Job 11

Lao Bible 2012 (ພຣະຄຳພີສັກສິ)

← Chapter 10 Jump to: Chapter 12 →

1“ຈະບໍ່ມີຜູ້ໃດຕອບຄຳເວົ້າອັນໄຮ້ປະໂຫຍດນີ້ບໍ? ຄົນທີ່ເວົ້າຫລາຍຈະນັບວ່າຖືກຕ້ອງບໍ່ຫ່ອນໄດ້?

3ໂຢບເອີຍ ເຈົ້າຄິດວ່າ ພວກເຮົາຕອບເຈົ້າບໍ່ໄດ້ຊັ້ນບໍ? ຄຳທີ່ເຈົ້າເວົ້າຫຍໍ້ຫຍັນ ເຮັດໃຫ້ພວກເຮົາເວົ້າຫຍັງບໍ່ໄດ້ບໍ?

4ເຈົ້າອ້າງວ່າ, ‘ສິ່ງທີ່ຂ້ອຍເວົ້າລ້ວນແຕ່ເປັນຄວາມຈິງ’; ເຈົ້າອ້າງວ່າ, ‘ຂ້ອຍບໍຣິສຸດຕໍ່ສາຍຕາຂອງພຣະເຈົ້າ.’

5ຂ້ອຍຢາກໃຫ້ພຣະເຈົ້າຕອບເຈົ້າຫລາຍສໍ່າໃດ ພຣະອົງຈະໄດ້ບອກເຖິງປັນຍາຫລາຍຢ່າງກໍໄດ້; ມີຫລາຍສິ່ງເລິກໂພດສຳລັບມະນຸດທີ່ຈະເຂົ້າໃຈ ພຣະເຈົ້າລົງໂທດໜ້ອຍກວ່າທີ່ເຈົ້າຄວນຈະໄດ້ຮັບ.

7ເຈົ້າຢັ່ງຮູ້ເຖິງຂອບເຂດແລະຄວາມຈຳກັດ ຄວາມຍິ່ງໃຫຍ່ແລະຣິດອຳນາດຂອງພຣະເຈົ້າໄດ້ຫລືບໍ່?

8ທ້ອງຟ້າມີຂອບເຂດເມື່ອໃດສຳລັບພຣະເຈົ້ານໍ? ມັນກວ້າງໄກເກີນກວ່າເຈົ້າຈະຢື້ເຖິງໄດ້. ພຣະເຈົ້າຮູ້ທຸກສິ່ງໃນໂລກແຫ່ງຄວາມຕາຍ ແຕ່ສຳລັບເຈົ້າບໍ່ອາດຮູ້ເຖິງມັນໄດ້.

9ຄວາມຍິ່ງໃຫຍ່ຂອງພຣະເຈົ້າໃຫຍ່ກວ່າໂລກາ ກວ້າງຂວາງກວ່າທ້ອງມະຫາສະໝຸດເລິກ.

10ຖ້າພຣະເຈົ້າຈັບເຈົ້າ ແລະນຳເຈົ້າຂຶ້ນສານ ຜູ້ໃດຈະກ້າຂັດຂວາງພຣະອົງໄດ້?

11ພຣະເຈົ້າຮູ້ວ່າມະນຸດບໍ່ມີຄຸນຄ່າ; ພຣະອົງເຫັນທຸກການກະທຳຊົ່ວຂອງພວກເຂົາເຈົ້າ.

12ຄົນໂງ່ເລີ່ມຈະມີປັນຍາໄດ້ກໍຕໍ່ເມື່ອໂຕລໍປ່າ ຖືກຄົນນຳມັນມາຝຶກຫັດໃຫ້ຮູ້ຄວາມໄດ້.

13ໂຢບເອີຍ ຈົ່ງມີຈິດໃຈຖືກຕ້ອງ ແລະໃຫ້ເຈົ້າສະແຫວງຫາພຣະເຈົ້າສາ

14ຈົ່ງກຳຈັດຄວາມຊົ່ວຊ້າທັງໝົດ ແລະຄວາມຜິດອອກຈາກເຮືອນຂອງເຈົ້າ.

15ແລ້ວຈົ່ງປະເຊີນໜ້າກັບໂລກອີກຄັ້ງ ຢ່າງໜັກແໜ້ນໝັ້ນຄົງ ແລະກ້າຫານ.

16ແລ້ວຄວາມທຸກລຳບາກກໍຈະຫາຍໄປໝົດ ດັ່ງນໍ້າຖ້ວມທີ່ບົກລົງ ແລະບໍ່ມີຜູ້ໃດຈົດຈຳອີກ.

17ຊີວິດເຈົ້າຈະສົດຊື່ນກວ່າແສງຕາເວັນ ແລະຊີວິດອັນມືດດຳກໍຈະເປັນດັ່ງຮຸ່ງອາລຸນຍາມເຊົ້າ.

18ພຣະເຈົ້າຈະປົກປັກຮັກສາ ແລະໃຫ້ເຈົ້າໄດ້ພັກຜ່ອນ ເຈົ້າຈະຢູ່ຢ່າງປອດໄພໄດ້ ແລະເຕັມໄປດ້ວຍຄວາມຫວັງ.

19ເຈົ້າກໍບໍ່ຕ້ອງຢ້ານເຫຼົ່າສັດຕູອີກຕໍ່ໄປ; ແລະຈະມີຫລາຍຄົນໃຫ້ຄວາມຊ່ວຍເຫລືອເຈົ້າ.

20ສ່ວນຄົນຊົ່ວຊ້ານັ້ນ ຈະແນມຫາຜູ້ຊ່ວຍຊູ ຜູ້ທີ່ພວກເຂົາຫວັງອາໄສ ກໍຈະເຮັດໃຫ້ຜິດຫວັງເທົ່ານັ້ນ ແລະທາງທີ່ຈະຫລີກໜີຈາກໂພຍໄພກໍຈະບໍ່ມີ; ຄວາມຫວັງຢ່າງດຽວຂອງພວກເຂົາກໍຄືຕາຍເທົ່ານັ້ນ.”

← Chapter 10 Jump to: Chapter 12 →