Job 26

Lao Bible 2012 (ພຣະຄຳພີສັກສິ)

← Chapter 25 Jump to: Chapter 27 →

1“ພວກເຈົ້າຊ່າງຊ່ວຍເຫລືອຂ້ອຍດີແທ້ໆນໍ ຄືມີຕໍ່ຄົນຍາກຈົນຜູ້ທີ່ອ່ອນແຮງດັ່ງຂ້ອຍນີ້

3ຄຳແນະນຳທີ່ເຈົ້າໃຫ້ນັ້ນຊ່າງດີເຫຼືອຫລາຍ ແບ່ງປັນຄວາມຮູ້ທີ່ເຈົ້າມີໃຫ້ຄົນໂງ່ຈ້າດັ່ງຂ້ອຍນີ້

4ພວກເຈົ້າຄິດວ່າຜູ້ໃດຈະໄດ້ຍິນທຸກຄຳເວົ້າພວກເຈົ້າເດ? ຜູ້ໃດໄດ້ບັນດົນໃຈໃຫ້ພວກເຈົ້າເວົ້າເຊັ່ນນີ້?”

5“ວິນຍານຂອງຄົນຕາຍນັ້ນກໍສັ່ນເຊັນ ໃນນໍ້າທັງຫລາຍໃຕ້ພື້ນແຜ່ນດິນໂລກ.

6ແດນມໍຣະນາກໍເປີດແບອອກຢູ່ຕໍ່ໜ້າພຣະອົງ ບໍ່ມີຜ້າປົກຄຸມບັງຈາກສາຍຕາຂອງພຣະເຈົ້າ.

7ພຣະເຈົ້າໄດ້ພືທ້ອງຟ້າອອກສູ່ທາງທິດເໜືອ ແລະແຂວນແຜ່ນດິນໂລກໄວ້ໃນທີ່ວ່າງເປົ່າ.

8ແມ່ນພຣະເຈົ້າທີ່ເຮັດໃຫ້ເມກເຕັມດ້ວຍນໍ້າຝົນ ແລະຮັກສາບໍ່ໃຫ້ຟົ້ງໄປໂດຍມີນໍ້າໜັກເກີນໂພດ.

9ພຣະອົງປົກບັງແສງສ່ອງຂອງເດືອນເຕັມດວງ ໂດຍດຶງເມກທັງຫລາຍມາເປັນຜ້າກັ້ງບັງໄວ້.

10ພຣະອົງໄດ້ແຍກແສງແຈ້ງ ອອກຈາກມືດທັງໝົດ ໂດຍໃຊ້ວົງວຽນໜຶ່ງ ເຄື່ອນໄຫວຢູ່ເທິງທະເລກວ້າງ.

11ເມື່ອພຣະອົງນາບຂູ່ເສົາຄໍ້າຟ້າທັງຫລາຍ ເສົານັ້ນກໍຄອນແຄນສັ່ນເຊັນດ້ວຍຄວາມຢ້ານ.

12ກຳລັງຂອງພຣະເຈົ້າເອົາຊະນະແມ່ນແຕ່ທະເລ ໂດຍຄວາມຊຳນານທຳລາຍຣາຮາບຜີບໍລິສາດ.

13ລົມຫາຍໃຈຂອງພຣະອົງເຮັດໃຫ້ຟ້າສະຫວັນແຈ່ມໃສ ແລະມືພຣະອົງທີ່ໃຊ້ຂ້າໄລ່ຜີບໍລິສາດໜີໄປໄດ້.

14ແຕ່ສິ່ງທີ່ກ່າວມານີ້ ເປັນພຽງແຕ່ກ່າວເຖິງອຳນາດພຽງເລັກນ້ອຍຂອງພຣະອົງ ເປັນພຽງແຕ່ສຽງຊິ່ມຄ່ອຍໆ ທີ່ພວກເຮົາໄດ້ຍິນເທົ່ານັ້ນ. ຖ້າດັ່ງນັ້ນ ຜູ້ໃດແດ່ທີ່ມີຄວາມເຂົ້າໃຈ ເຖິງຄວາມຍິ່ງໃຫຍ່ອັນແທ້ຈິງຂອງພຣະເຈົ້າໄດ້ແດ່?”

← Chapter 25 Jump to: Chapter 27 →