Job 38 — Lao Bible 2012 (ພຣະຄຳພີສັກສິ)

1ແລ້ວພຣະເຈົ້າຢາເວກໍໄດ້ຕອບໂຢບອອກມາຈາກລົມພະຍຸ.

2“ເຈົ້າຄືຜູ້ໃດ ທີ່ກ້າຖາມເຖິງສະຕິປັນຍາຂອງເຮົາ ດ້ວຍຄວາມໂງ່ ແລະຄຳເວົ້າເຫລວໄຫລຂອງເຈົ້າ?

3ບັດນີ້ ຈົ່ງລຸກຢືນຂຶ້ນດັ່ງລູກຜູ້ຊາຍຜູ້ໜຶ່ງ ແລະຕອບຄຳທີ່ເຮົາຈະຖາມເຈົ້າເບິ່ງດູ

4ເມື່ອເຮົາສ້າງຈັກກະວານນັ້ນ ເຈົ້າຢູ່ບ່ອນນັ້ນບໍ? ຖ້າເຈົ້າຮູ້ຫລວງຫລາຍ ຈົ່ງບອກເຮົາມາເບິ່ງ.

5ຜູ້ໃດຊີ້ຂາດວ່າໂລກກວ້າງເທົ່າໃດ? ເຈົ້າຮູ້ບໍ? ຜູ້ໃດເໜັ່ງສາຍແທກເທິງນັ້ນ? ຕອບມາເບິ່ງ?

6ຜູ້ໃດຖືເສົາ ທັງຫລາຍໄວ້ທີ່ໃຊ້ຄໍ້າຈັກກະວານ? ຜູ້ໃດວາງຮາກຖານເສົາຫີນຂອງຈັກກະວານໄວ້?

7ໃນຮຸ່ງເຊົ້າຂອງວັນນັ້ນ ໝູ່ດວງດາວຮ້ອງເພງນຳກັນ ພວກເທວະດາຂອງພຣະອົງ ກໍເປັ່ງສຽງໂຮຮ້ອງຍິນດີທັງນັ້ນ.

8ຜູ້ໃດອັດປະຕູໄວ້ເພື່ອຕັນຟອງນໍ້າທະເລ ເມື່ອລະເບີດອອກມາຈາກທ້ອງປັດຖະພີນັ້ນ?

9ແມ່ນເຮົານີ້ ທີ່ໃຊ້ກ້ອນເມກຫຸ້ມຫໍ່ນໍ້າທະເລ ແລະຫຸ້ມນໍ້າທະເລຫລວງໄວ້ຢູ່ໃນຄວາມມືດ.

10ເຮົາໄດ້ກຳນົດເຂດໄວ້ສຳລັບນໍ້າທະເລ ແລະຮັກສາມັນທັງອັດປະຕູລົງໄລຕັນໄວ້.

11ເຮົາບອກວ່າ, ‘ຢຸດຢູ່ນີ້ ແລະຢ່າໄປໄກອີກເລີຍ ຟອງຂອງເຈົ້າທີ່ຄຶກຄະນອງໃຫ້ຢຸດຢູ່ພຽງນີ້.’

12ໂຢບເອີຍ ຊົ່ວຊີວິດນັ້ນເຈົ້າເຄີຍບໍທີ່ໃຫ້ຄຳສັ່ງ ໃຫ້ມື້ເວັນກາຍເປັນມື້ເຊົ້າຮຸ່ງອາລຸນ?

13ເຈົ້າເຄີຍສັ່ງວັນຮຸ່ງເຊົ້າໃຫ້ຄອງແຜ່ນດິນໂລກບໍ? ແລະສັ່ນຄົນຊົ່ວໃຫ້ອອກມາຈາກບ່ອນທີ່ພວກເຂົາລີ້?

14ແສງແດດເຮັດໃຫ້ພູແລະຮ່ອມພູປາກົດຂຶ້ນມາ ດັ່ງຮອຍພັບເສື້ອຜ້າຖືກປະທັບຕາໃສ່ດິນໜຽວນັ້ນ.

15ແສງແຈ້ງມື້ເວັນນັ້ນ ແຈ້ງໂພດສຳລັບຄົນບໍ່ດີ ແລະຈຳກັດພວກເຂົາບໍ່ໃຫ້ເຮັດສິ່ງທີ່ໂຫດຮ້າຍ.

16ເຈົ້າເຄີຍໄປທີ່ນໍ້າພຸໃນພື້ນທະເລເລິກບໍ? ເຈົ້າເຄີຍຍ່າງເທິງໜ້ານໍ້າໃນມະຫາສະໝຸດຫລືບໍ່?

17ມີຜູ້ໃດແດ່ເຄີຍຊີ້ໃຫ້ເຈົ້າເຫັນປະຕູທັງຫລາຍ? ທີ່ເຝົ້າຄວາມມືດຕຶບຂອງແດນມໍຣະນານັ້ນ?

18ເຈົ້າຄິດໄດ້ບໍວ່າໂລກນີ້ກວ້າງໃຫຍສໍ່າໃດ? ຖ້າເຈົ້າຮູ້ຈັກ ຈົ່ງຕອບເຮົາມາເບິ່ງ.

19ເຈົ້າຮູ້ວ່າແສງສະຫວ່າງນັ້ນ ມາແຕ່ໃສບໍ? ຫລືແຫລ່ງແຫ່ງຄວາມມືດຕຶບ ຢູ່ໃສກັນແທ້?

20ເຈົ້າບອກບໍ່ໄດ້ວ່າມັນຈະໄປໄກຮອດໃສ? ຫລືສັ່ງມັນໃຫ້ກັບຄືນມາໄດ້ອີກບໍ່?

21ເຮົາແນ່ໃຈວ່າໄດ້ ເພາະເຈົ້າເຖົ້າແກ່ອາວຸໂສ ແລະໄດ້ຢູ່ທີ່ນັ້ນເອງ ເມື່ອໂລກນີ້ຖືກສ້າງຂຶ້ນ.

22ເຈົ້າເຄີຍໄດ້ໄປຢ້ຽມບ່ອນມ້ຽນຂອງຕ່າງໆບໍ? ຄືບ່ອນທີ່ເຮົາເກັບຮັກສາຫິມະ ແລະໝາກເຫັບນັ້ນ?

23ເຮົາຕຽມມັນໄວ້ສຳລັບເວລາເດືອດຮ້ອນມາເຖິງ ສຳລັບມື້ສູ້ຮົບ ແລະມື້ເຮັດເສິກສົງຄາມນັ້ນ.

24ເຈົ້າເຄີຍໄດ້ໄປບ່ອນທີ່ຕາເວັນຂຶ້ນມາບໍ? ຫລືໄປບ່ອນທີ່ລົມທິດຕາເວັນອອກພັດມານັ້ນ?

25ຜູ້ໃດເປັນຜູ້ຂຸດປ່ອງໃຫ້ນໍ້າຝົນຕົກລົງມາ ແລະແປງທາງທຽວສຳລັບໃຫ້ຟ້າຜ່າ?

26ຜູ້ໃດເປັນຜູ້ເຮັດໃຫ້ຝົນຕົກໃນທີ່ບໍ່ມີຄົນຢູ່ອາໄສ? ໃນຖິ່ນແຫ້ງແລ້ງກັນດານບ່ອນບໍ່ມີຜູ້ໃດຢູ່?

27ຜູ້ໃດໃຫ້ນໍ້າລໍ່ລ້ຽງບ່ອນທີ່ແຫ້ງແລ້ງແລະຫິວໂຫຍ ເພື່ອວ່າຕົ້ນຫຍ້າທັງຫລາຍຈະງອກຂຶ້ນມາໄດ້?

28ອັນວ່ານໍ້າຝົນນັ້ນ ມັນມີບິດາບໍ? ແລະພໍ່ຂອງນໍ້າຄ້າງເດ ແມ່ນຜູ້ໃດກັນແທ້?

29ນໍ້າແຂງນັ້ນ ເກີດມາຈາກແມ່ຄົນໃດ? ແມ່ຂອງນໍ້າກ້ອນເດ ແມ່ນຜູ້ໃດກັນແທ້?

30ເມື່ອນໍ້າທັງຫລາຍແຂງກ້າມກາຍເປັນສີລາ ເມື່ອພື້ນມະຫາສະໝຸດກາຍເປັນນໍ້າກ້າມ?

31ເຈົ້າມັດດາວໄກ່ນ້ອຍໃຫ້ມັນເຂົ້າກັນໄດ້ບໍ? ຫລືແກ້ເຄື່ອງມັດດາວໄຖໃຫ້ຫລຸດໄດ້ຫລືບໍ່?

32ເຈົ້ານຳດວງດາວອອກມາຕາມລະດູການບໍ? ແລະນຳທາງດາວແຂ້ກັບລູກໄດ້ຫລືບໍ່?

33ເຈົ້າຮູ້ກົດໝາຍທີ່ປົກຄອງຟ້າສະຫວັນບໍ? ແລະເຈົ້ານຳມາປະຕິບັດໃນໂລກນີ້ໄດ້ຫລືບໍ່?

34ເຈົ້າຮ້ອງສັ່ງກ້ອນເມກຕ່າງໆໄດ້ບໍ? ແລະເຮັດໃຫ້ລະລາຍເປັນເມັດຝົນໄດ້ຫລືບໍ່?

35ຖ້າເຈົ້າສັ່ງຟ້າແມບເຫລື້ອມໃຫ້ມັນອອກໄປ ຍິນດີຮັບໃຊ້ ມັນຕອບບໍ? ເມື່ອມາຫາເຈົ້າ

36ຜູ້ໃດບອກອີບິດ ເມື່ອແມ່ນໍ້ານິນໄຫລຖ້ວມຝັ່ງໄປ ຫລືຜູ້ໃດບອກໄກ່ຜູ້ວ່າຝົນຈະຕົກມາສູ່ໂລກ?

37ຜູ້ໃດແດ່ມີປັນຍາ ພໍທີ່ຈະນັບກ້ອນເມກໄດ້ນໍ? ແລະງ່ຽງໄຫນໍ້າແຫ່ງຟ້າສະຫວັນໄດ້?

38ເມື່ອຂີ້ດິນແຂງແກ່ນເໝືອນດັ່ງເຫລັກໄຫລ ເມື່ອດິນໃນທົ່ງນາກອງເປັນໂພນຈູມປວກ?

39ເຈົ້າຫາອາຫານໃຫ້ຝູງໂຕສິງກິນໄດ້ບໍ? ແລະໃຫ້ສິງໜຸ່ມກິນອີ່ມຈົນເຊົາຫິວໄດ້ຫລືບໍ່?

40ເມື່ອຝູງສິງລີ້ຊ່ອນຢູ່ໃນຖໍ້າຂອງພວກມັນ ຫລືນອນລໍຄອຍຢູ່ໃນບ່ອນຂອງມັນນັ້ນ.

41ຜູ້ໃດລ້ຽງນົກກະເວົາ ເມື່ອມັນຫິວບິນໄປມາ ເມື່ອລູກນ້ອຍຮ້ອງຂໍອາຫານນຳພຣະເຈົ້ານັ້ນ?