດ້ເຮັດໃຫ້ຂ້ອຍລຳຄານໃຈ ບັດນີ້ ຂ້ອຍອົດທົນບໍ່ໄຫວຈຶ່ງຈະໂຕ້ຕອບເຈົ້າ.

3ສິ່ງທີ່ເຈົ້າໄດ້ເວົ້ານັ້ນແມ່ນຄຳດູຖູກນິນທາ ແຕ່ຂ້ອຍຮູ້ດີຢູ່ແລ້ວວ່າຈະຕອບເຈົ້າຢ່າງໃດ.

4ເຈົ້າກໍຮູ້ແລ້ວວ່າຕັ້ງແຕ່ສະໄໝບູຮານ ເມື່ອມະນຸດເຮົາຖືກວາງທີ່ເທິງແຜ່ນດິນໂລກ

5ຄົນຊົ່ວຊ້ານັ້ນຈະມີໄຊຊະນະຢູ່ຊົ່ວຄາວ ພວກເຂົາຈະພົບຄວາມສຸກໃນໄລຍະສັ້ນໆເທົ່ານັ້ນ.

6ເຖິງແມ່ນພວກເຂົາໃຫຍ່ສູງສົ່ງຈຸຟ້າສະຫວັນ ຈົນວ່າຫົວຂອງພວກເຂົາຈຸເມກ

7ແຕ່ພວກເຂົາກໍຈະຖືກພັດຖິ້ມເໝືອນດັ່ງຂີ້ຝຸ່ນດິນ ຄົນທີ່ເຄີຍຮູ້ຈັກ ຈະຖາມກັນວ່າ, ‘ພວກເຂົາໄປໃສແລ້ວ?’

8ພວກເຂົາຈະສະຫລາຍໄປດັ່ງຄວາມຝັນ ດັ່ງນິມິດໃນຕອນກາງຄືນທີ່ຈະບໍ່ເຫັນມັນອີກ.

9ຄົນຊົ່ວຈະສູນຫາຍໄປຈາກຖິ່ນຖານຂອງຕົນ ບ່ອນທີ່ພວກເຂົາເຄີຍຢູ່ອາໄສ ກໍຈະບໍ່ເຫັນພວກເຂົາອີກເລີຍ.

10ຊັບສິນທີ່ພວກເຂົາມີນັ້ນຈະລົດນ້ອຍຖອຍລົງ ລູກຫລານຂອງພວກເຂົາຈຳໃຈຈ່າຍຄືນໃຫ້ຄົນທຸກ.

11ຮ່າງກາຍຂອງພວກເຂົາເຄີຍໜຸ່ມແໜ້ນແລະແຂງແຮງ ແຕ່ກໍຈະຖືກປ່ຽນແປງໃຫ້ເປັນຂີ້ຝຸ່ນດິນໄວໆນີ້.

12ຄວາມຊົ່ວຮ້າຍມີຣົດຊາດແຊບນົວໃນປາກຂອງພວກເຂົາ ແລະເຊື່ອງມັນໄວ້ພາຍໃນຂອງພວກເຂົາ.

14ແຕ່ໃນກະເພາະພວກເຂົາແລ້ວ ອາຫານທີ່ແຊບນັ້ນ ເປັນພິດໄພຍິ່ງກວ່າຢາເບື່ອ.

15ຄົນຊົ່ວຮາກອອກແຕ່ຊັບສິນທີ່ຕົນໄດ້ລັກມາ; ພຣະເຈົ້າເອົາຄືນແມ່ນແຕ່ຍັງຄາຢູ່ໃນກະເພາະ.

16ສິ່ງທີ່ຄົນຊົ່ວກືນກິນນັ້ນດັ່ງກືນຢາພິດລົງໄປ; ມັນຂ້າພວກເຂົາໃຫ້ຕາຍເໝືອນຖືກງູພິດຕອດ.

17ພວກເຂົາຈະບໍ່ຢູ່ລອດ ເພື່ອຊົມນໍ້າມັນໝາກກອກຫລັ່ງໄຫລ ຫລືນໍ້າເຜິ້ງແລະນໍ້ານົມທີ່ຈະໄຫລດັ່ງສາຍນໍ້າ.

18ພວກເຂົາຈະຕ້ອງສົ່ງຄືນທຸກສິ່ງທີ່ພວກເຂົາໄດ້ຫາມາ; ພວກເຂົາຈະບໍ່ມີໂອກາດຊື່ນຊົມກັບຊັບສິນຂອງຕົນຊໍ້າ

19ເພາະພວກເຂົາຂູດຮີດ ແລະລະເລີຍຕໍ່ຄົນຍາກຈົນ ທັງບຽດຢຶດເຮືອນຄົນ ທີ່ຕົນບໍ່ໄດ້ສ້າງມານັ້ນ.

20ພວກເຂົາໂລບມາກໂລພາບໍ່ພໍເປັນຈັກເທື່ອ ຈຶ່ງຮັກສາຊັບສົມບັດໃດໆໄວ້ບໍ່ໄດ້ເລີຍ.

21ເມື່ອພວກເຂົາກິນເຂົ້າ ກໍບໍ່ໃຫ້ເຫຼືອໄວ້ຈັກຢ່າງ ແຕ່ບັດນີ້ ຄວາມຮຸ່ງເຮືອງຂອງພວກເຂົາກໍມາສູ່ຈຸດຈົບ.

22ແມ່ນວ່າພວກເຂົາຈະສຳເລັດສູງສົ່ງສໍ່າໃດກໍຕາມ ແຕ່ພວກເຂົາກໍຈະຍາກຈົນໜັກລົງເທົ່ານັ້ນ.

23ຈົ່ງປ່ອຍພວກເຂົາກິນໃຫ້ສົມຈິດໃຈມັກສາເທາະ ເພາະພຣະເຈົ້າຈະລົງໂທດຢ່າງໂກດຮ້າຍໜັກ.

24ເມື່ອພວກເຂົາພະຍາຍາມປົບໜີຈາກດາບຂອງສັດຕູ ລູກໜ້າທະນູທອງກໍຈະມາຖືກພວກເຂົາໂລດ.

25ລູກທະນູຈະທະລຸຊອດຮ່າງກາຍຂອງພວກເຂົາ; ຕົນຕົວຂອງພວກເຂົາກໍເປິເປື້ອນໄປດ້ວຍເລືອດ. ເມື່ອໃດຖອດທະນູອອກຈາກຫົວໃຈຂອງພວກເຂົາ ຄວາມຢ້ານຕາຍກໍມາສິງສູ່ພວກເຂົາເມື່ອນັ້ນ.

26ທຸກໆສິ່ງທີ່ພວກເຂົາໄດ້ສະສົມໄວ້ໄດ້ທັງໝົດ ກໍຈະຖືກທຳລາຍຖິ້ມຈົນກ້ຽງ; ໄຟທີ່ບໍ່ໄຕ້ໂດຍມືມະນຸດຈະເຜົາຜານ ພວກເຂົາກັບຄອບຄົວຂອງພວກເຂົາໃຫ້ດັບສິ້ນ.

27ຈັກກະວານເຜີຍແບບາບຂອງພວກເຂົາໃຫ້ເຫັນ; ແຜ່ນດິນໂລກກໍເປັນພະຍານຕໍ່ສູ້ພວກເຂົາດ້ວຍ.

28ຊັບສິນຂອງພວກເຂົາທຸກຢ່າງຈະຖືກທຳລາຍໄປ ຍ້ອນພຣະເຈົ້າໂກດຮ້າຍໜັກດັ່ງນໍ້າໄຫລຖ້ວມ.

29ຊາຕາກຳຂອງບັນດາຄົນຊົ່ວກໍເປັນດັ່ງນີ້ແຫລະ ພຣະເຈົ້າໃຫ້ພວກເຂົາໄດ້ຮັບເຄາະກຳເຫຼົ່ານັ້ນ.”

← Chapter 19 Jump to: Chapter 21 →