Job 35

Lao Bible 2012 (ພຣະຄຳພີສັກສິ)

← Chapter 34 Jump to: Chapter 36 →

1“ໂຢບເອີຍ ບໍ່ເປັນການຖືກຕ້ອງທີ່ເຈົ້າກ່າວຈາ ວ່າເຈົ້າບໍ່ມີຄວາມຜິດຕໍ່ສາຍຕາຂອງພຣະເຈົ້າ

3ເຈົ້າຖາມວ່າ, ‘ທີ່ຂ້ອຍເຮັດບາບສະເທືອນພຣະອົງບໍ? ຂ້ອຍໄດ້ຜົນປະໂຫຍດຫຍັງ ຖ້າຂ້ອຍສາລະພາບບາບ?’

4ຂ້ອຍກຳລັງຈະຫາຂໍ້ແກ້ໂດຍເປັນຄຳປາໄສ ໂຕ້ຕອບເຈົ້າກັບເພື່ອນຝູງພ້ອມດຽວກັນໂລດ.

5ຈົ່ງແຫງນຫາຟ້າສະຫວັນ ແລະເບິ່ງເມກທັງຫຼາຍດູ ວ່າມັນຢູ່ສູງກວ່າສໍ່າໃດກັນແທ້

6ຖ້າເຈົ້າເຮັດບາບ ກໍບໍ່ທຳຮ້າຍພຣະເຈົ້າຫຍັງໝົດ ຖ້າເຮັດຜິດຫລາຍເທື່ອ ມັນສະເທືອນຫຍັງແກ່ພຣະເຈົ້າ?

7ທີ່ເປັນຜູ້ຊອບທຳນັ້ນ ເຈົ້າຊ່ວຍຫຍັງພຣະເຈົ້າໄດ້ແດ່? ບໍ່ມີຫຍັງທີ່ພຣະອົງຕ້ອງການຈາກເຈົ້າ.

8ແມ່ນຄົນອື່ນທີ່ທົນທຸກຈາກການບາບທີ່ເຈົ້າໄດ້ກະທຳ ຄຸນງາມຄວາມດີທີ່ເຈົ້າກະທຳມາ ກໍຄືຊ່ວຍພວກເຂົາເທົ່ານັ້ນ.

9ເມື່ອມະນຸດຖືກກົດຂີ່ ພວກເຂົາກໍໄດ້ແຕ່ຄວນຄາງ ພວກເຂົາຮ້ອງຫາຄົນ ຜູ້ທີ່ຊ່ວຍເຫລືອພວກເຂົາໄດ້.

10ແຕ່ພວກເຂົາບໍ່ກັບມາຫາພຣະເຈົ້າ ພຣະຜູ້ສ້າງພວກເຂົາ ຜູ້ທີ່ໃຫ້ຄວາມຫວັງແກ່ພວກເຂົາ ໃນຍາມມືດມົນນັ້ນ.

11ພວກເຂົາບໍ່ກັບມາຫາພຣະເຈົ້າ ຜູ້ທີ່ໃຫ້ພວກເຂົາມີປັນຍາ ຄືສະຫລາດກວ່າຝູງສັດ ແລະຝູງນົກດ້ວຍ.

12ພວກເຂົາຮ້ອງຫາພຣະເຈົ້າໃຫ້ຊ່ວຍ ແຕ່ພຣະອົງບໍ່ຕອບພວກເຂົາ ເພາະພວກເຂົາເປັນຄົນຈອງຫອງ ແລະເປັນຄົນຊົ່ວຊ້າ.

13ເປັນການບໍ່ມີປະໂຫຍດທີ່ພວກເຂົາຈະຮ້ອງອອກມາ ພຣະເຈົ້າອົງຍິ່ງໃຫຍ່ບໍ່ຫລຽວແລ ແລະບໍ່ໄດ້ຍິນພວກເຂົາຊໍ້າ.

14ໂຢບເອີຍ ເຈົ້າວ່າເຈົ້າເບິ່ງພຣະເຈົ້າບໍ່ໄດ້ເລີຍ ແຕ່ຈົ່ງອົດທົນລໍຄອຍສູ້ຄະດີຊ້ອງໜ້າພຣະເຈົ້າ.

15ເຈົ້າຄິດວ່າພຣະເຈົ້າບໍ່ລົງໂທດທັນ ຫລືພຣະອົງບໍ່ສົນໃຈຕໍ່ບາບອັນເລັກນ້ອຍ.

16ບໍ່ມີປະໂຫຍດສຳລັບເຈົ້າທີ່ຈະເວົ້າຕໍ່ໄປ ເປັນການຈະແຈ້ງແລ້ວວ່າ ເຈົ້າບໍ່ເຂົ້າໃຈໃນສິ່ງທີ່ເຈົ້າເວົ້າ.”

← Chapter 34 Jump to: Chapter 36 →