Genesis 11

Chinese TTVR (現代台語譯本羅馬字版)

← Chapter 10 Jump to: Chapter 12 →

1Hit-sî, thiⁿ-ē ê khiuⁿ-kháu kap gú-giân lóng kâng-khoán.

2In ǹg tang-pêng chhian-sóa ê sî, tī Sī-ná -tōe hoat-kiàn chi̍t phiàn pêng-goân, chiū tī hia khiā-khí.

3In hō͘-siōng chham-siông kóng, “Lâi! Lán tio̍h lâi chòe chng-á, sio hō͘ thàu.” In chiū ēng chng-á tāi-thòe chio̍h-thâu, ēng táⁿ-má-ka tāi-thòe he-thô͘.

4In koh kóng, “Lâi! Lán tio̍h lâi khí-siâⁿ chō-thah, thah-téng thàng thiⁿ, hō͘ lán chhut-miâ, chiah bián lán sì-sòaⁿ tī choân-tōe.”

5Siōng Chú lo̍h--lâi, beh khòaⁿ sè-kan-lâng khí-chō ê siâⁿ kap thah.

6Siōng Chú kóng, “Khòaⁿ leh, in sī kâng chi̍t ê bîn-cho̍k, kóng siâng chi̍t ê gú-giân. Taⁿ, in í-keng khai-sí chòe chit-ê sū, í-āu in beh chòe--ê, lóng bōe-tàng kā in chó͘-tòng.

7Lâi! Lán lo̍h--lâi-khì, phah-loān in ê gú-giân, hō͘ in ê ōe bōe siong-thong.”

8Siōng Chú chiū hō͘ in tùi hia hun-sòaⁿ tī choân-tōe; in chiū thêng-kang, bô khí hit-chō siâⁿ.

9Só͘-í hit-ê siâⁿ kiò-chòe Pa-pia̍t, in-ūi Siōng Chú tī hia phah-loān thiⁿ-ē ê gú-giân, koh tùi hia hō͘ lâng hun-sòaⁿ tī choân-tōe.

10Ē-bīn sī Siám ê hō͘-tāi: Tōa-chúi í-āu nn̄g nî, Siám chi̍t-pah hè siⁿ A-hoat-sat.

11Siám siⁿ A-hoat-sat liáu-āu, iáu oa̍h gō͘-pah nî, koh ū siⁿ hāu-siⁿ cha-bó͘-kiáⁿ.

12A-hoat-sat saⁿ-cha̍p gō͘ hè siⁿ Sa-la.

13A-hoat-sat siⁿ Sa-la liáu-āu, iáu oa̍h sì-pah khòng saⁿ nî, koh ū siⁿ hāu-siⁿ cha-bó͘-kiáⁿ.

14Sa-la saⁿ-cha̍p hè siⁿ Hi-pek.

15Sa-la siⁿ Hi-pek liáu-āu, iáu oa̍h sì-pah khòng saⁿ nî, koh ū siⁿ hāu-siⁿ cha-bó͘-kiáⁿ.

16Hi-pek saⁿ-cha̍p sì hè siⁿ Hoat-le̍k.

17Hi-pek siⁿ Hoat-le̍k liáu-āu, iáu oa̍h sì-pah saⁿ-cha̍p nî, koh ū siⁿ hāu-siⁿ cha-bó͘-kiáⁿ.

18Hoat-le̍k saⁿ-cha̍p hè siⁿ La-ngô͘.

19Hoat-le̍k siⁿ La-ngô͘ liáu-āu, iáu oa̍h nn̄g-pah khòng káu nî, koh ū siⁿ hāu-siⁿ cha-bó͘-kiáⁿ.

20La-ngô͘ saⁿ-cha̍p jī hè siⁿ Se-lo̍k.

21La-ngô͘ siⁿ Se-lo̍k liáu-āu, iáu oa̍h nn̄g-pah khòng chhit nî, koh ū siⁿ hāu-siⁿ cha-bó͘-kiáⁿ.

22Se-lo̍k saⁿ-cha̍p hè siⁿ Ná-ho̍k.

23Se-lo̍k siⁿ Ná-ho̍k liáu-āu, iáu oa̍h nn̄g-pah nî, koh ū siⁿ hāu-siⁿ cha-bó͘-kiáⁿ.

24Ná-ho̍k jī-cha̍p káu hè siⁿ Tha-la.

25Ná-ho̍k siⁿ Tha-la liáu-āu, iáu oa̍h chi̍t-pah cha̍p-káu nî, koh ū siⁿ hāu-siⁿ cha-bó͘-kiáⁿ.

26Tha-la chhit-cha̍p hè siⁿ A-pek-lân, Ná-ho̍k, Hap-lân.

27Ē-bīn sī Tha-la ê hō͘-tāi: Tha-la siⁿ A-pek-lân, Ná-ho̍k, Hap-lân; Hap-lân siⁿ Lô-tek.

28Hap-lân tī i ê lāu-pē Tha-la iáu oa̍h--teh ê sî, sí tī kò͘-hiong Pa-pí-lûn ê Ngô͘-ní -siâⁿ.

29A-pek-lân kap Ná-ho̍k lóng ū chhōa-bó͘. A-pek-lân ê bó͘ kiò-chòe Sa-lâi; Ná-ho̍k ê bó͘ kiò-chòe Bi̍t-ka, sī Hap-lân ê cha-bó͘-kiáⁿ; Hap-lân sī Bi̍t-ka ê lāu-pē, mā-sī Ia̍h-ka ê lāu-pē.

30Sa-lâi bōe seng-io̍k, bô siⁿ-kiáⁿ.

31Tha-la chhōa i ê kiáⁿ A-pek-lân kap sun Lô-tek, chiū-sī Hap-lân ê kiáⁿ, í-ki̍p i ê sin-pū Sa-lâi, chiū-sī A-pek-lân ê bó͘, chòe-hé lī-khui Pa-pí-lûn ê Ngô͘-ní -siâⁿ, beh khì Ka-lâm -tōe; in kàu Hap-lân chiū tòa tī hia.

32Tha-la oa̍h nn̄g-pah khòng gō͘ hè, sí tī Hap-lân.

← Chapter 10 Jump to: Chapter 12 →