Job 37

Lao Bible 2012 (ພຣະຄຳພີສັກສິ)

← Chapter 36 Jump to: Chapter 38 →

1ລົມພະຍຸເຮັດໃຫ້ຫົວໃຈຂ້ອຍເຕັ້ນຄອນແຄນ ເຕັ້ນສຸດແຮງຢ່າງຂາດການຢັບຢັ້ງ.

2ຈົ່ງຟັງສຽງພຣະເຈົ້າ ພວກເຈົ້າທັງຫລາຍ ສຽງຟ້າຮ້ອງທີ່ດັງອອກມາຈາກປາກພຣະເຈົ້າ.

3ພຣະອົງສົ່ງຟ້າແມບເຫລື້ອມຜ່ານທ້ອງຟ້າໄປ ຈາກສົ້ນໜຶ່ງຂອງໂລກາ ໄປສູ່ສົ້ນໜຶ່ງອີກ.

4ແລ້ວກໍໄດ້ຍິນສຽງຮ້ອງກ້ອງສະໜັ່ນຂອງພຣະອົງ ຄືສຽງດັງກ້ອງດ້ວຍຣິດອຳນາດຂອງຟ້າຮ້ອງ ພໍສຽງຂອງພຣະເຈົ້າດັງກ້ອງກັງວານ ສິ່ງທັງໝົດກໍມີແສງເຫລື້ອມໃສແມບມາບ.

5ຄຳສັ່ງຂອງພຣະເຈົ້າໃຫ້ເກີດສິ່ງປະຫລາດໃຈ ຄືສິ່ງອັດສະຈັນທີ່ພວກເຮົາເຂົ້າໃຈບໍ່ໄດ້.

6ພຣະອົງສົ່ງຫິມະໃຫ້ຕົກລົງມາສູ່ໂລກາ ສົ່ງກະແສນໍ້າມາເປັນຝົນໃຫ້ໂຮຍຮຳຊຸ່ມປຽກ.

7ພຣະອົງໃຫ້ວຽກງານຂອງພວກເຮົາຢຸດສະງັກລົງ; ພຣະອົງສຳແດງໃຫ້ພວກເຮົາເຫັນສິ່ງທີ່ພຣະອົງເຮັດໄດ້.

8ແມ່ນແຕ່ສັດປ່າ ຕ່າງກໍຫາບ່ອນຫລົບລີ້ກັນໝົດ ແລະພາກັນເຂົ້າໄປນອນໃນບ່ອນທີ່ມັນເຄີຍຊົ້ນ.

9ແຕ່ທາງທິດໃຕ້ພຸ້ນລົມພະຍຸພວມພັດມາ ອາກາດໜາວເຢັນກໍມາແຕ່ທາງທິດເໜືອພຸ້ນ.

10ລົມຫາຍໃຈພຣະເຈົ້າເຮັດໃຫ້ນໍ້າກ້າມທັງໝົດ ປ່ຽນໃຫ້ນໍ້າທັງຫລາຍກາຍເປັນນໍ້າແຂງໄດ້.

11ພຣະອົງບັນທຸກນໍ້າໝອກມາພ້ອມຄວາມຊຸ່ມເຢັນ ໃຫ້ແສງຟ້າແມບກະຈາຍໃສ່ກຸ່ມເມກໝອກ

12ມັນເຄື່ອນໄປມາໄດ້ຕາມພຣະປະສົງ ແລະເຮັດສິ່ງທັງໝົດຕາມທີ່ສັ່ງ ສິ່ງເຫຼົ່ານີ້ເກີດຂຶ້ນທົ່ວໂລກປັດຖະພີ ໃນທຸກທີ່ທຸກແຫ່ງຕາມພຣະປະສົງນັ້ນ.

13ພຣະເຈົ້າສົ່ງຝົນລົງໃຫ້ຫົດພື້ນແຜ່ນດິນ ອາດສົ່ງມາລົງໂທດຄົນຫລືໃຫ້ຄວາມຮັກກໍໄດ້.

14ໂຢບເອີຍ ຢຸດຄິດບຸດໜຶ່ງ ຈົ່ງຟັງຂ້ອຍຕໍ່ໄປເທາະ ຈົ່ງພິຈາລະນາສິ່ງອັດສະຈັນ ທີ່ພຣະເຈົ້າກະທຳນັ້ນ.

15ເຈົ້າຮູ້ຈັກວ່າພຣະເຈົ້າໃຫ້ຄຳສັ່ງຢ່າງໃດບໍ? ຈາກເມກພຣະອົງເຮັດໃຫ້ຟ້າແມບເຫລື້ອມຮູ້ບໍ?

16ເຈົ້າຮູ້ວ່າກ້ອນເມກລອຍຢູ່ເທິງເວຫາບໍ? ການອັນອັດສະຈັນຄືສີມືຂອງພຣະເຈົ້າແມ່ນບໍ່?

17ເຈົ້າຮູ້ສຶກເຈັບປວດກໍເພາະຖືກຮ້ອນເຜົາຜານ ເມື່ອລົມທາງທິດໃຕ້ພັດມາກະຮໍ່າທົ່ວປະເທດ.

18ເຈົ້າຊ່ວຍພຣະເຈົ້າພືທ້ອງຟ້າອອກໄດ້ບໍ? ເຮັດໃຫ້ແຂງຈັດດັ່ງໂລຫະຖືກຂັດໃຫ້ເຫລື້ອມ?

19ສອນພວກເຮົາສິ່ງທີ່ຈະເວົ້າກັບພຣະເຈົ້າແດ່ແມ ແຕ່ຄວາມຄິດພວກເຮົາກໍເປົ່າບໍ່ມີຫຍັງຈະເວົ້າອີກ.

20ຂ້ອຍບໍ່ຢາກຖາມວ່າ ຈະເວົ້າກັບພຣະເຈົ້າຢ່າງໃດ ເປັນຫຍັງຂ້ອຍໃຫ້ໂອກາດພຣະອົງທຳລາຍຂ້ອຍຖິ້ມ?

21ບັດນີ້ ແສງແຈ້ງໃນທ້ອງຟ້າກໍກຳລັງສຸກໃສ ເຫລື້ອມໃສເກີນໄປກວ່າທີ່ພວກເຮົາແນມເບິ່ງໄດ້; ທ້ອງຟ້ານັ້ນກໍຖືກກວາດໃຫ້ອອກໜີໄປ ຖືກກວາດຈົນກ້ຽງໃສຈາກລົມທີ່ມາພັດຜ່ານ.

22ແສງທອງສ່ອງຈາກທາງທິດເໜືອໃຫ້ເຫັນ ພຣະສະຫງ່າຣາສີກໍເຕັມພາຍໃນພວກເຮົາຈົນຢ້ານ.

23ອຳນາດຂອງພຣະເຈົ້ານັ້ນແສນຍິ່ງໃຫຍ່ຫລາຍ ຊຶ່ງພວກເຮົາເຂົ້າມາໃກ້ຊິດພຣະອົງບໍ່ໄດ້; ພຣະອົງຊົງຍຸດຕິທຳແທ້ແລະທ່ຽງທຳຍິ່ງໃຫຍ່ ພຣະອົງໄດ້ເຮັດກັບມະນຸດໂດຍສິ່ງເຫຼົ່ານີ້ແຫລະ.

24ດັ່ງນັ້ນ ມະນຸດຕ້ອງໃຫ້ຄວາມຢຳເກງພຣະອົງ ພຣະອົງລະເລີຍຕໍ່ຜູ້ທີ່ຖືຕົນເປັນຄົນສະຫລາດ.”

← Chapter 36 Jump to: Chapter 38 →