Job 18

Lao Bible 2012 (ພຣະຄຳພີສັກສິ)

← Chapter 17 Jump to: Chapter 19 →

1“ໂຢບເອີຍ ຄົນຄືເຈົ້າມິດເລີຍສາໄດ້ຫລືບໍ່? ພວກເຮົາຈະເວົ້າຕໍ່ໄປກັບເຈົ້າຖ້າເຈົ້າມິດແລະຟັງ.

3ພວກເຈົ້າຈະປ່ອຍໃຫ້ໂຢບຄິດວ່າພວກເຮົາຄືສັດຊັ້ນບໍ? ຫລືພວກເຈົ້າຄິດວ່າພວກເຮົາເປັນຄົນໂງ່ຈ້າ.

4ໂຢບເອີຍ ທີ່ເຈົ້າໂກດຮ້າຍມັນທຳລາຍເຈົ້າເອງ ແຜ່ນດິນໂລກຈະສັ່ນສະເທືອນ ຍ້ອນຄວາມໂກດຮ້າຍຂອງເຈົ້າບໍ? ຫລືກ້ອນຫີນຈະເຄື່ອນຍ້າຍຈາກທີ່ຂອງມັນໄດ້ບໍ?

5ແສງແຈ້ງຂອງຄົນຊົ່ວນັ້ນຈະຖືກມອດມິດໄປ ແປວໄຟຂອງພວກເຂົາກໍຈະບໍ່ສ່ອງແສງຂຶ້ນມາອີກ.

6ແສງແຈ້ງໃນຜ້າເຕັນຂອງພວກເຂົາຈະມອດໄປ ດັ່ງຕະກຽງດັບແລະຈົມຢູ່ໃນຄວາມມືດ.

7ບາດກ້າວຂອງພວກເຂົາໜັກແໜ້ນແຕ່ບັດນີ້ຕຳສະດຸດ; ພວກເຂົາລົ້ມລົງດ້ວຍອຸບາຍຂອງພວກເຂົາເອງ.

8ພວກເຂົາຍ່າງໄປຖືກຕາໜ່າງເພາະຕີນຂອງພວກເຂົາເອງ ແລະພວກເຂົາກໍຍ່າງພະເນຈອນໄປສູ່ບ້ວງແຮ້ວ;

9ແຮ້ວທີ່ວາງໄວ້ນັ້ນຈະຈັບທີ່ຂະໜ່ອງຂອງພວກເຂົາ ແລະຕົວພວກເຂົາເອງກໍຈະຖືກຫິ້ວຂຶ້ນ.

10ທີ່ເທິງໜ້າດິນນັ້ນມີແຮ້ວທີ່ຖືກຫ້າງໄວ້ຢ່າງດີ ຖືກວາງໄວ້ຕາມທາງທີ່ລາວຍ່າງໄປມານັ້ນ.

11ອ້ອມຮອບຕົວລາວນັ້ນ ຄວາມຢ້ານໃຫຍ່ລໍຄອຍ ມັນຕິດຕາມລາວໄປໃນທຸກໆບາດກ້າວ.

12ລາວເຄີຍຮັ່ງມີຂຶ້ນ ແຕ່ບັດນີ້ຊໍ້າພັດອຶດຫິວ; ຄວາມຈິບຫາຍຢືນລໍຄອຍຢູ່ຂ້າງໆລາວນັ້ນ.

13ພະຍາດເຖິງຕາຍກໍລາມໄປທົ່ວຮ່າງກາຍ ເຮັດໃຫ້ແຂນຂາລາວເປື່ອຍເໝັນຄາວຍ້ອນ.

14ລາວຖືກຖອນອອກຈາກເຕັນທີ່ຢູ່ຢ່າງປອດໄພ ຖືກນຳມາຢູ່ຊ້ອງໜ້າເຈົ້າແຫ່ງຄວາມຕາຍແລ້ວ.

15ບັດນີ້ ຜູ້ໃດສາມາດຢູ່ໃນຜ້າເຕັນຂອງຕົນ ຫລັງຈາກທີ່ຄົນໂຮຍມາດລົງຂ້າເຊື້ອພະຍາດທີ່ນັ້ນ.

16ສະນັ້ນ ລາວຈຶ່ງເປັນດັ່ງຕົ້ນໄມ້ທີ່ກຳລັງຈະຕາຍ ຮາກເຫງົ້າກິ່ງກ້ານທັງຫລາຍກໍຫ່ຽວແຫ້ງໄປສິ້ນ.

17ໃນບ້ານເມືອງແລະຕ່າງຖິ່ນຊື່ສຽງລາວກໍໝົດໄປ ບໍ່ມີຜູ້ໃດທີ່ຈະຈົດຈຳລາວໄວ້ຕໍ່ໄປອີກແລ້ວ.

18ລາວຈະຖືກຂັບໄລ່ອອກຈາກດິນແດນຄົນເປັນ ຄືຖືກຂັບໄລ່ຈາກແສງແຈ້ງເຂົ້າສູ່ຄວາມມືດ.

19ລາວຈະບໍ່ມີລູກເພື່ອສືບເຊື້ອສາຍໃຫ້ລາວເລີຍ ຈະບໍ່ມີຜູ້ໃດລອດຊີວິດຢູ່ໃນບ້ານເຮືອນຂອງລາວດ້ວຍ.

20ແຕ່ຕາເວັນອອກເຖິງຕາເວັນຕົກຕ່າງກໍໄດ້ຍິນ ເຖິງຊາຕາກຳລາວ ຈຶ່ງຂົນລຸກແລະສັ່ນເຊັນດ້ວຍ.

21ຊາຕາກຳຂອງຄົນຊົ່ວນັ້ນກໍເປັນດັ່ງນີ້ແຫລະ ຄືຜູ້ທີ່ບໍ່ໄດ້ບົວລະບັດພຣະເຈົ້າຂອງຕົນຢ່າງຖືກຕ້ອງ.”

← Chapter 17 Jump to: Chapter 19 →